Read Central Bicolano 1 Kings 1 Bible Online

1 Kings 1 - Central Bicolano bible

1 Kings 1

¹Gurang na nin marahay si Hadeng David, asin maski pirang tamong an itahob sa saiya kan saiyang mga sorogoon dai na siya nahihimbongan.

²Kaya sinabihan siya kan saiyang mga opisyal, “Mahal na hade, mahanap kami nin sarong daraga na malingkod asin maataman saimo. Matotorog siya sa kataed mo asin mahihimbongan ka niya.”

³Naghanap sinda nin sarong magayon na daraga sa bilog na Israel, asin nakua ninda si Abisag na Sunamita. Dinara ninda siya sa hade.

⁴Magayon nin marahay si Abisag asin siya an naglingkod saka nag-ataman sa hade, alagad dai siya dinorogan ni David.

⁵Kan panahon na iyan, si Adonias na an ina iyo si Haggit naghambog na magigin hade siya; nag-andam siya para sa sadiri niya nin mga karwahe, mga nangangabayo, asin singkwentang lalaki na masabay saiya kun siya naglalakaw.

⁶Sa bilog na buhay niya dai pa lamang siya sinagwe ni David na saiyang ama, o hinapot lamang nin, “Tano ta ginibo mo ini?” Gwapo siyang marahay asin ngohod siya ki Absalom.

⁷Kinaolay ni Adonias si Joab, na an ina iyo si Zeruias, asin an padi na si Abiatar; nanuga sinda na tatabangan siya.

⁸Alagad dai nagkampi saiya an padi na si Zadok, si Benaias na aking lalaki ni Jehoiada, si Natan na propeta, si Simei, si Rei, asin an mga maiisog na soldados ni David.

⁹Sarong aldaw, nagbuno si Adonias nin mga karnero, mga torong baka asin mga pinatabang torilyong baka duman sa Gapo nin Halas, harani sa burabod nin Enrogel. Inalok niya sa saiyang bangkete an ibang aking lalaki ni Hadeng David asin an gabos na opisyal nin Juda.

¹⁰Alagad dai niya inalok an propetang si Natan, si Benaias, asin an mga maiisog na soldados, o si Solomon na tugang niya sa ama.

¹¹Dangan sinabihan ni Natan si Batsheba, na ina ni Solomon, “Dai mo nadangog na si Adonias na aki ni Haggit nagpahayag na siya na an hade asin dai ini aram ni Hadeng David?

¹²Uya an hatol ko saimo tanganing ikaligtas mo an saimong buhay asin an buhay kan saimong aking si Solomon.

¹³Dumuman ka tolos ki Hadeng David asin sabihan mo, ‘Mahal na hade, bakong nanuga ka sako na an aki kong si Solomon iyo an masalihid saimo bilang hade? Tano ta nagin hade ngunyan si Adonias?’”

¹⁴Nagsabi pa si Natan, “Dangan mantang nakikipag-olay ka pa sa hade, malaog ako asin papatotoohan ko an saimong mga sinabi.”

¹⁵Kaya naglaog sa kwarto kan hade si Batsheba. Gurang nang marahay an hade asin inaataman siya ni Abisag na Sunamita.

¹⁶Nagduko si Batsheba sa pagtaong galang sa hade asin naghapot si David, “Ano an kaipuhan mo?”

¹⁷Nagsimbag siya, “Mahal na hade, nanuga ka sako sa ngaran kan Kagurangnan na saimong Dios, na an aki kong si Solomon iyo an magigin hade sunod saimo.

¹⁸Alagad nagin hade ngunyan si Adonias maski dai mo naaaraman.

¹⁹Nagbuno siya nin dakul na baka, karnero, asin mga pinatabang torilyong baka. Inalok niya sa bangkete an saimong mga aking lalaki, an padi na si Abiatar, asin si Joab na pamayo kan saimong hukbo, alagad dai niya inalok an aki mong si Solomon.

²⁰Mahal na hade, an bilog na banwaan nin Israel naghahalat na sabihan mo kun siisay an masalihid saimo bilang hade.

²¹Kun dai mo gibohon iyan, ako asin an saimong aking si Solomon ibibilang na may sala pagkagadan mo.”

²²Nakikipag-olay pa siya sa hade kan mag-abot sa palasyo si Natan.

²³Pinaisi an hade na yaon duman si Natan; naglaog si Natan asin nagduko sa atubangan kan hade.

²⁴Dangan nagsabi si Natan, “Mahal na hade, ipinahayag mo na mananggad na masalihid saimo si Adonias bilang hade?

²⁵Ngunyan na aldaw naghale siya asin nag-atang nin dakul na baka, karnero, asin mga pinatabang torilyong baka. Inalok niya sa saiyang bangkete an gabos mong aking lalaki, si Joab na pamayo kan saimong hukbo, asin an padi na si Abiatar. Sa oras na ini, nagkakarakan asin nag-iirinom sinda sa kaibahan niya asin nagkukururahaw, ‘Mabuhay si Hadeng Adonias!’

²⁶Alagad dai niya ako inalok, ni an padi na si Zadok, ni si Benaias na aking lalaki ni Jehoiada o si Solomon.

²⁷Ipinagboot mo na mananggad an bagay na ini, mahal na hade, asin dai mo ipinaaram sa saimong mga opisyal kun siisay an masalihid saimo bilang hade?”

²⁸Nagsabi si Hadeng David, “Apodon nindo si Batsheba.” Luminaog si Batsheba asin nagtindog sa atubangan kan hade.

²⁹Dangan nagsabi saiya an hade, “Siring na buhay an Kagurangnan, na nagligtas sako sa gabos kong kaiwal, ako minasumpa

³⁰na ootobon ko ngunyan an panugang ginibo ko saimo sa ngaran nin Kagurangnan, an Dios nin Israel, na an saimong aking si Solomon iyo an masalihid sako bilang hade.”

³¹Nagduko si Batsheba asin nagsabi, “Mabuhay logod sagkod lamang an sakuyang hade na si David!”

³²Dangan ipinaapod ni Hadeng David si Zadok, si Natan, asin si Benaias. Kan maglaog sinda,

³³nagsabi an hade, “Ipag-iba nindo an sakong mga opisyal; pasakayon nindo an aki kong si Solomon sa sadiri kong mula asin ibahan nindo siya pasiring sa burabod nin Gihon.

³⁴Lalahidan siya duman ni Zadok asin ni Natan bilang hade nin Israel. Dangan patanogon nindo an trompeta asin magkurahaw kamong, ‘Mabuhay si Hadeng Solomon!’

³⁵Sumunod kamo saiya pagbalik niya digdi tanganing magtukaw siya sa sakong trono. Masalihid siya sako bilang hade, huli ta siya an sakong pinili na magin hade nin Israel asin Juda!”

³⁶Nagsimbag si Benaias, “Masusunod an saimong kabotan, asin patotoohan logod iyan nin Kagurangnan na saimong Dios!

³⁷Siring na an Kagurangnan nagin kaibahan kan sakong mahal na hade, ibahan man logod niya si Solomon asin gibohon na magin mas mauswag ki sa saimo an saiyang paghahade.”

³⁸Pinasakay sa mula ni Hadeng David si Solomon ni Zadok, ni Natan, ni Benaias asin kan mga bantay kan hade asin ipinag-iba ninda sa burabod nin Gihon.

³⁹Kinua sa Tabernakulo kan padi na si Zadok an laogan kan lana nin oliba asin linahidan si Solomon. Pinatanog ninda an trompeta asin kuminurahaw an gabos na tawo, “Mabuhay si Hadeng Solomon!”

⁴⁰Pakatapos, nagsurunod saiya pabalik an mga tawo. Nagkukururahaw sinda sa kaogmahan asin nagtuturugtog nin mga plawta, kaya natanyog an daga huli kan saindang ribok.

⁴¹An makosog na ribok na ini nadangog ni Adonias asin kan saiyang mga bisita kan matatapos na an saindang bangkete. Nadangog ni Joab an tanog kan trompeta asin naghapot siya, “Ano an kahulogan kan ribok na ini sa syudad?”

⁴²Nagtataram pa siya kan mag-abot si Jonatan na aking lalaki kan padi na si Abiatar. Nagsabi si Adonias. “Marahay kang tawo kaya sigurado man na marahay an dara mong bareta.”

⁴³“Bako,” an simbag ni Jonatan, “huli ta ginibo nang hade si Solomon kan satuyang hade na si David.

⁴⁴Pinaiba niya ki Solomon an padi na si Zadok, an propetang si Natan, si Benaias na aking lalaki ni Jehoiada, sagkod an mga bantay niya. Pinasakay ninda si Solomon sa mula kan hade,

⁴⁵dangan linahidan siya ni Zadok saka ni Natan duman sa burabod nin Gihon bilang hade. Inibahan ninda si Solomon pabalik sa syudad asin nagkukururahaw sa kaogmahan an mga tawo. Iyan an ribok na nadangog mo.

⁴⁶Si Solomon ngunyan an nakatukaw sa trono.

⁴⁷Laen pa kaiyan, nagsarabat an mga opisyal tanganing itao an saindang paggalang sa satuyang mahal na hade na si David. Nagsabi sinda, ‘Gibohon logod kan saimong Dios na an ngaran ni Solomon magin mas bantog ki sa saimong ngaran asin magin mauswag ki sa saimo an saiyang paghahade.’ Dangan nagduko sa pagsamba si Hadeng David mantang nasa saiyang higdaan

⁴⁸asin namibi, ‘Pag-omawon an Kagurangnan, an Dios nin Israel, huli ta ngunyan pinagmarahay niyang mahiling ko an saro kan sakong mga aki na nakatukaw sa sakong trono!’”

⁴⁹Dangan tarakot na nagtirindog an gabos na bisita ni Adonias asin saro-sarong nagharale.

⁵⁰Natakot si Adonias ki Solomon; nagdalagan siya pasiring sa altar asin pinugol an mga sungay kan altar.

⁵¹Igwa nin nagsabi ki Solomon, “Natatakot si Adonias saimo Mahal na Hade. Nakapugol siya sa mga sungay kan altar dangan nagsabi, ‘Kaipuhan magsumpa ngona sako si Hadeng Solomon na dai niya ako ipapagadan.’”

⁵²Nagsabi si Solomon, “Kun patunayan niyang saro siyang marahay na tawo, maski sarong buhok sa saiyang payo dai matatakdag sa daga; alagad kun bako, magagadan siya.”

⁵³Dangan nagsugo si Hadeng Solomon asin ibinaba ninda si Adonias hale sa altar. Nagdolok sa hade si Adonias saka duminuko sa atubangan niya. Sinabihan siya kan hade, “Pwede ka nang magpuli.”