Read Central Bicolano 2 Samuel 16 Bible Online

2 Samuel 16 - Central Bicolano bible

2 Samuel 16

¹Kan nakaoroenotan na si David sa alitoktok kan bulod, sinabat siya ni Ziba, an sorogoon ni Mefiboset, na may guyod na duwang asnong kargado nin dos syentos na tinapay, sanggatos na pungot nin pasas, sanggatos na pungot nin preskong mga prutas, asin sarong laogan na anit na pano nin arak.

²Hinapot siya ni Hadeng David, “Ano an gigibohon mo sa mga dara mong iyan?” Nagsimbag si Ziba, “An mga asno sasakayan kan pamilya kan hade, an mga tinapay asin mga prutas kakakanon kan kalalakihan, asin an arak para sa mga pinanluluya sa kalangtadan.”

³Naghapot an hade, “Haen si Mefiboset, an makoapo kan saimong kagurangnan na si Saul?” Nagsimbag si Ziba, “Nagpawalat siya sa Jerusalem huli ta nagtutubod siyang ibabalik saiya kan mga Israelita an kahadean kan saiyang lolo na si Saul.”

⁴Sinabihan kan hade si Ziba, “Poon ngunyan, saimo na an gabos na pagsadiri ni Mefiboset.” Nagsimbag si Ziba, “Sorogoon mo ako; padagos mo logod akong mawilihan, Mahal na hade.”

⁵Pag-abot ni Hadeng David sa Bahurim, nagluwas sa pagsabat saiya an saro sa mga kadugo ni Saul, na an ngaran Simei, na aking lalaki ni Gera. Minamaldisyon niya si David mantang naglalakaw

⁶asin pinaggagapo si David saka an saiyang mga opisyal, maski napapalibotan si David kan saiyang mga tawohan sagkod mga bantay.

⁷Minaldisyon siya ni Simei, “Layas! Layas! Paragadan! Mayo nin halagang tawo!

⁸Kinua mo an kahadean ni Saul, kaya pinapadusahan ka ngunyan nin Kagurangnan huli ta kadakul sa pamilya ni Saul an saimong ginadan. Itinao na nin Kagurangnan an kahadean sa aki mong si Absalom, asin mayo ka na, ika na paragadan!”

⁹Nagsabi sa hade si Abisai, na aki ni Zeruias, “Mahal na hade, tadaw ta pinapabayaan mong maldisyonon ka kan ayam na iyan? Padumana ako asin pupugotan ko siya!”

¹⁰Sinabihan kan hade si Abisai asin an tugang niyang si Joab, “Dai kamo makilabot digdi. Kun maldisyonon niya ako huli ta sinabihan siya nin Kagurangnan, siisay an may deretsong maghapot kun tadaw ta ginigibo niya iyan?”

¹¹Dangan sinabihan ni David si Abisai asin an gabos niyang opisyal, “Kun boot ngani akong gadanon kan sakong aki, tadaw ta minangalas kamo sa Benjaminitang ini? Sinabihan siya nin Kagurangnan na maldisyonon ako, kaya pabayaan nindo siya na magmaldisyon sako.

¹²Tibaad pa mahiling nin Kagurangnan an sakong pagtios asin matawan niya ako nin mga biyaya karibay kan saiyang pagmaldisyon.”

¹³Kaya nagpadagos sa paglakaw si David asin an saiyang mga tawohan. Dai nag-ontok si Simei; naglakaw siya sa gilid kan bulod asin ipinadagos an pagmaldisyon, an paggapo, asin an pagtapok nin alpog ki David saka sa mga kaibahan kan hade.

¹⁴Paragal nin marahay kan mag-abot sa Jordan an hade asin an saiyang mga tawohan; nagpahingalo sinda duman.

¹⁵Naglaog sa Jerusalem si Absalom asin an gabos na Israelita na kaiba niya. Kaiba man niya si Ahitofel.

¹⁶Kan masabatan si Absalom ni Husai, na katood ni David, nagkurahaw si Husai, “Mabuhay an hade! Mabuhay an hade!”

¹⁷Hinapot siya ni Absalom, “Iyo iyan an saimong kaimbodan sa saimong katood? Tadaw ta dai ka nag-iba sa saiya?”

¹⁸Nagsimbag si Husai, “Paano ko magigibo iyan? Maapil ako sa pinili kan Kagurangnan, kan mga tawong ini, asin kan gabos na Israelita. Maiba ako saimo.

¹⁹Huli ta siisay an sakong paglilingkodan? Bakong an aki kan sakong kagurangnan? Siring na pinaglingkodan ko an saimong ama, paglilingkodan taka man ngunyan.”

²⁰Dangan sinabihan ni Absalom si Ahitofel, “Ngunyan na uya na kita digdi, ano an ihahatol mong gibohon ta?”

²¹Nagsimbag si Ahitofel, “Lakaw asin dorogan mo an mga kasaroan kan saimong ama na nagkawaralat sa pag-ataman kan palasyo. Dangan maaaraman kan lambang saro sa Israel na saro ka nang kaiwal sa panhiling kan saimong ama, asin mapapakosog mo an boot kan mga parasunod mo.”

²²Kaya nagpatindog sinda nin sarong tolda para ki Absalom sa ibabaw kan atop kan palasyo dangan sa panhiling kan gabos, naglaog si Absalom asin dinorogan an mga kasaroan kan saiyang ama.

²³Kan panahon na idto, an anoman na hatol na itinao ni Ahitofel inaako na garong tataramon man sana nin Dios; sinunod ini ni David asin ni Absalom.