Read Central Bicolano 2 Samuel 7 Bible Online

2 Samuel 7 - Central Bicolano bible

2 Samuel 7

¹Kan sa palasyo na nag-eerok si Hadeng David, asin kan dai na siya linalabanan kan gabos niyang mga kaiwal huli sa tabang nin Kagurangnan,

²sinabihan niya an propetang si Natan, “Uya ako nag-eerok sa harong na gibo sa sedro, alagad sa sarong tolda sana namumugtak an Kaban nin Tipan nin Dios!”

³Nagsimbag si Natan, “Giboha an nasa isip mo, huli ta kaiba mo an Kagurangnan.”

⁴Alagad kan bangging idto, nagtaram an Kagurangnan ki Natan,

⁵“Lakaw asin sabihan mo si David na sakong sorogoon, ‘Siring an itinaram nin Kagurangnan: Bakong ika an mapatugdok nin harong na sakuyang eerokan.

⁶Magpoon kan iluwas ko sa Egipto an Israel sagkod ngunyan, dai pa lamang ako nag-erok sa sarong harong; danay na nag-erok ako sa mga tolda, hale sa sarong lugar pasiring sa iba.

⁷Saen man ako magduman kaiba an banwaan nin Israel, dai pa lamang ako naghapot sa mga lider, na pinagbotan kong mangenot kan sakong banwaan, kun tadaw ta dai ninda ako ipinatugdok nin templong gibo sa sedro.’

⁸“Kaya sabihan mo si David na sakong sorogoon na ako, an Kagurangnan nin mga hukbo, an nagtataram saiya, ‘Kinua taka hale sa pagpastor nin mga karnero sa kaomahan asin ginibo takang hade kan sakong banwaan nin Israel.

⁹Inibahan taka saen ka man nagduman, asin dinaog ko an gabos mong kaiwal mantang nagdadangadang ka. Gigibohon kong magin bantog an saimong ngaran, arog kan ngaran kan mga darakulang lider sa kinaban.

¹⁰Nagpili na ako nin sarong lugar para sa sakong banwaan nin Israel asin pinapag-erok ko na sinda duman, saen dai na sinda aapihon. Kaidto danay na sinasalakay sinda nin mga mariringis na tawo, alagad dai na iyan mangyayari ngunyan. Nanunuga ako na ililigtas taka sa gabos mong kaiwal asin tatawan taka nin mga kapagarakian.

¹²Kun ika magadan dangan ilubong sa kaibahan kan saimong mga ginikanan, gigibohon kong hade an saro kan saimong mga aking lalaki asin papakosogon ko an saiyang kahadean.

¹³Siya an matugdok nin Templo para sako, asin gigibohon kong magdanay an saiyang trono sagkod pa man.

¹⁴Ako an saiyang magigin ama; siya an magigin aki kong lalaki. Kun magkasala siya, papadusahan ko siya siring kan pagpadusa nin sarong ama sa saiyang aki.

¹⁵Alagad dai ko hahaleon saiya an sakong tabang, bakong arog kan ginibo ko ki Saul, na sakong hinale tanganing ika an magin hade.

¹⁶Danay kang magkakaigwa nin mga kapagarakian, asin an saimong trono magdadanay sagkod lamang. Mayo nin kataposan an saimong kahadean.’”

¹⁷Isinabi ni Natan ki David an gabos na ipinahayag saiya nin Dios.

¹⁸Dangan naglaog si Hadeng David sa Tabernakulo, nagtukaw, asin namibi sa Kagurangnan, “Siisay man ako, O Kagurangnan Dios, saka ano an sakong pamilya, ta ginibo mo an mga bagay na ini sako?

¹⁹Alagad dakul pa an ginigibo mo para sako, O Kagurangnan Dios; nagtaram ka man manongod sa sakuyang kapagarakian sa maabot na panahon. Ipinahiling mo ini sa sarong tawo, O Kagurangnan Dios!

²⁰Ano pa an masasabi ko sa saimo? Midbid mo ako, na saimong sorogoon, O Kagurangnan Dios!

²¹Kabotan asin katuyohan mo na gibohon ini; ginibo mo an darakulang bagay na ini tanganing tukdoan ako.

²²Kaya dakula ka nin marahay, O Kagurangnan Dios; huli ta mayo nin makakaarog saimo; danay ming aram na ika sana an Dios.

²³Mayo nin ibang nasyon sa kinaban arog kan Israel, na saimong ilinigtas sa kaoripnan tanganing gibohon na sadiri mong banwaan. An darakula asin makangangalas na mga bagay na ginibo mo para sainda nakapabantog saimo sa bilog na kinaban. Pinalayas mo an ibang nasyon asin an saindang mga dios-dios mantang nagdadangadang an saimong banwaan, an banwaan na saimong pinatalingkas sa Egipto tanganing saimong masadirihan.

²⁴An Israel ginibo mong saimong sadiring banwaan sagkod pa man, asin ika, Kagurangnan, iyo an nagin saindang Dios.

²⁵“Kaya ngunyan, O Kagurangnan Dios, otoba sa gabos na panahon an panuga na ginibo mo manongod sako asin sa sakong kapagarakian; giboha siring sa saimong itinaram.

²⁶Dangan madakula an saimong ngaran asin masabi an mga tawo sagkod pa man, ‘An Kagurangnan nin mga hukbo iyo an Dios nin Israel,’ asin magdadanay man an sakong kahadean sagkod pa man.

²⁷Nagkaigwa ako nin kosog na magpamibi saimo, O Kagurangnan nin mga hukbo, Dios nin Israel, huli ta ipinahayag mo ini gabos sako, na saimong sorogoon, dangan tinaraman na gigibohon mong mga hade an sakong kapagarakian.

²⁸“Ika an Dios, O Kagurangnan Dios, totoo an saimong mga tataramon, asin ginibo mo an marahay na panugang ini sa saimong sorogoon.

²⁹Nakikimaherak ako na bendisyonan mo an sakong kapagarakian tanganing magdanay sinda sagkod pa man sa saimong atubangan; huli ta ika, O Kagurangnan Dios, an nagtaram kaini, asin an saimong bendisyon magdadanay sa sakong kapagarakian sagkod pa man.”