Read Central Bicolano 1 Kings 17 Bible Online

1 Kings 17 - Central Bicolano bible

1 Kings 17

¹Sinabihan si Ahab ni Propeta Elias na taga Tisbe sa Gilead, “Sa ngaran nin Kagurangnan, an buhay na Dios nin Israel, na sakong pinaglilingkodan, sinasabihan taka na dai magkakaigwa nin ambon ni uran sa masunod na duwa o tolong taon sagkod na sabihon ko.”

²Dangan tinaraman nin Kagurangnan si Elias,

³“Bayaan mo an lugar na ini. Magduman ka sa sirangan asin magtago sa may Sapa nin Kerit, sa sirangan kan Jordan.

⁴An sapa an matao saimo nin tubig na iinomon, asin pinagbotan ko na an mga uwak na darahan ka duman nin pagkakan.”

⁵Kinuyog ni Elias an pagboot nin Kagurangnan; naglakaw siya saka nag-ontok sa may Sapa nin Kerit.

⁶Aga-hapon igwa nin mga uwak na nagdadara saiya nin pagkakan na tinapay saka karne. Nag-inom siya kan tubig sa sapa.

⁷Dai nahaloy, nagmara an sapa huli ta dai nag-uran sa daga.

⁸Dangan tinaraman nin Kagurangnan si Elias,

⁹“Dumuman ka ngunyan sa Sarepta, na sarong banwa sa Sidon, asin mag-ontok ka duman. Pinagbotan ko an sarong babaeng balo duman na pakakanon ka.”

¹⁰Kaya nagduman si Elias sa Sarepta, asin kan mag-abot siya sa trangkahan kan banwa, nahiling niya an sarong babaeng balo na namumurot nin igatong. Sinabihan niya an balo, “Darahi ako nin tubig na maiinom.”

¹¹Kan mahale na an balo tanganing magkua nin tubig, inapod siya ni Elias, “Darahan mo man ako nin nagkapirang tinapay.”

¹²Nagsimbag an balo, “Minasumpa ako sa ngaran kan buhay na Kagurangnan na saimong Dios na mayo ako nin tinapay. Igwa na sana ako nin sarong gugom na arina sa mangko saka kadikit na lana nin oliba sa dulay. Nagdigdi ako tanganing mamurot nin nagkapirang igatong na dadarahon ko pabalik sa harong, dangan aandamon ko an kadikit na pagkakan para sako asin para sa sakong aking lalaki. Huring pagkakan mi na iyan, dangan magagadan na kami sa gutom.”

¹³“Dai ka mahadit,” an sabi saiya ni Elias. “Magpuli ka na dangan andamon mo an saimong pagkakan. Alagad gumibo ka ngona nin sadit na tinapay asin darahon mo sako dangan andamon mo an natada para sa saimo asin sa saimong aking lalaki.

¹⁴Huli ta ini an sinasabi nin Kagurangnan, an Dios nin Israel: ‘Dai mauubosan nin arina an mangko asin dai mauubosan nin lana an dulay bago ako, an Kagurangnan, magpadara nin uran.’”

¹⁵Naghale an babaeng balo asin ginibo an sinabi saiya ni Elias. Dai sinda nawaraan nin pagkakan sa laog nin dakul na aldaw.

¹⁶Sosog sa panuga nin Kagurangnan sa paagi ni Elias, an mangko dai naubosan nin arina asin dai naubosan nin lana an dulay.

¹⁷Pakalihis nin nagkapirang aldaw, naghelang an aking lalaki kan balo. Nag-orog an saiyang kamatean sagkod na siya nagadan.

¹⁸Sinabihan kan babaeng balo si Elias, “Sorogoon nin Dios, tadaw ta ginibo mo ini sako? Nagdigdi ka daw tanganing ipagiromdom sa Dios an sakong mga kasalan asin magin dahelan kan pagkagadan kan sakong aking lalaki?”

¹⁹“Itao mo sako an aki,” an sabi ni Elias. Kinua niya sa ina an aking lalaki, dinara sa itaas, sa kwartong pinagkakatorogan niya, asin hinulid sa saiyang higdaan.

²⁰Dangan makosog na namibi si Elias, “O Kagurangnan na sakong Dios, tadaw ta tinawan mo nin siring na mangirhat na kasakitan an babaeng balo? Inataman niya ako, dangan ngunyan ginadan mo an aki niyang lalaki!”

²¹Tolong beses na dinapaan ni Elias an aking lalaki asin namibi, “O Kagurangnan na sakong Dios, itugot mong mabuhay giraray an aking ini!”

²²Sinimbag nin Kagurangnan an pamibi ni Elias; nagpoon paghangos an aki asin naomayan.

²³Ilinusad ni Elias an aki dangan itinao sa ina. Sinabihan niya an balo, “Hilinga, buhay an saimong aki.”

²⁴Nagsimbag an babae, “Ngunyan aram ko na saro kang sorogoon nin Dios asin an Kagurangnan nagtataram sa paagi mo!”