Read Central Bicolano 2 Samuel 9 Bible Online

2 Samuel 9 - Central Bicolano bible

2 Samuel 9

¹Sarong aldaw, naghapot si David, “Igwa pa daw nin natatada sa pamilya ni Saul? Kun igwa, boot kong ipahiling saiya an sakong pagkaherak huli ki Jonatan.”

²Igwa kaidto nin nagin sorogoon an pamilya ni Saul na an ngaran Ziba, asin pinaduman ninda ini ki David. Hinapot siya ni David, “Ika si Ziba?” “Iyo,” an simbag kaini.

³Hinapot siya giraray kan hade, “May natatada pa daw sa pamilya ni Saul na pwede kong pahilingan kan pagkaherak nin Dios?” Nagsimbag si Ziba, “Igwa pa nin natada sa mga aki ni Jonatan. Saro siyang pilay.”

⁴Naghapot an hade, “Haen siya?” Nagsimbag si Ziba, “Sa harong ni Makir na aking lalaki ni Ammiel sa Lodebar.”

⁵Kaya ipinakua siya ni David.

⁶Kan mag-abot si Mefiboset na aking lalaki ni Jonatan asin makoapo ni Saul, nagduko siya sa atubangan ni David sa pagtaong galang. Nagsabi si David, “Mefiboset!” Nagsimbag si Mefiboset, “Uya an saimong sorogoon.”

⁷Sinabihan siya ni David, “Dai ka matakot; huli ta maheherakan taka huli ki Jonatan na saimong ama. Ibabalik ko saimo an gabos na daga na dating sadiri kan saimong lolo na si Saul, asin digdi ka magkakakan sa sakong lamesa.”

⁸Nagduko giraray si Mefiboset dangan nagsabi, “Kagurangnan, ako garo sarong gadan na ayam! Tadaw ta marahayon ka sako?”

⁹Dangan inapod ni David si Ziba, an sorogoon ni Saul, asin sinabihan, “Ibinabalik ko sa makoapo kan saimong kagurangnan an gabos na pagsadiri ni Saul asin kan saiyang pamilya.

¹⁰Ika, an saimong mga aking lalaki, asin an saimong mga sorogoon iyo an mag-aataman kan daga para ki Mefiboset asin dadarahon mo saiya an ani, tanganing magkakan an saiyang pamilya. Alagad si Mefiboset danay na magkakakan sa sakong lamesa.” (Kinse an aking lalaki ni Ziba asin beynte an saiyang mga sorogoon.)

¹¹Nagsimbag si Ziba, “Gigibohon ko an gabos na ipinagboot kan sakong kagurangnan.” Magpoon kaidto, nagkakan si Mefiboset sa lamesa kan hade, arog kan arin man sa mga aking lalaki kan hade.

¹²Igwa nin aking lalaki si Mefiboset na an ngaran Mica. An gabos na kaayon sa pamilya ni Ziba nagin mga sorogoon ni Mefiboset.

¹³Kaya si Mefiboset, na pilay an duwang bitis, nag-erok sa Jerusalem asin nagkakan sa lamesa kan hade.