Read Central Bicolano 1 Kings 12 Bible Online

1 Kings 12 - Central Bicolano bible

1 Kings 12

¹Nagduman sa Shekem si Rehoboam, huli ta nagtiripon duman an bilog na Israel tanganing gibohon siyang hade.

²Kan madangog ini ni Jeroboam na aking lalaki ni Nebat, na nagduman sa Egipto tanganing makadulag ki Hadeng Solomon, nagbalik siya hale sa Egipto.

³Ipinaapod si Jeroboam kan bilog na Israel, dangan sarabay sindang nagduman ki Rehoboam asin nagsabi,

⁴“Nagin makuri samo an saimong ama na si Solomon asin binugtakan kami nin magagabat na pasanon. Kun pagianon mo an mga pasanon na ini saka gibohon mo na masayon an buhay para sa samo, paglilingkodan mi ika.”

⁵Nagsimbag si Rehoboam, “Magbalik kamo pakalihis nin tolong aldaw asin itatao ko saindo an sakong simbag.” Kaya nagharale an mga tawo.

⁶Naghagad si Rehoboam nin hatol sa kamagurangan na naglingkod bilang mga parahatol sa saiyang ama na si Solomon. “Anong simbag an ihahatol nindo na sakuyang itao sa mga tawo?” an hapot niya.

⁷Nagsimbag sinda, “Kun boot mong paglingkodan an banwaan na ini, tawan mo nin marahay na simbag an kahagadan ninda asin maimbod sindang maglilingkod saimo sagkod lamang.”

⁸Alagad isinikwal niya an hatol na itinao saiya kan kamagurangan. Embes kaiyan, nagpahatol siya sa mga kapwa niya hoben na kasabay niyang nagdakula, asin ngunyan mga parahatol na niya.

⁹“Ano an dapat kong isimbag sa mga tawong ini na nagsabi sako na pagianon ko an pasan na ibinugtak sainda kan sakong ama?” an hapot niya. “Ano an sasabihon ko sa mga tawong nakikimaherak sako na inaan ko an gabat kan saindang pasan?”

¹⁰Nagsimbag sinda, “Iyo ini an isabi mo sainda: ‘An sakong gigis mas mahibog ki sa habayan kan sakong ama!

¹¹Binugtakan kamo kan sakong ama nin magabat na pasanon; orog ko ining pagagabaton. An sakong ama naggamit saindo nin badas; alagad gagamiton ko saindo an pamakol na may tonok!’”

¹²Pakalihis nin tolong aldaw, si Jeroboam asin an gabos na tawo nagbalik ki Hadeng Rehoboam siring kan sinabi sainda kaini.

¹³Isinikwal kan hade an hatol kan kamagurangan asin maisog na nagtaram sa banwaan.

¹⁴Siring kan hatol kan mga hoben na lalaki, nagsabi siya, “Binugtakan kamo kan sakong ama nin magabat na pasanon; orog ko ining pagagabaton. Naggamit siya saindo nin badas; gagamiton ko saindo an pamakol na may tonok!”

¹⁵Kaya dai naghinanyog sa banwaan an hade, huli ta iyo ini an kabotan kan Kagurangnan tanganing maotob an itinaram niya ki Jeroboam na aking lalaki ni Nebat huli ki Propeta Ahias na taga Shilo.

¹⁶Kan mahiling kan mga tawo na habong maghinanyog sainda an hade, nagkurahaw sinda, “Ano an samong kahirasan ki David? Dai kami nin pamana sa aking lalaki ni Jesse. Bumalik kamo sa saindong mga tolda, O Israel! Atamana ngunyan an sadiri mong harong, O David.” Kaya nagbaralik sa saindang mga tolda an mga Israelita.

¹⁷Alagad pinaghadean ni Rehoboam an mga tawong nag-eerok sa teritoryo nin Juda.

¹⁸Dangan pinaduman ni Rehoboam sa mga Israelita si Adoniram, an namamahala kan pirit na pagpatrabaho, alagad ginapo ninda siya sagkod na magadan. Huli kaini, hidaling naglunad si Rehoboam sa saiyang karwahe asin nagdulag pasiring sa Jerusalem.

¹⁹Magpoon kaidto sagkod ngunyan nagin rebelde an Israel laban sa paghahade kan kapagarakian ni David.

²⁰Kan madangog kan bilog na Israel na nagbalik si Jeroboam hale sa Egipto, ipinaapod ninda siya sa katiriponan kan banwaan, asin ginibo siyang hade nin Israel. An tribu sana ni Juda an nagdanay na maimbod sa kapagarakian ni David.

²¹Kan mag-abot sa Jerusalem si Rehoboam, tinipon niya an syento otsenta mil na mga piling soldados gikan sa mga tribu ni Juda saka ni Benjamin. Boot niyang labanan an mga tribu nin Israel sa amihan tanganing mapasaiya giraray an kahadean.

²²Alagad tinaraman nin Dios si Propeta Semaias

²³na itao an mensaheng ini ki Rehoboam asin sa gabos na kaayon sa tribu ni Juda saka ni Benjamin:

²⁴“Dai nindo pagsalakayon an sadiri nindong kadugo, an banwaan nin Israel. Magbaralik kamo sa saindong harong huli ta kabotan ko an nangyayari.” Nagkuyog sinda gabos sa pagboot nin Kagurangnan; nagpuli sinda sa saindang mga erokan.

²⁵Pinakosog ni Jeroboam an Shekem sa mabulod na daga nin Efraim asin nag-erok siya duman. Dangan naghale siya asin pinakosog an banwa nin Penuel.

²⁶Nagsaboot siya, “Sa kamugtakan na ini ngunyan, kun an sakong banwaan magtukad sa Jerusalem asin magdolot nin mga sakripisyo sa Templo nin Kagurangnan, an puso kan banwaan na ini mabirik ki Rehoboam na hade nin Juda asin gagadanon ninda ako.”

²⁸Pakahorophoropa niya kaini, guminibo siya nin duwang bulawan na torong baka dangan sinabihan an saiyang banwaan, “Haloy na kamong nagpaparatukad sa Jerusalem tanganing magsamba. Banwaan nin Israel, uya an saindong mga dios na nagluwas saindo sa Egipto!”

²⁹An saro sa mga bulawan na baka ibinugtak niya sa Betel asin an saro sa Dan.

³⁰Kaya nagkasala an mga tawo huli ta nagduman sinda sa Betel tanganing sambahon an sarong baka, asin nagduman sinda sa Dan tanganing sambahon an saro pa.

³¹Si Jeroboam naggibo man nin mga lugar na pagsasambahan sa kabubuldan, asin nagpili siya nin mga pading gikan sa mga pamilya na bakong kaayon sa tribu ni Levi.

³²Nagselebrar man si Jeroboam nin sarong pyesta kan ikakinseng aldaw kan ikawalong bulan, siring kan pyesta sa Juda. Sa ibabaw kan altar duman sa Betel, nagdolot siya nin mga sakripisyo sa mga bulawan na baka na saiyang ginibo. Ibinugtak niya sa Betel an mga padi na naglilingkod sa mga altar na pagsasambahan na saiyang ginibo.

³³Kan ikakinseng aldaw kan ikawalong bulan, an aldaw na siya mismo an nagtalaan, nagduman siya sa Betel asin nagdolot nin sakripisyo sa altar sa pagselebrar kan pyesta na saiyang minukna para sa banwaan nin Israel.