Read Central Bicolano 2 Samuel 23 Bible Online

2 Samuel 23 - Central Bicolano bible

2 Samuel 23

¹Pinangagin dakula nin Dios si David na aking lalaki ni Jesse. Siya an pinili kan Dios ni Jacob na magin hade asin siya an naggibo nin magayon na mga awit para sa Israel. Ini an mga huring tataramon ni David:

²An espiritu nin Kagurangnan nagtataram sa paagi ko; an saiyang mensahe yaon sa sakong ngoso.

³Nagtaram an Dios nin Israel; an Gapo nin Israel nagtaram sako: “An hade na nagsasakop na may katanosan, na nagsasakop na may pagkatakot sa Dios,

⁴nagbabanaag siring sa liwanag nin kaagahon, siring sa aldaw na nagliliwanag sa sarong mayong dampog na kaagahon, siring sa uran na nakakapatalubo kan doot sa daga.”

⁵Siring an gigibohon na pagbendisyon nin Dios sa sakong kapagarakian, huli ta guminibo siya sako nin mayong kataposan asin dai mapapatod na tipan, sarong panuga na dai nanggad maliliwat. Huli ta dai daw ako tatabangan nin Dios, asin papangyarihon an gabos kong kamawotan?

⁶Alagad an mga mayong dios arog sa mga tonok na itinatapok; mayo saindang mangahas madodotdot.

⁷Sinda nadodotdot sana kan mga tawong may gamit na lansang asin tugod nin garod, asin natututong sinda sa kalayo.

⁸Iyo ini an ngaran kan bantog na mga soldados ni David: si Joseb-basebet na taga Takemon, na iyo an lider kan “An Tolo”; linabanan niya asin nagadan an walong gatos na kalalakihan sa sarong ralaban na garod sana an saiyang armas.

⁹An sunod sa bantog na “An Tolo” iyo si Eleazar na aking lalaki ni Dodo kan kamaganakan ni Ahohi. Kaiba siya ni David kan agyaton ninda an mga Filisteo na nagtiripon duman para sa ralaban. Suminibog an mga Israelita,

¹⁰alagad dai naghiro si Eleazar; linabanan niya an mga Filisteo sagkod na panluyahon an saiyang kamot asin dai na niya nabubutasan an saiyang espada. Dakulang kapangganahan an ipinahiling nin Kagurangnan kan aldaw na idto. Pakatapos kan ralaban, nagbalik an mga Israelita sa namumugtakan ni Eleazar tanganing hurubaan kan gubing sa pakilaban an mga nagkagaradan.

¹¹An sunod ki Eleazar iyo si Samma na aking lalaki ni Agee na taga Harar. Nagtiripon an mga Filisteo sa Lehi, sa sarong oma na natatanoman nin garbansos. Nagdurulag an mga Israelita sa pakilaban sa mga Filisteo,

¹²alagad dai naghiro si Samma sa saiyang natitindogan duman sa oma. Dai siya naghale kundi nakilaban; ginadan niya an mga Filisteo. Sarong dakulang kapangganahan an ipinahiling nin Kagurangnan kan aldaw na idto.

¹³Kan magpopoon na an tig-anihan, tolo sa treyntang namamayong soldados an nagduman ki David, sa may lungib nin Adullam, mantang nagkakampo an sarong grupo nin mga Filisteo sa Kapantayan nin Refaim.

¹⁴Yaon kaidto si David sa sarong bantayan, asin sinakop na kaidto nin sarong grupo nin mga Filisteo an Betlehem.

¹⁵Napungaw si David asin nagsabi, “Kun igwa lamang kutanang makatao sako nin maiinom na tubig na hale sa bubon na nasa may trangkahan kan Betlehem!”

¹⁶Kaya nangahas maglaog sa kampo kan mga Filisteo an tolong makokosog na soldados, nagharok nin tubig sa bubon, na nasa may trangkahan kan Betlehem, dangan dinara ki David. Alagad dai idto ininom ni David, kundi inula bilang sarong atang sa Kagurangnan.

¹⁷Nagsabi si David, “Kagurangnan, dai ko ini pwedeng inomon! Garo ko man sana ininom an dugo kan mga lalaking ini na nagbugtak kan saindang buhay sa pag-alaman!” Kaya dai ininom ni David an tubig. Iyo ini an mga ginibo kan tolong bantog na soldados.

¹⁸Si Abisai, na tugang na lalaki ni Joab (an ina ninda iyo si Zeruias), iyo an pamayo kan “An Treynta.” Nakilaban siya sa paagi kan saiyang garod laban sa tolong gatos na kaiwal asin ginadan niya an mga ini, kaya nagin bantog siya arog kan “An Treynta.”

¹⁹Siya an pinakabantog sa “An Treynta” asin iyo an saindang nagin pamayo; alagad bako siyang arog kabantog kan “An Tolo.”

²⁰Si Benaias na aking lalaki ni Jehoiada na taga Kabzeel, saro man na bantog na soldados; nagpahiling siya nin dakul na gawe nin kaisogan. Ginadan niya an duwang dakulang paralaban na Moabita. Sarong aldaw sa panahon nin tiglipot, nagbaba siya sa sarong kalot asin nakagadan duman nin sarong leon.

²¹Nakagadan man siya nin sarong Egipcio, sarong dakulang lalaki na armado nin garod. Sinalakay ini ni Benaias na kapot an sarong sugkod, inagaw an garod sa kamot kan Egipcio asin ginadan ini kan sadiring garod.

²²Iyo ini an mga ginibo ni Benaias, na kabilang sa “An Treynta.”

²³Saro siya sa mas bantog sa “An Treynta,” alagad bakong arog kabantog kan “An Tolo.” Siya an ibinugtak ni David na pamayo kan saiyang mga bantay.

²⁴An iba pang kaayon kan “An Treynta” iyo an minasunod: si Asahel na tugang ni Joab si Elhanan na aking lalaki ni Dodo na taga Betlehem si Samma asin Elika na taga Harod si Helez na taga Pelet si Ira na aking lalaki ni Ikkes na taga Tekoa si Abiezer na taga Anatot si Mebunnai na taga Husa si Zalmon na taga Aho si Maharai na taga Netofa si Heleb na aking lalaki ni Baana na taga Netofa si Ittai na aking lalaki ni Ribai na taga Gibea sa daga ni Benjamin si Benaias na taga Piraton si Hiddai na hale sa mga kapantayan na harani sa Gaas si Abialbon na taga Araba si Azmavet na taga Bahurim si Eliaba na taga Saalbon an mga aking lalaki ni Jasen si Jonatan si Samma na taga Harar si Ahiam na aking lalaki ni Sharar na taga Harar Si Elifelet na aking lalaki ni Ahasbai na taga Maaca si Eliam na aking lalaki ni Ahitofel na taga Gilo si Hezro na taga Carmelo si Paarai na taga Arab si Igal na aking lalaki ni Natan na taga Zoba si Bani na taga Gad si Zelek na taga Ammon si Maharai na taga Beerot, na iyo an paradara kan armas ni (...)