Read Central Bicolano 2 Samuel 21 Bible Online

2 Samuel 21 - Central Bicolano bible

2 Samuel 21

¹Kan naghahade na si David, nagkaigwa nin makuring gutom sa laog nin tolong taon. Kaya hinapot ni David an Kagurangnan manongod sa bagay na ini. Nagtaram an Kagurangnan, “Nagkasala nin panggagadan si Saul asin an saiyang pamilya; ginadan niya an mga taga Gibeon.”

²(Bako man sindang mga Israelita kundi sarong sadit na grupo nin mga Amoreo na pinanugaan kan mga Israelita na aatamanon, alagad boot sindang gadanon ni Saul huli kan saiyang pagmakulog sa banwaan nin Israel asin Juda.)

³Kaya inapod ni David an mga taga Gibeon asin sinabihan, “Ano an magigibo ko para saindo? Boot kong mabayadan an karatan na ginibo saindo, tanganing mabendisyonan nindo an banwaan nin Kagurangnan.”

⁴Nagsimbag an mga taga Gibeon, “Dai mababayadan nin plata o bulawan an samong kaanggotan ki Saul asin sa saiyang pamilya; dai man kami nagmamawot na gumadan nin Israelita.” Naghapot si David, “Kun siring, ano sa paghona nindo an dapat kong gibohon para saindo?”

⁵Nagsimbag sinda, “Boot ni Saul na gadanon kami asin mayo nin itadang buhay saen man sa Israel.

⁶Kaya itao mo samo an pito kan saiyang mga lalaking kapagarakian, asin sa atubangan nin Kagurangnan, bibitayon mi sinda sa Gibeon, sa sadiring banwa ni Saul, an piniling hade nin Kagurangnan.” Nagsimbag an hade, “Itatao ko sinda saindo.”

⁷Alagad huli kan banal na panuga na ginibo ninda ni Jonatan sa lambang saro, ilinigtas ni David an aki ni Jonatan na si Mefiboset, na makoapo ni Saul.

⁸Kinua ni David si Armoni asin si Mefiboset, an duwang aking lalaki ni Saul ki Rizpa na aking babae ni Aia; an limang aking lalaki kan aking babae ni Saul na si Merab na agom ni Adriel na aking lalaki ni Barzillai na taga Mehola,

⁹dangan itinao sinda ni David sa mga taga Gibeon. Binitay sinda kan mga taga Gibeon sa bukid sa atubangan nin Kagurangnan asin sabay sindang nagadan. Binitay sinda sa mga enot na aldaw nin tig-ani, sa pagpoon kan pag-ani kan sebada.

¹⁰Dangan nagkua nin sako si Rizpa na aking babae ni Aia, asin ginibo ining lindongan niya sa ibabaw nin gapo na namumugtakan kan mga bangkay; duman siya nag-erok poon kan magpoon an pag-ani sagkod sa tig-uran. Kun aldaw, inaalaw niya an mga gamgam, asin kun banggi, dai niya pinaparani sa mga bangkay an lalaw na mga hayop.

¹¹Kan maaraman ni David an ginibo ni Rizpa,

¹²nagduman siya asin kinua niya sa mga taga Jabes sa Gilead an mga tolang ni Saul saka ni Jonatan na aki ni Saul. Sinda an naghabon kan mga bangkay ni Saul asin ni Jonatan na binitay kan mga Filisteo sa plasa nin Betsan kan aldaw na magadan ninda si Saul sa Bukid nin Gilboa.

¹³Kinua ni David an mga tolang ni Saul saka ni Jonatan asin tinipon man niya an mga tolang kan pitong lalaking binitay.

¹⁴Dangan ilinubong ninda an mga tolang ni Saul asin ni Jonatan sa Zela sa daga ni Benjamin, sa lulubngan ni Kis na ama ni Saul; ginibo ninda an gabos na ipinagboot kan hade. Pakatapos kaini, sinimbag nin Dios an saindang mga pamibi para sa nasyon.

¹⁵Nagkaigwa na naman nin gera an mga Filisteo laban sa Israel; linabanan ni David asin kan saiyang mga tawohan an mga Filisteo. Sa saro kan mga ralaban, nakamate si David nin kapagalan.

¹⁶Sarong higante na an ngaran Isbibenob, na may darang bronseng garod na tolo may kabangang kilo an gabat asin sarong bagong espada, an naghona na magagadan niya si David.

¹⁷Alagad tinabangan si David ni Abisai na aking lalaki ni Zeruias, sinalakay an higante, asin ginadan. Dangan pinasumpa si David kan saiyang mga tawohan na, “Dai ka na nanggad mag-iba samo sa pakilaban. Ika an paglaom nin Israel, asin habo ming mawara ka.”

¹⁸Pakatapos kaini, nagkaigwa na naman nin gera laban sa mga Filisteo sa Gob; sa ralaban na ini, nagadan ni Sibbecai na taga Husa si Saf, na saro sa mga kapagarakian kan mga higante.

¹⁹Nagkaigwa pa nin sarong gera laban sa mga Filisteo sa Gob, asin nagadan ni Elhanan na aking lalaki ni Jair na taga Betlehem si Goliat na taga Gat na igwang garod na an tugod siring kadakula sa kahabaan nin sarong habolan.

²⁰Dangan nagkaigwa pa nin sarong gera sa Gat, sa lugar na igwa nin sarong higante na anom an muro sa lambang kamot asin sa lambang bitis; mga higante man an saiyang ginikanan.

²¹Kan pinag-oolog-olog niya an mga Israelita, ginadan siya ni Jonatan, na aking lalaki ni Samma na tugang ni David.

²²An apat na higanteng ini, na ginaradan ni David saka kan saiyang mga tawohan, gabos gikan sa mga higante sa Gat.