Read Central Bicolano 2 Samuel 18 Bible Online

2 Samuel 18 - Central Bicolano bible

2 Samuel 18

¹Tinipon ni Hadeng David an gabos niyang tawohan, pinaggrupo-grupo sa rinibo asin sa ginatos, dangan binugtakan nin mga pamayo.

²Pakatapos, isinubol niya sinda sa tolong grupo sa pamamahala ni Joab, ni Abisai na tugang na lalaki ni Joab asin ni Ittai na taga Gat. Sinabihan kan hade an saiyang mga tawohan, “Maiba ako saindo.”

³Nagsimbag sinda, “Dai ka dapat mag-iba samo; huli ta kun magdulag kami, mayo iyan nin kahulogan sa mga kaiwal. Kun magadan an kabanga samo, mayo man giraray iyan nin kahulogan sainda; alagad sampolong ribo an saimong katimbang. Mas marahay na digdi ka sana sa syudad asin padarahan mo kami nin tabang.”

⁴Nagsimbag an hade, “Gigibohon ko an pinaghohona nindong marahay.” Dangan nagtindog siya sa may trangkahan mantang nagmamartsa paluwas an hukbo, sa grupo nin ginatos asin rinibo.

⁵Pinagbotan kan hade si Joab, si Abisai asin si Ittai, “Huli sako, dai nindo pagkulogon an hoben na si Absalom.” An pagboot kan hade sa mga namamayo kan hukbo manongod ki Absalom nadangog kan gabos na tawo.

⁶Kaya nagluwas an hukbo ni David asin nakilaban sa mga Israelita sa kadlagan nin Efraim.

⁷Nadaog an mga Israelita kan mga tawohan ni David; dakul an nagkagaradan kan aldaw na idto, mga beynte mil an nagadan.

⁸Naglakop an ralaban sa kaawagan, asin mas dakul an nagkagaradan sa kadlagan ki sa pagralaban.

⁹Nasabat ni Absalom an nagkapirang tawohan ni David. Nakalunad siya sa sarong mula asin kan magsurok an mula sa irarom kan mahibog na mga sanga kan hamurawon na kahoy, nakasabit an saiyang payo sa mga sanga. Nagpadagos an mula sa pagdalagan kaya nawalat na nakabitay si Absalom.

¹⁰Nahiling si Absalom kan saro kan mga tawohan ni David asin ibinareta ini ki Joab, “Nahiling kong nabibitay si Absalom sa hamurawon na kahoy!”

¹¹Nagsimbag si Joab, “Ano, nahiling mo siya? Tadaw ta dai mo pa siya ginadan duman? Tinawan taka kutana nin sampolong pedasong plata saka sarong paha.”

¹²Alagad nagsimbag ki Joab an lalaki, “Maski tawan mo pa ako nin sarong ribong plata, dai ko ibibikyaw an sakong kamot laban sa aking lalaki kan hade. Nadangog mi gabos an hade kan pagbotan ka niya, si Abisai, asin si Ittai, na dai nindo pagkulogan an hoben na si Absalom huli saiya.

¹³Alagad kun linapas ko an hade asin ginadan si Absalom, maaaraman man sana iyan kan hade, huli ta naaaraman niya an gabos, asin pababayaan mo man sana ako.”

¹⁴Nagsabi si Joab, “Nasasayang an panahon ko saimo.” Nagkua si Joab nin tolong garod asin itinusok an mga ini sa daghan ni Absalom mantang buhay pa siya asin nabibitay sa hamurawon na kahoy.

¹⁵Dangan pinalibotan si Absalom asin ginadan kan sampolong paradara kan armas ni Joab.

¹⁶Pinatanog ni Joab an trompeta tanganing paontokon an ralaban. Nagbaralik an saiyang mga soldados hale sa paglamag sa mga Israelita.

¹⁷Kinua ninda an bangkay ni Absalom asin ihinulog sa sarong hararom na kalot duman sa kadlagan dangan tinahoban ninda an kalot nin sarong dakulang tambak nin gapo. Nagdurulag an mga Israelita; an lambang saro sa saiyang harong.

¹⁸Kan nabubuhay pa si Absalom, nagpatindog siya nin sarong monumento para sa saiya sa Kapantayan nin Hade, huli ta mayo siya nin maski sarong aking lalaki na magdadara kan saiyang ngaran. Isinunod niya sa saiyang ngaran an ngaran kan monumento, kaya sagkod ngunyan inaapod ining Monumento ni Absalom.

¹⁹Dangan nagsabi ki Joab si Ahimaaz, an aking lalaki ni Zadok, “Tugote akong magdalagan asin magdara kan marahay na bareta sa hade na ilinigtas siya nin Kagurangnan sa saiyang mga kaiwal.”

²⁰Nagsimbag si Joab, “Dai ka dapat magdara nin bareta ngunyan na aldaw; pwedeng sa ibang aldaw, alagad bako ngunyan, huli ta gadan an aking lalaki kan hade.”

²¹Dangan sinabihan ni Joab an saiyang sorogoon na taga Sudan, “Lakaw asin sabihan mo an hade kan saimong nahiling.” Nagduko sa atubangan ni Joab an sorogoon dangan nagdalagan na naghale.

²²Nagsabi giraray si Ahimaaz ki Joab, “Maski ano an mangyari, tugote man akong magdara kan bareta.” Naghapot si Joab, “Tadaw ta boot mong gibohon iyan, aki ko? Mayo ka man nin makukuang premyo kun gigibohon mo iyan.”

²³Nagsimbag si Ahimaaz, “Maski ano an mangyari, basta boot kong magduman.” Kaya sinabihan siya ni Joab, “Hala, dalagan na.” Nagdalagan si Ahimaaz asin nag-agi sa kapatagan; dai nahaloy, nalampasan niya an sorogoon.

²⁴Kan panahon na iyan nagtutukaw si David sa pagultanan kan panlaog asin kan panluwas na trangkahan kan syudad. Nagsakat sa itaas kan kudal an bantay asin nagtindog sa atop kan trangkahan; nakahiling siya nin sarong lalaking solo-solong nagdadalagan.

²⁵Nag-apod an bantay asin sinabihan an hade. Nagsimbag an hade, “Kun solo sana siya, marahay na bareta an saiyang dara.” Orog na naghaharani an nagdadalagan.

²⁶Dangan an bantay nakahiling pa nin sarong lalaking solong nagdadalagan, asin nag-apod siya sa parabukas kan trangkahan, “Hilinga! Igwa nin saro pang lalaki na nagdadalagan!” Nagsimbag an hade, “Marahay na bareta man an dara kaiyan.”

²⁷Nagsabi an bantay, “Garong ki Ahimaaz an dadalaganon kan naeenot.” Nagsabi an hade, “Marahay siyang tawo, asin marahay an dara niyang bareta.”

²⁸Nagkurahaw nin pangomusta si Ahimaaz sa hade, nagdapa sa daga sa atubangan kan hade saka nagsabi, “Pag-omawon an Kagurangnan na saimong Dios, na nagtao saimo nin kapangganahan laban sa mga nagrebelde sa mahal na Hade!”

²⁹Naghapot an hade, “Marahay daw an kamugtakan kan hoben na si Absalom? Nagsimbag si Ahimaaz, “Mahal na hade, kan sinugo ako ni Joab na saimong opisyal nakahiling ako nin dakulang kariribokan, alagad dai ko masasabi kun ano idto.”

³⁰Nagsabi an hade, “Magtindog ka ngona duman.” Kaya nagtindog si Ahimaaz sa sinabing lugar.

³¹Dangan nag-abot an oripon na taga Sudan asin nagsabi sa hade, “Dara ko an marahay na bareta para sa mahal na hade! Pinapanggana ka ngunyan na aldaw nin Kagurangnan laban sa gabos na nagrebelde saimo!”

³²“Marahay daw an kamugtakan kan hoben na si Absalom?” an hapot kan hade. Nagsimbag an oripon, “Nagmamawot akong mangyari logod sa gabos mong kaiwal asin sa gabos na magrebelde saimo an nangyari ki Absalom.”

³³Inabotan nin makuring kamondoan an hade. Nagsakat siya sa kwartong nasa itaas kan trangkahan asin naghibi. Mantang naglalakaw siya, nasasambit niya an, “O aki ko! Aki kong Absalom, aki ko! Ako na kuta an nagadan embes na ika, aki ko! Absalom, aki ko!”