Read Central Bicolano 1 Kings 19 Bible Online

1 Kings 19 - Central Bicolano bible

1 Kings 19

¹Ibinareta ni Ahab ki Jezebel an gabos na ginibo ni Elias asin kun paano kaini ginadan an mga propeta ni Baal.

²Dangan pinadarahan ni Jezebel si Elias nin mensahe: “Gadanon logod ako kan mga dios kun sa siring kaining oras sa aga dai ko gibohon saimo an bagay na ginibo mo sa mga propeta.”

³Natakot si Elias, kaya ipinag-iba niya an saiyang sorogoon asin nagdulag siya pasiring sa Beer-sheba sa Juda. Iwinalat duman ni Elias an saiyang sorogoon,

⁴dangan bilog na aldaw siyang naglakaw pasiring sa kalangtadan. Nag-ontok siya sa sarong kahoy, nagtukaw sa sirong kaini saka nagmawot na magadan. “Tama na Kagurangnan,” an pamibi niya. “Kuahon mo na ako; mas marahay pa sako an magadan!”

⁵Naghigda siya sa sirong kan kahoy asin mantang natotorog, sarong anghel an nagtikwil saiya saka nagsabi, “Bangon asin kakan!”

⁶Nangalag-kalag si Elias, asin sa saiyang pamayohan nahiling niya an sarong tinapay saka sarong dulay na tubig. Nagkakan siya saka nag-inom dangan naghigda giraray.

⁷Nagbalik an anghel sa ikaduwang beses, tinikwil giraray si Elias asin nagsabi, “Bangon asin kakan, ta tibaad dai ka makatagal sa saimong paglakaw.”

⁸Nagbangon si Elias, nagkakan saka nag-inom, dangan sa kosog na itinao kan pagkakan na idto, naglakaw siya sa laog nin kwarentang aldaw saka kwarentang banggi pasiring sa Sinai, an bukid nin Dios.

⁹Naglaog siya sa sarong lungib tanganing duman na magpaaga. Biglang nagtaram an Kagurangnan saiya, “Elias, ano an ginigibo mo digdi?”

¹⁰Nagsimbag si Elias, “Dakula an pagmakulog ko para saimo Kagurangnan, Dios nin mga hukbo. Linapas kan banwaan nin Israel an saimong tipan, ginaba ninda an saimong mga altar asin ginadan an saimong mga propeta. Ako na sana an natatada asin hinahanap ninda ako tanganing gadanon.”

¹¹Nagtaram an Kagurangnan, “Luwas asin tindog sa alitoktok kan bukid sa atubangan ko.” Dangan nag-agi an Kagurangnan asin sarong makosog na doros an nagbanga kan kabukidan asin nagparasa kan kagapoan, alagad mayo sa doros an Kagurangnan. Nag-ontok sa paghuyop an doros, dangan nagkaigwa nin linog, alagad mayo sa linog an Kagurangnan.

¹²Pakatapos kan linog nagkaigwa nin sarong kalayo, alagad mayo sa kalayo an Kagurangnan. Dangan pakatapos kan kalayo nadangog niya an sarong maluway na tingog.

¹³Kan madangog ini ni Elias, tinahoban niya an saiyang lalawogon kan saiyang alikboy dangan nagluwas siya saka nagtindog sa pintoan kan lungib. Sarong tingog an nagsabi saiya, “Elias, ano an ginigibo mo digdi?”

¹⁴Nagsimbag siya, “Dakula an pagmakulog ko para saimo, Kagurangnan, Dios nin mga hukbo. Linapas kan banwaan nin Israel an saimong tipan, ginaba ninda an saimong mga altar asin ginadan an saimong mga propeta. Ako na sana an natatada asin hinahanap ninda ako tanganing gadanon.”

¹⁵Nagsabi an Kagurangnan, “Bumalik ka sa kalangtadan na harani sa Damasco, dangan lumaog ka sa syudad saka lahidan mo si Hazael bilang hade nin Siria;

¹⁶lahidan mo si Jehu na aking lalaki ni Nimsi bilang hade nin Israel, asin lahidan mo si Eliseo na aking lalaki ni Safat na taga Abel-mehola bilang propeta na masalihid saimo.

¹⁷An makadulag sa espada ni Hazael gagadanon ni Jehu; an makadulag sa espada ni Jehu gagadanon ni Eliseo.

¹⁸Alagad matada ako nin pitong ribo katawo sa Israel—an mga dai nagluhod ki Baal saka dai naghadok saiya.”

¹⁹Naghale si Elias asin nakua niya si Eliseo na nag-aarado; igwa nin onseng pades na torong baka sa enotan niya, asin yaon siya sa ikadoseng pades. Hinuba ni Elias an saiyang alikboy asin inalikboy ki Eliseo.

²⁰Binayaan ni Eliseo an saiyang mga baka, linamag si Elias asin nagsabi, “Tugote akong magpaaram ngona sa sakong ama saka ina, dangan masunod ako saimo.” Nagsimbag si Elias, “Magpuli ka. Dai taka pinupugolan.”

²¹Nagbalik si Eliseo dangan kinua an sarong pades na torong baka, binuno an mga ini, asin linuto an karne. Ginamit niyang igatong an mga sakal kan mga toro. An karne itinao niya sa mga tawo asin nagkakan sinda. Pakatapos nagsunod siya ki Elias asin naglingkod saiya.