Read Central Bicolano 2 Samuel 20 Bible Online

2 Samuel 20 - Central Bicolano bible

2 Samuel 20

¹Nangyari na duman sa Gilgal, igwa nin sarong tawong mayo nin halaga na an ngaran Sheba, na aking lalaki ni Bikri, na gikan sa tribu ni Benjamin. Pinatanog niya an trompeta dangan nagkurahaw, “Mayo kaming kahirasan ki David; mayo kaming pamana hale sa aki ni Jesse! Mga Israelita, magpuruli na kita!”

²Kaya binayaan si David kan mga Israelita asin nag-iba ki Sheba, alagad padagos na nagin maimbod ki David an mga taga Juda; nagsunod sinda saiya poon sa Jordan sagkod sa Jerusalem.

³Pag-abot ni David sa saiyang palasyo sa Jerusalem, kinua niya an sampolo niyang kasaroan na winalat niyang mangataman kan palasyo. Linaom niya sinda sa sarong harong asin pinabantayan. Tinawan niya sinda kan saindang kaipuhan, alagad dai niya sinda dinorogan. Kaya nagdanay sindang garo mga balo sagkod na sinda magadan.

⁴Sinabihan si Amasa kan hade, “Apoda asin tipona an kalalakihan nin Juda dangan ipag-iba mo pagbalik digdi pakalihis nin duwang aldaw.”

⁵Naglakaw si Amasa tanganing apodon sinda, alagad dai siya nakabalik sa panahon na itinalaan kan hade.

⁶Kaya sinabihan si Abisai kan hade, “Orog na kulog nin payo an itatao sato ni Sheba ki sa ki Absalom. Ipag-iba mo an sakong mga tawohan asin lamagon mo siya, ta tibaad may masakop siyang pusog na mga banwa asin makadulag sato.”

⁷Kaya kaiba si Abisai, nagharale sa Jerusalem an mga tawohan ni Joab, an mga bantay kan hade, asin an gabos na soldados tanganing lamagon si Sheba.

⁸Pag-abot ninda sa dakulang gapo sa Gibeon, sinabat sinda ni Amasa. Nakasulot kaidto si Joab nin gubing na panggera; an saiyang espada na nasa sarongan nakakabit sa saiyang paha. Mantang nagrarani siya, nahulog an espada.

⁹Sinabihan ni Joab si Amasa, “Komusta, tugang ko?” Kinapotan kan toong kamot ni Joab an barabas ni Amasa tanganing hadokan siya.

¹⁰Dai nahiling ni Amasa an espadang kapot ni Joab sa ibong na kamot, kaya nasaksak siya ni Joab sa tulak asin nawawa an saiyang bituka sa daga. Nagadan tolos si Amasa; dai na kaipuhan na saksakon pa siya giraray ni Joab. Linamag si Sheba ni Joab asin ni Abisai na tugang ni Joab.

¹¹Nagtindog an saro kan mga tawohan ni Joab asin nagkurahaw, “An gabos na kampi ki Joab asin ki David magsunod ki Joab!”

¹²An bangkay ni Amasa yaon sa tahaw kan dalan, nagkakarigos sa sadiring dugo. Kan mahiling kan tawohan ni Joab na minaontok an lambang saro na minaagi duman, ginuyod niya an bangkay pasiring sa oma dangan tinahoban nin tamong.

¹³Pakatapos na mahale an bangkay sa dalan, nagsurunod an gabos ki Joab tanganing lamagon si Sheba.

¹⁴Inagihan ni Sheba an teritoryo kan gabos na tribu nin Israel pasiring sa syudad nin Abel Bet-maaca; nagtiripon an gabos na kaayon kan kamaganakan ni Bikri asin nagsunod saiya palaog sa syudad.

¹⁵Naaraman kan mga tawohan ni Joab na yaon si Sheba duman, kaya nagduman sinda asin pinalibotan ninda an syudad. Nagtambak sinda nin daga sa luwas kan kudal asin nagpoon na magkalot sa tangod kan kudal tanganing mapukan ini.

¹⁶Dangan hale sa syudad, nagkurahaw an sarong madonong na babae, “Paghinanyog! Paghinanyog! Sabihi nindo na magdigdi si Joab; boot ko siyang makaolay.”

¹⁷Nagduman si Joab asin hinapot kan babae, “Ika si Joab?” “Iyo,” an simbag ni Joab. Dangan nagsabi an babae, “Dangoga an sasabihon ko.” Nagsimbag si Joab, “Nagdadangog ako.”

¹⁸Nagsabi an babae, “Nagin kaugalean nang sabihon ninda kaidto na, ‘Lakaw asin hanapa an saimong kasimbagan sa syudad nin Abel’—asin ginigibo mananggad ninda iyan.

¹⁹Bantog an samong syudad, saro kan pinakamatoninong asin maimbod na syudad sa Israel. Tadaw ta boot mong rumpagon ini? Tano ta boot mong raoton an pamana nin Kagurangnan?”

²⁰Nagsimbag si Joab, “Dai logod mangyari iyan sako na raoton o rumpagon ko an saindong syudad!

²¹Bakong iyan an sakong plano. Alagad sarong lalaki na an ngaran Sheba, na aki ni Bikri asin hale sa mabulod na daga nin Efraim, an nagtumang ki Hadeng David. Isuko nindo siya, asin mahale na ako sa syudad na ini.” Nagsimbag an babae, “Itatapok mi sa ibong kan kudal an saiyang payo pasiring diyan.”

²²Dangan nagduman an babae sa saiyang mga kahimanwa asin sinabihan sinda kan saiyang plano. Pinugotan ninda nin payo si Sheba asin itinapok an payo sa ibong kan kudal pasiring ki Joab. Kaya pinatanog ni Joab an trompeta bilang tanda para sa saiyang mga tawohan na maghale na sa syudad asin magpuli sa saindang mga harong. Nagbalik si Joab sa Jerusalem asin sa hade.

²³Si Joab an namayo kan hukbo nin Israel; si Benaias na aking lalaki ni Jehoiada an namahala kan mga bantay ni David;

²⁴si Adoniram iyo an namahala kan mga tawong pirit na pinapagtrabaho; si Jehosafat na aking lalaki ni Ahilud an kansilyer;

²⁵si Sheba iyo an sekretaryo; si Zadok saka si Abiatar iyo an mga padi,

²⁶asin si Ira na taga Jair saro pa man kan mga padi ni David.