Read Central Bicolano 2 Samuel 22 Bible Online

2 Samuel 22 - Central Bicolano bible

2 Samuel 22

¹Kan iligtas nin Kagurangnan si David ki Saul asin sa iba pa niyang mga kaiwal, inawit ni David sa Kagurangnan an awit na ini:

²An Kagurangnan iyo an sakong parasurog; siya an sakong pailihan, sakong paratubos.

³An sakong Dios, gapo na sakong pailihan; siya an sakong kalasag, sakong katabang, sakong bantayan, sakong paraligtas; ilinigtas niya ako sa kadahasan.

⁴Minaapod ako sa Kagurangnan, asin iliniligtas niya ako sa sakong mga kaiwal. Pag-omawon an Kagurangnan!

⁵Napalibotan ako kan mga alon nin kagadanan; duminagsa sako an mga alon nin pagkaraot.

⁶Naporopotan ako kan mga pisi nin Sheol, asin nakaatubang sako an mga siod nin kagadanan.

⁷Sa sakong kasakitan nag-apod ako sa Kagurangnan; nag-apod ako sa sakong Dios tanganing tabangan. Nadangog niya an sakong tingog sa saiyang templo; nakaabot sa saiyang pandangog an sakong inagrangay.

⁸Dangan nagtakig asin natanyog an daga; nagtakig asin natanyog man an mga pundasyon kan kalangitan, huli ta naanggot an Dios.

⁹Aso nagluwas hale sa saiyang dungo, nanghahalon na kalayo saka naglalaad na baga hale sa saiyang ngoso.

¹⁰Binuka niya an kalangitan dangan huminilig siya; maitom na panganoron nasa irarom kan saiyang mga bitis.

¹¹Nagsakay siya sa kerubin asin naglayog; nahiling siyang nakalunad sa mga pakpak nin doros.

¹²Ginibo niyang pantahob an kadikloman; napalibotan siya nin mahibog na mga dampog na pano nin tubig.

¹³Hale sa kikilat sa atubangan niya, nagluwas an mga laad nin kalayo.

¹⁴An Kagurangnan nagdaguldol sa kalangitan; asin nadangog an tingog kan Kahorohalangkawe.

¹⁵Nagpana siya asin nagkawararak an saiyang mga kaiwal; nagpakikilat siya asin nagdurulag sinda.

¹⁶Dangan nahiling an kairaroman nin kadagatan, asin nahayag an mga pundasyon kan kinaban, kan tuyawon nin Kagurangnan an saiyang mga kaiwal, asin kurahawan sinda sa kaanggotan.

¹⁷Hale sa itaas, ginawagaw ako nin Kagurangnan asin kinapotan; hinawas niya ako sa hararom na katubigan.

¹⁸Ilinigtas niya ako sa makosog kong mga kaiwal, asin sa gabos na naanggot sakuya; huli ta dai ko kaya an kosog ninda.

¹⁹Nagsalakay sinda kan ako nasa kasakitan, alagad iningatan ako nin Kagurangnan.

²⁰Tinabangan niya akong makahale sa pag-alaman; ilinigtas niya ako huli ta ako saiyang nawilihan.

²¹Binalosan ako nin Kagurangnan sosog sa sakuyang katanosan; benendisyonan niya ako huli ta mayo ako nin kasalan.

²²Kinuyog ko an mga togon nin Kagurangnan; an sakuyang Dios dai ko tinalikodan.

²³An gabos niyang togon sakuyang inotob; dai ko linapas an saiyang mga kabotan.

²⁴Ako nagin matanos sa saiyang atubang, asin linikayan ko an gabos na kasalan.

²⁵Kaya binalosan ako nin Kagurangnan sosog sa sakuyang katanosan; sosog sa sakong kalinigan sa saiyang atubang.

²⁶Kagurangnan, maimbod ka sa mga maimbod saimo; matanos ka sa mga matanos saimo.

²⁷Mabini ka sa mga tawong mabini, alagad makuri ka sa mga tawong maraot.

²⁸Ilinigtas mo an mga mapakumbaba, alagad an mga mata mo yaon sa mga mapaabaw-abaw tanganing sinda saimong ibaba.

²⁹Ika, Kagurangnan, an sakong ilaw; asin pinapaliwanag nin sakong Dios an sakong kadikloman.

³⁰Huli sa saimo, maroronot ko an sarong hukbo; huli sa sakong Dios, malulukso ko an sarong kudal.

³¹An Dios na ini—marahayon an mga gibo! An saiyang mga panuga totoong masasarigan! Siya an kalasag nin gabos na minapaataman saiya.

³²Huli ta siisay an Dios kundi an Kagurangnan? Siisay an gapo kundi an satuyang Dios?

³³An Dios na ini iyo an makosog kong pailihan; ginibo niyang ligtas an sakong dalan.

³⁴Ginibo niya akong maingat sa paglakaw arog sa usa; pinangagin niya akong ligtas sa ibabaw nin kabukidan.

³⁵Tinutukdoan niya ako para sa gera, tanganing mabingat ko an bronseng pana.

³⁶Kagurangnan, itinao mo sako an kalasag nin saimong kaligtasan; asin pinangagin dakula kan saimong tabang.

³⁷Tinawan mo ako nin mahiwas na lugar na lalakawan, asin an sakong mga bitis dai nadalinas.

³⁸Linamag ko asin ginadan an sakong mga kaiwal; dai ako nag-ontok sagkod na sinda nagkagaradan.

³⁹Ginadan ko sinda, asin dai na nakabangon; natumba sinda sa sakong pamitisan.

⁴⁰Pinakosog mo ako sa pakikilaban; an mga kaiwal ko tinumba mo sa sakong pamitisan.

⁴¹Pinadulag mo an sakuyang mga kalaban; an mga naoongis sako, sakuyang ginadan.

⁴²Sinda nag-agrangay alagad mayong nagligtas; nag-apod sinda sa Kagurangnan, alagad dai niya sinda sinimbag.

⁴³Rinonot ko sindang pino arog sa alpog kan daga, tinimak-timakan ko sinda siring sa laboy sa mga tinampo.

⁴⁴Ilinigtas mo ako sa mga tawong masombikal asin ginibo mo akong hade nin mga nasyon; banwaan na dai ko man midbid nguyan sakong nasasakopan.

⁴⁵Mga dayuhan nagduruko sa atubangan ko; kan madangog ninda ako, nagkuyog sinda sako.

⁴⁶Pinanruluya an saindang boot, asin tinatakigan na nagruluwas sa saindang mga bantayan.

⁴⁷An Kagurangnan buhay! Pag-omawon an sakong parasurog! Irukyaw an sakong Dios, an gapo nin sakong kaligtasan.

⁴⁸Tinawan niya ako nin kapangganahan laban sa sakong mga kalaban; pinasakop niya sako an mga nasyon

⁴⁹asin ilinigtas niya ako sa sakuyang mga kaiwal. Kagurangnan, pinapanggana mo ako laban sa sakuyang mga kaiwal, asin ilinigtas mo ako sa mga madahas na tawo.

⁵⁰Kaya, Kagurangnan, oomawon taka sa tahaw nin mga nasyon; maawit ako nin mga pag-omaw sa saimo.

⁵¹Darakulang panggana itinatao niya sa saiyang hade; danay na pagkamoot an ipinapahiling niya sa saiyang linahidan, ki David asin sa kapagarakian kaini sagkod pa man.