Read Central Bicolano 1 Kings 16 Bible Online

1 Kings 16 - Central Bicolano bible

1 Kings 16

¹Nagtaram an Kagurangnan ki Propeta Jehu na aking lalaki ni Hanani asin itinao saiya an mensaheng ini para ki Baasa:

²“Ilinangkaw taka hale sa alpog asin ginibong lider kan banwaan kong Israel. Alagad nagkasala ka arog ki Jeroboam. Pinapagkasala mo man an sakong banwaan asin pinaanggot mo ako huli kan saindang mga kasalan.

³Kaya isisikwal taka asin an saimong pamilya, arog kan ginibo ko ki Jeroboam.

⁴An siisay man sa saimong pamilya na magadan sa syudad kakakanon kan mga ayam, asin an siisay man na magadan sa oma kakakanon kan mga bwitre.”

⁵An iba pang ginibo ni Baasa asin an gabos niyang kaisogan nasusurat sa An Kasaysayan kan mga Hade nin Israel.

⁶Nagadan si Baasa asin ilinubong sa Tirza. An aki niyang lalaki na si Ela iyo an nagsalihid saiya bilang hade.

⁷An mensahe nin Kagurangnan laban ki Baasa asin sa saiyang pamilya nag-abot sa paagi ni Propeta Jehu huli kan mga kasalan ni Baasa na ginibo niya tumang sa Kagurangnan. Pinaanggot ni Baasa an Kagurangnan bako sana huli ta nagkasala siya siring kan ginibo ni Jeroboam, kundi huli ta ginadan niya an bilog na pamilya ni Jeroboam.

⁸Kan ikabeynte y seis na taon kan paghahade ni Asa sa Juda, nagin hade nin Israel si Ela na aking lalaki ni Baasa, asin naghade siya sa Tirza sa laog nin duwang taon.

⁹Alagad pinasaluiban siya ni Zimri na pamayo kan kabanga kan saiyang hukbo na nagsasakay sa mga karwahe. Sarong aldaw duman sa Tirza, mantang nagbuburat si Ela sa harong ni Arza na namamahala kan palasyo,

¹⁰naglaog sa harong si Zimri asin ginadan si Ela. Dangan siya na an nagsalihid ki Ela bilang hade. Nangyari ini kan ikabeynte y syeteng taon kan paghahade ni Hadeng Asa sa Juda.

¹¹Pakatukaw ni Zimri sa trono, ginadan niya tolos an gabos na kaayon sa pamilya ni Baasa; dai niya tinadaan si Baasa nin maski sarong lalaking kadugo saka katood.

¹²Kaya sosog sa sinabi nin Kagurangnan laban ki Baasa sa paagi ni Propeta Jehu, ginadan ni Zimri an gabos sa pamilya ni Baasa.

¹³An Kagurangnan, an Dios nin Israel, pinaanggot ni Baasa asin kan aki niyang lalaki na si Ela huli ta nagsamba sinda sa mga dios-dios asin huli ta pinapagkasala ninda an Israel.

¹⁴An iba pang ginibo ni Ela nasusurat sa An Kasaysayan kan mga Hade nin Israel.

¹⁵Kan ikabeynte y syeteng taon kan paghahade ni Asa sa Juda, naghade si Zimri sa Israel duman sa Tirza sa laog nin pitong aldaw. Sinasalakay kaidto kan mga soldados nin Israel an syudad nin Gibbeton sa Filistia,

¹⁶asin kan madangog ninda na pinasaluiban saka ginadan ni Zimri an hade, ipinahayag ninda kan aldaw na idto duman sa kampo bilang hade sa Israel si Omri, an pamayo kan hukbo.

¹⁷Binayaan ni Omri asin kan saiyang mga soldados an Gibbeton asin sinalakay an Tirza.

¹⁸Kan mahiling ni Zimri na nasakop an syudad, nagduman siya sa bantayan kan palasyo, sinulo an palasyo asin nagadan siya sa kalayo.

¹⁹Nangyari ini huli kan saiyang mga kasalan sa Kagurangnan. Arog ki Jeroboam, pinaanggot niya an Kagurangnan huli kan sadiri niyang mga kasalan asin huli ta pinapagkasala niya an Israel.

²⁰An iba pang ginibo ni Zimri, saka an ginibo niyang kapasaluiban, gabos nasusurat sa An Kasaysayan kan mga Hade nin Israel.

²¹Nabanga an mga tawo sa Israel: an iba sainda boot na gibohon na hade si Tibni na aking lalaki ni Ginat, mantang an iba oyon ki Omri.

²²Nanggana an mga kampi ki Omri; nagadan si Tibni kaya si Omri an nagin hade.

²³Kan ikatreynta y unong taon kan paghahade ni Asa sa Juda, nagin hade sa Israel si Omri asin naghade siya sa laog nin doseng taon. Sa enot na anom na taon, duman siya naghade sa Tirza.

²⁴Dangan binakal niya an bulod nin Samaria sa halagang anom na ribong pedaso nin plata sa sarong lalaki na an ngaran Semer. An bulod pinapusog ni Omri, tinugdokan nin sarong banwa, asin nginaranan niyang Samaria, sosog sa ngaran ni Semer na dating kagsadiri kan bulod.

²⁵Orog an nagin kasalan ni Omri sa Kagurangnan ki sa arin man kan mga naenot saiya.

²⁶Arog ki Jeroboam na naenot saiya, pinaanggot niya an Kagurangnan, an Dios nin Israel, huli kan saiyang mga kasalan asin huli ta pinapagkasala niya an Israel saka pinasamba sa mga dios-dios.

²⁷An iba pang ginibo ni Omri saka an ipinahiling niyang kaisogan gabos nasusurat sa An Kasaysayan kan mga Hade nin Israel.

²⁸Nagadan si Omri saka ilinubong sa Samaria. Nagsalihid saiya bilang hade an aki niyang lalaki na si Ahab.

²⁹Kan ikatreynta y otsong taon kan paghahade ni Asa sa Juda, nagin hade sa Israel si Ahab na aking lalaki ni Omri. Naghade siya sa Samaria sa laog nin beynte y dos na taon.

³⁰Nagkasala siya sa Kagurangnan nin orog pa ki sa arin man kan mga naenot saiya.

³¹Bako sanang nagkasala si Ahab arog ki Jeroboam, kundi inagom pa niya si Jezebel na aking babae ni Hadeng Etbaal nin Sidon dangan nagsamba siya ki Baal.

³²Nagtugdok siya nin templo sa Samaria, naggibo nin altar para ki Baal, dangan ibinugtak idto sa laog kan templo.

³³Nagpatindog man siya nin ladawan kan diosang si Asera. Mas dakul an ginibo niyang nakapaanggot sa Kagurangnan, an Dios nin Israel, ki sa mga ginibo kan mga naenot saiyang hade sa Israel.

³⁴Kan panahon ni Ahab, an Jerico pinatindog giraray ni Hiel na taga Betel. Sosog sa sinabi nin Kagurangnan sa paagi ni Josue na aking lalaki ni Nun, nagadan an mga aking lalaki ni Hiel: an matua niyang aking lalaki na si Abiram nagadan kan ibugtak niya an pundasyon kan Jerico, asin an saiyang ngohod na aking lalaki na si Segub kan patindogon niya an mga trangkahan.