Read Central Bicolano 1 Kings 2 Bible Online

1 Kings 2 - Central Bicolano bible

1 Kings 2

¹Kan madali nang magadan si David, inapod niya an aki niyang si Solomon asin itinao niya saiya an huring mga togon:

²“Magagadan na ako. Magmakosog asin magpakalalaki ka.

³Giboha an anoman na ipagboot saimo nin Kagurangnan na saimong Dios. Kuyogon mo an gabos niyang togon asin pagboot, siring sa nasusurat sa Togon ni Moises, tanganing minsan saen ka man magduman mag-uswag ka sa gabos mong gibo.

⁴Kun kukuyogon mo siya, ootobon nin Kagurangnan an panugang ginibo niya sako: ‘Kun magigin maimbod sako an saimong kapagarakian dangan kun ootobon ninda an sakong mga pagboot sa bilog nindang puso asin kalag, dai ka mahahalean nin kasalihid sa trono nin Israel.’

⁵“Aram mo an ginibo sako ni Joab na aking lalaki ni Zeruias huli sa paggadan niya ki Abner na aking lalaki ni Ner saka ki Amasa na aking lalaki ni Jeter. Ginadan niya an duwang pamayong ini kan mga hukbo nin Israel sa panahon nin katoninongan bilang balos sa mga dugong pinabulos ninda sa panahon nin gera. Ginadan ni Joab an mga lalaking ini na mayong sala; ngunyan ako an naninimbag asin nagtitios huli kan nangyari.

⁶Aram mo na kun ano an dapat gibohon; dai ka magtugot na magadan siya sa natural na paagi.

⁷“Alagad pahilingan mo nin karahayan an mga aking lalaki ni Barsilai na taga Gilead. Tawan mo sinda nin tukawan na kaibahan kan mga nagkakarakan sa saimong lamesa huli ta nagin marahay sinda sako kan magdulag ako sa saimong tugang na si Absalom.

⁸“Dai mo man paglingawan si Simei na aking lalaki ni Gera, an Benjaminitang taga Bahurim na nagmaldisyon sako kan ako magduman sa Mahanaim. Alagad kan sabaton niya ako sa Salog nin Jordan, nanuga ako saiya sa ngaran nin Kagurangnan na dai ko siya ipapagadan.

⁹Alagad dai mo siya pabayaan na dai mapadusahan. Aram mo na kun ano an dapat gibohon; dai ka magtugot na magadan siya sa natural na paagi.”

¹⁰Nagadan si David asin ilinubong sa Syudad ni David.

¹¹Kwarentang taon siyang naghade sa Israel; pitong taon sa Hebron asin treynta y tres na taon sa Jerusalem.

¹²Kaya nagtukaw si Solomon sa trono kan saiyang ama na si David; nagin pusog an saiyang kahadean.

¹³Dangan nagduman si Adonias na aking lalaki ni Haggit ki Batsheba, na ina ni Solomon. “Nagdigdi ka daw sa katoninongan?” an hapot ni Batsheba. “Iyo,” an simbag ni Adonias,

¹⁴dangan nagsabi pa ini, “Igwa ako nin hahagadon saimo.” “Ano idto?” an hapot ni Batsheba.

¹⁵Nagsimbag siya, “Naaaraman mong sako an trono asin naghahalat an bilog na Israel na ako an magtukaw bilang hade. Alagad iba an nangyari, asin nagin hade an sakong tugang huli ta ini an kabotan nin Kagurangnan.

¹⁶Igwa ako ngunyan nin hahagadon saimo. Dai mo ako pagsayumahan.” “Ano an hahagadon mo?” an hapot ni Batsheba.

¹⁷Nagsimbag siya, “Nakikimaherak ako na hagadon mo ki Hadeng Solomon si Abisag na Sunamita na itao niya sako bilang agom ko. Aram ko na dai ka niya sasayumahan.”

¹⁸Nagsimbag si Batsheba, “Kakaolayon ko an hade para saimo.”

¹⁹Kaya nagduman si Batsheba ki Hadeng Solomon tanganing kaolayon para ki Adonias. Nagtindog an hade sa pagsabat sa ina, nagtaong galang, dangan nagtukaw sa saiyang trono. Nagpakua siya nin sarong tukawan para sa saiyang ina; nagtukaw si Batsheba sa too kan hade.

²⁰Nagsabi si Batsheba, “Igwa ako nin sadit na bagay na hahagadon saimo; dai mo ako pagsayumahan.” Nagsabi an hade, “Isabi mo an saimong kahagadan, ina ko, huli ta dai taka sasayumahan.”

²¹Nagsabi si Batsheba, “Itao mo si Abisag na Sunamita bilang agom kan saimong tugang na si Adonias.”

²²“Tadaw ta hinahagad mo na itao ko saiya si Abisag?” an hapot kan hade. “Hagadon mo na man para saiya pati an kahadean huli ta matua ko siyang tugang asin kakampi niya an padi na si Abiatar saka si Joab na aking lalaki ni Zeruias.”

²³Dangan nagsumpa si Hadeng Solomon sa ngaran nin Kagurangnan, “Padusahan logod ako nin Dios sagkod na magadan kun dai ko gadanon si Adonias huli kan kahagadan niyang ini!

²⁴Pinatukaw ako nin Kagurangnan sa trono kan sakong ama na si David; inotob niya an saiyang panuga asin an kahadean itinao niya sako saka sa sakong mga kapagarakian. Minasumpa ako sa ngaran kan buhay na Kagurangnan na magagadan si Adonias ngunyan na aldaw!”

²⁵Dangan sinugo ni Hadeng Solomon si Benaias. Nagluwas si Benaias asin ginadan si Adonias.

²⁶Sinabihan ni Hadeng Solomon an padi na si Abiatar, “Magpuli ka sa saimong daga sa Anatot. Maninigo kang magadan, alagad dai taka ipapagadan ngunyan huli ta namahala ka sa Kaban nin Tipan nin Kagurangnan sa panahon kan sakong ama na si David asin huli ta nagdanay ka saiya sa gabos niyang kasakitan.”

²⁷Kaya hinale ni Solomon si Abiatar sa paglingkod bilang sarong padi nin Kagurangnan. Huli kaini, nagkatotoo an itinaram nin Kagurangnan duman sa Shilo manongod sa padi na si Eli asin sa saiyang mga kapagarakian.

²⁸An pangyayaring ini nakaabot ki Joab. (Nag-apil siya ki Adonias, alagad dai siya nag-apil ki Absalom.) Kaya nagdulag siya pasiring sa Tabernakulo asin nagpugol sa mga sungay kan altar.”

²⁹Kan maaraman ni Hadeng Solomon na nagdulag si Joab pasiring sa Tabernakulo asin yaon siya sa kataed kan altar, sinugo ni Hadeng Solomon si Benaias tanganing gadanon si Joab.

³⁰Naglaog si Benaias sa Tabernakulo asin nagsabi ki Joab, “Ipinagboboot kan hade na lumuwas ka.” “Dai, digdi ako magagadan,” an simbag ni Joab. Nagbalik si Benaias sa hade asin sinabi an simbag ni Joab.

³¹“Giboha an sinabi niya,” an simbag ni Solomon. “Gadanon mo siya asin ilubong. Sa paaging iyan, hahaleon mo sako asin sa kapagarakian kan sakong ama an kasalan para sa dugong pinabulos ni Joab na mayo nin dahelan.

³²Papadusahan siya nin Kagurangnan huli ta ginadan niya an duwang lalaking orog na matanos ki sa saiya, si Abner na pamayo kan hukbo nin Israel, asin si Amasa na pamayo kan hukbo nin Juda. Ginadan niya an duwang ini na dai nakakaaram an sakong ama na si David.

³³Huli kan saindang pagkagadan, an padusa mahugpa ki Joab asin sa saiyang mga kapagarakian sagkod pa man. Alagad danay na papauswagon nin Kagurangnan an kapagarakian ni David na matukaw sa saiyang trono.”

³⁴Kaya nagduman si Benaias sa Tabernakulo asin ginadan si Joab; ilinubong siya sa saiyang harong sa kalangtadan.

³⁵Si Benaias an ginibo kan hade na kasalihid ni Joab bilang pamayo kan hukbo asin si Zadok an nagin kasalihid ni Abiatar bilang padi.

³⁶Dangan ipinaapod kan hade si Simei asin sinabihan, “Magtugdok ka nin harong digdi sa Jerusalem. Mag-erok ka digdi asin dai ka nanggad maghale sa syudad.

³⁷Saboton mo nanggad na magagadan ka sa oras na humale ka asin bumalyo sa sapa nin Kidron—asin ika an babasolon sa saimong pagkagadan.”

³⁸Nagsimbag si Simei, “Marahay an sinabi mo, gigibohon ko an saimong ipinagboboot, mahal na hade.” Kaya nag-erok si Simei sa Jerusalem sa haloy na panahon.

³⁹Alagad pakalihis nin tolong taon, duwang oripon ni Simei an nagdulag pasiring ki Akis na aking lalaki ni Maaca, na hade nin Gat. Kan maaraman ni Simei na an saiyang mga oripon idtoon sa Gat,

⁴⁰kinamaderohan niya an saiyang asno asin nagpasiring ki Hadeng Akis sa Gat, tanganing hanapon an saiyang mga oripon. Nakua niya sinda asin ibinalik sa saiyang harong.

⁴¹Kan maaraman ni Solomon an ginibo ni Simei,

⁴²ipinaapod niya ini asin sinabihan, “Pinasumpa taka sa ngaran nin Kagurangnan na dai maghale sa Jerusalem. Pinatanidan taka na magagadan ka kun gibohon mo iyan. Bakong nag-oyon ka asin nagsabi na kukuyogon mo ako?

⁴³Tadaw ta dai mo inotob an saimong panuga sa Kagurangnan asin dai mo kinuyog an sakong pagboot?

⁴⁴Aram mo an mga karatan na ginibo mo sa sakong ama na si David. Huli kaini papadusahan ka nin Kagurangnan.

⁴⁵Alagad bebendisyonan niya ako, asin pusog na mapapatindog sagkod pa man an kahadean ni David.”

⁴⁶Dangan pinagbotan kan hade si Benaias; nagluwas si Benaias asin ginadan si Simei. Kaya nagin pusog an kahadean sa palakaw ni Solomon.