Read Central Bicolano 1 Kings 14 Bible Online

1 Kings 14 - Central Bicolano bible

1 Kings 14

¹Kan panahon na iyan, naghelang si Abias na aking lalaki ni Hadeng Jeroboam.

²Sinabihan ni Jeroboam an saiyang agom, “Magsagin-sagin kang bako kong agom tanganing dai nin makamidbid saimo, asin magduman ka sa Shilo. Magduman ka ki Ahias, an propetang nagsabi na magigin hade ako sa Israel.

³Magdara ka nin sampolong tinapay, nagkapirang biskwit, asin sarong dulay na pano nin dugos. Hapoton mo siya kun ano an mangyayari sa satong aki asin sasabihan ka niya.”

⁴Kaya nagduman an agom ni Jeroboam sa harong ni Ahias sa Shilo. Dai na nakakahiling si Ahias huli ta gurang na siyang marahay.

⁵Sinabihan siya nin Kagurangnan na maabot an agom ni Jeroboam tanganing maghapot manongod sa saiyang aking lalaki na naghehelang. Tinaraman nin Kagurangnan si Ahias kan sasabihon niya. Pag-abot kan agom ni Jeroboam, nagsagin-sagin siya na ibang babae.

⁶Alagad kan madangog ni Ahias na palaog na siya sa pintoan, nagsabi si Ahias, “Dagos, agom ni Jeroboam. Tadaw ta nagsasagin-sagin ka? Igwa ako nin maraot na bareta para saimo.

⁷Bumalik ka asin sabihan mo si Jeroboam kan tataramon na ini para sa saiya kan Kagurangnan, an Dios nin Israel: ‘Pinili taka sa kadaklan, asin ginibong pamayo kan sakong banwaan na Israel.

⁸Kinua ko an kahadean sa kapagarakian ni David asin itinao saimo. Alagad dai ka nagin arog ki David na sakong sorogoon, na nagkuyog kan sakong mga kabotan asin nagsunod sako sa bilog niyang puso, na naggibo sana kan matanos sa sakong atubang.

⁹Dinaog mo sa paggibo nin karatan an mga naenot nang naghade saimo. Isinikwal mo ako asin pinaanggot huli sa paggibo mo nin mga dios-dios asin mga ladawan na metal tanganing pagsambahon.

¹⁰Huli kaini, dadarahan ko nin karatan an saimong harong asin gagadanon ko an gabos na lalaking kapagarakian mo, hoben man o gurang. Tutunawon ko an saimong harong, siring sa ginigibong pagtutong nin sarong lalaki sa odo sagkod na maubos iyan.

¹¹An siisay man na kaayon sa saimong pamilya na magadan sa syudad, kakakanon kan mga ayam, asin an magadan sa kahiwasan kakakanon kan mga bwitre. Ako, an Kagurangnan, an nagtaram!’”

¹²“Magpuli ka na,” padagos ni Ahias. “Pakalaog mo sa banwa, magagadan an saimong aki.

¹³Pagmomondoan siya kan bilog na Israel asin ilulubong ninda siya. Sa pamilya ni Jeroboam, siya sana an ilulubong nin maninigo, huli ta siya sana an nawiwilihan nin Kagurangnan, an Dios nin Israel.

¹⁴An Israel bubugtakan nin Kagurangnan nin sarong hade na matapos kan paghahade ni Jeroboam.

¹⁵Papadusahan nin Kagurangnan an Israel asin tatakigan ini arog sa nayuyugyog na bariw sa sarong sapa. Gagaboton niya an banwaan nin Israel sa marahay na dagang ini na itinao niya sa saindang mga ginikanan, asin iwawarak niya sinda sa ibong kan Salog nin Eufrates, huli ta pinaanggot ninda siya sa paagi kan paggibo nin mga ladawan kan diosang si Asera.

¹⁶Papabayaan nin Kagurangnan an Israel huli ta nagkasala si Jeroboam asin pinapagkasala niya an banwaan nin Israel.”

¹⁷Hidaling naghale an agom ni Jeroboam, asin nagpuli sa Tirza. Pakalaog niya sa pintoan kan saiyang harong, nagadan an saiyang aki.

¹⁸Pinagmondoan siya kan bilog na Israel asin ilinubong sosog sa itinaram nin Kagurangnan sa paagi kan saiyang sorogoon, an propetang si Ahias.

¹⁹An iba pang mga gibo ni Jeroboam, an saiyang pakigera asin an saiyang paghahade gabos nasusurat sa An Kasaysayan kan mga Hade nin Israel.

²⁰Beynte y dos na taon siyang naghade. Nagadan siya asin ilinubong dangan an aki niyang si Nadab iyo an nagsalihid saiya bilang hade.

²¹Naghade sa Juda si Rehoboam na aking lalaki ni Solomon. Kwarenta y unong taon an saiyang edad kan magpoon siyang maghade asin dyes y syeteng taon siyang naghade sa Jerusalem, an syudad na pinili nin Kagurangnan hale sa gabos na teritoryo nin Israel, tanganing duman siya pagsambahon. An ina ni Rehoboam iyo si Naama na taga Ammon.

²²Nagkasala an banwaan nin Juda tumang sa Kagurangnan, asin orog an saindang ginibong kasalan na nagpaanggot sa Kagurangnan ki sa mga ginibo kan gabos nindang ginikanan.

²³Nagtugdok sinda nin mga altar para sa saindang mga dios-dios, asin nagpatindog nin mga harigi saka mga simbolo ni Asera sa ibabaw kan mga bulod saka sa limpoy nin mga kahoy.

²⁴Igwa man nin mga lalaking naggigibo nin karigsokan sa mga altar na pagsasambahan. Ginibo kan banwaan nin Juda an gabos na makasosopog na bagay na gibo kan mga tawong inalaw nin Kagurangnan kan an mga Israelita nagdangadang sa daga.

²⁵Kan ikalimang taon kan paghahade ni Rehoboam, sinalakay ni Hadeng Sisak nin Egipto an Jerusalem.

²⁶Kinua niya an gabos na kayamanan sa Templo asin sa palasyo, sagkod an mga kalasag na bulawan na ginibo ni Solomon.

²⁷Rinibayan ini ni Hadeng Rehoboam nin mga kalasag na bronse asin pinaingatan sa mga opisyal na nagbabantay kan mga trangkahan kan palasyo.

²⁸Sa lambang pagduman kan hade sa Templo, dinadara kan mga bantay an mga kalasag dangan ibinabalik ninda sa saindang pinag-eerokan.

²⁹An iba pang ginibo ni Rehoboam gabos nasusurat sa An Kasaysayan kan mga Hade nin Juda.

³⁰Kan panahon na iyan, danay na naglalaban si Rehoboam asin si Jeroboam.

³¹Nagadan si Rehoboam asin ilinubong sa lulubngan kan mga hade sa Syudad ni David. (An saiyang ina iyo si Naama na taga Ammon.) An aki niyang si Abias iyo an nagsalihid saiya bilang hade.