Read Central Bicolano 1 Kings 13 Bible Online

1 Kings 13 - Central Bicolano bible

1 Kings 13

¹Sa pagboot nin Kagurangnan, sarong propetang gikan sa Juda an nagpasiring sa Betel. Nag-abot siya duman mantang nakatindog si Jeroboam sa atubang kan altar tanganing magtutong nin insenso.

²Dangan sa pagkuyog kan kabotan nin Kagurangnan, nagkurahaw an propeta laban sa altar: “O altar, iyo ini an itinataram nin Kagurangnan: ‘Sarong aking lalaki, na Josias an magigin ngaran, an mamumundag sa pamilya ni David. Isasakripisyo niya sa ibabaw mo an mga padi na naglilingkod sa paganong mga altar na nagdodolot nin mga sakripisyo sa ibabaw mo; tututongon niya sa ibabaw mo an mga tolang nin tawo.’”

³Dangan sarong tanda an itinao kan propeta kan aldaw man sanang iyan, “Ini an tanda na itinaram nin Kagurangnan: ‘Magagaba an altar na ini, asin mauula an mga abo na nasa ibabaw kaini.’”

⁴Kan madangog ini ni Hadeng Jeroboam, itinuro niya an propeta dangan nagboot, “Dakopon an tawong iyan!” An takyag na inunat kan hade naparalisar tolos, kaya dai na niya ini ikinababa.

⁵Biglang nagaba an altar asin naula an mga abo, sosog sa tanda na itinao kan propeta huli sa tataramon nin Kagurangnan.

⁶Nagsabi si Hadeng Jeroboam sa propeta, “Ipakimaherak mo ako sa Kagurangnan na saimong Dios, asin ipamibi na maomayan an sakong takyag!” Nakimaherak sa Kagurangnan an propeta asin naomayan an takyag kan hade.

⁷Dangan nagsabi an hade sa propeta, “Umiba ka sako sa harong ko tanganing makakakan ka. Babalosan taka huli kan saimong ginibo.”

⁸Nagsimbag an propeta, “Maski pa itao mo sako an kabanga kan saimong kayamanan, dai ako maiba saimo; dai ako makakan nin tinapay o mainom nin tubig sa lugar na ini.

⁹Pinagbotan ako nin Kagurangnan na dai magkakan nin tinapay, ni mag-inom nin tubig o ni magbalik papuli na mag-agi sa parehong dalan.”

¹⁰Kaya an propeta dai nag-agi sa dalan na inagihan niya pasiring sa Betel, kundi nag-agi sa ibang dalan.

¹¹Kan panahon na iyan, may sarong gurang na propeta na nag-eerok sa Betel. Nag-abot an saiyang mga aking lalaki asin ibinareta saiya an gabos na ginibo sa Betel kan aldaw na iyan kan propetang gikan sa Juda; ibinareta man ninda sa saindang ama an manongod sa sinabi kan propeta sa hade.

¹²Naghapot an saindang ama, “Saen siya nag-agi kan siya maghale?” Itinukdo saiya kan mga aking lalaki an inagihan kan propetang gikan sa Juda.

¹³“Kamaderohan nindo an asno para sako,” an sabi kan gurang na propeta sa saiyang mga aki. Kinamaderohan ninda an asno asin naglunad digdi an propeta.

¹⁴Linamag niya an propetang gikan sa Juda asin inabotan niya ining nakatukaw sa limpoy nin sarong kahoy na hamurawon. “Ika an propetang gikan sa Juda?” an hapot niya. “Iyo,” an simbag kan lalaki.

¹⁵“Umiba ka sako sa harong asin sabayan mo ako sa pagkakan,” an sabi niya.

¹⁶Alagad nagsimbag an propetang gikan sa Juda, “Dai ako pwedeng mag-iba sa saimong harong, o mag-ako kan saimong marahay na boot. Dai man ako pwedeng magkakan o mag-inom nin anoman digdi,

¹⁷huli ta pinagbotan ako nin Kagurangnan na dai magkakan o mag-inom, o magbalik papuli na mag-agi sa parehong dalan.”

¹⁸Dangan nagsabi saiya an gurang na propeta, “Propeta man akong arog saimo, asin sinabihan ako nin sarong anghel huli sa pagboot nin Kagurangnan na ipag-iba taka sa sakong harong tanganing pakakanon asin painomon.” Alagad nagpuputik an gurang na propeta.

¹⁹Kaya nag-iba saiya an propetang gikan sa Juda. Nagkakan siya asin nag-inom sa harong kan gurang na propeta.

²⁰Mantang nagkakakan sinda, an tataramon nin Kagurangnan uminabot sa gurang na propeta,

²¹asin sinabihan niya an propetang gikan sa Juda, “An Kagurangnan nagtataram na dai mo siya kinuyog asin dai mo ginibo an saiyang pagboot.

²²Embes kaiyan, nagbalik ka saka nagkakan asin nag-inom sa lugar na ipinangalad saimo. Huli kaini magagadan ka, asin an hawak mo dai ilulubong sa lulubngan kan saimong mga ginikanan.”

²³Kan tapos na sindang magkakan, kinamaderohan kan gurang na propeta an sarong asno para sa propetang gikan sa Juda.

²⁴Naghale na siya, asin sa dalan sinabat siya saka ginadan nin sarong leon. Nakatapok sa dalan an saiyang bangkay asin nagtindog sa kataed kaini an asno saka an leon.

²⁵Nag-agi an nagkapirang lalaki asin nahiling ninda an bangkay sa dalan, siring man an nakatindog na leon. Nagpadagos sinda sa Betel dangan ibinareta an saindang nahiling.

²⁶Kan madangog ini kan gurang na propeta, nagsabi siya, “Siya an propeta na naglapas kan pagboot nin Kagurangnan! Itinao siya nin Kagurangnan sa leon na ruminonot saka guminadan saiya bilang kaotoban kan tataramon saiya nin Kagurangnan.”

²⁷Dangan nagsabi siya sa saiyang mga aking lalaki, “Kamaderohan nindo an sakong asno.” Kan magibo ninda ini,

²⁸naghale an gurang na propeta. Nakua niya an bangkay sa tahaw kan dalan. Nakatindog sa kataed kan bangkay an asno saka an leon. Dai kinakan kan leon an bangkay asin dai man sinalakay an asno.

²⁹Binuhat kan gurang na propeta an bangkay, ilinunad sa asno, dangan ibinalik sa Betel tanganing pagmondoan asin ilubong.

³⁰Ilinubong niya an bangkay sa sadiri niyang lulubngan; nagmondo sinda para saiya, na an sabi, “O sakong tugang!”

³¹Pakalubong, sinabihan kan propeta an saiyang mga aking lalaki, “Kun ako magadan, ilubong nindo ako sa lulubngan na ini; ibugtak nindo an sakong bangkay sa kataed niya.

³²Mapapatotoohan an mga tataramon na, sa pagboot nin Kagurangnan, sinabi niya laban sa altar sa Betel asin laban sa gabos na altar na pagsasambahan sa mga banwa nin Samaria.”

³³Dai man giraray nagbakle si Hadeng Jeroboam nin Israel sa saiyang maraot na mga gibo. Nagpadagos siya sa pagpili nin mga padi na gikan sa ordinaryong mga pamilya tanganing maglingkod sa mga altar na saiyang itinugdok. Kinonsagra niya bilang padi an siisay man na boot magin padi.

³⁴An kasalan niyang ini an nagin dahelan kan pagkaraot asin pagkapuho kan paghahade kan saiyang pamilya.