Read Central Bicolano 1 Kings 4 Bible Online

1 Kings 4 - Central Bicolano bible

1 Kings 4

¹Si Solomon iyo an hade kan bilog na Israel

²asin an mga ini iyo an saiyang haralangkaw na mga opisyal: An padi: si Azarias na aking lalaki ni Zadok

³An mga sekretaryo kan kahadean: Si Elihoref asin si Ahias na mga aking lalaki ni Shisha An Parasaray kan mga listahan: Si Jehosafat na aking lalaki ni Ahilud.

⁴An pamayo kan hukbo: Si Benaias na aking lalaki ni Jehoiada An mga Padi: Si Zadok asin si Abiatar.

⁵An pamayo kan mga gobernador kan distrito: Si Azarias na aking lalaki ni Natan An parahatol kan Hade: An padi na si Zabud na aking lalaki ni Natan

⁶An namahala kan mga sorogoon sa palasyo: Si Ahisar An namahala kan mga tawong pirit na pinapagtrabaho: Si Adoniram na aking lalaki ni Abda

⁷Igwa si Solomon nin doseng gobernador kan mga distrito nin Israel. Sinda an mag-aandam kan pagkakan para sa hade asin sa pamilya kaini hale sa saindang mga distrito; an lambang gobernador maandam nin pagkakan para sa sarong bulan kan taon.

⁸Iyo ini an mga ngaran kan doseng gobernador asin an mga distritong pinamahalaan ninda: Ben-hur: an mabulod na daga nin Efraim

⁹Ben-deker: an mga syudad nin Makaz, Saalbim, Bet-semes, Elon, asin Bet-hanan

¹⁰Ben-hesed: an mga syudad nin Arubbot saka Soco asin an gabos na teritoryo nin Hefer

¹¹Ben-abinadab, na nakaagom ki Tafat na aking babae ni Solomon: an bilog na rehiyon nin Dor

¹²Baana, na aking lalaki ni Ahilud: an mga syudad nin Taanac, Megido, asin an bilog na rehiyon harani sa Bet-sean, na harani sa banwa nin Zaretan, sa parteng habagat kan banwa nin Jezreel, sagkod sa syudad nin Abel-mehola asin sa syudad nin Jokmeam

¹³Ben-geber: an syudad nin Ramot sa Gilead, asin an mga baryo sa Gilead na pagsadiri kan kamaganakan ni Jair, na aking lalaki ni Manases, asin an rehiyon nin Argob sa Basan; sesentang darakulang banwa na nakukudal asin igwa nin mga bronseng barat an mga trangkahan

¹⁴Ahinadab, na aking lalaki ni Iddo: an distrito nin Mahanaim

¹⁵Ahimaaz, na nakaagom ki Basemat na saro pang aking babae ni Solomon: an teritoryo nin Neftali

¹⁶Baana, na aking lalaki ni Husai: an rehiyon nin Asher asin an banwa nin Bealot

¹⁷Jehosafat, na aking lalaki ni Parua: an teritoryo nin Issakar

¹⁸Simei, na aking lalaki ni Ela: an teritoryo nin Benjamin

¹⁹Geber, na aking lalaki ni Uri: an rehiyon nin Gilead, na sakop kaidto ni Sihon na hade kan mga Amoreo asin ni Og na hade nin Basan Pwera kan doseng ini, igwa nin sarong gobernador sa bilog na daga.

²⁰An mga tawo sa Juda asin sa Israel siring kadakul kan baybay sa dagat; nagkarakan sinda saka nag-irinom asin mga maogma sinda.

²¹Pinamayohan ni Solomon an gabos na kahadean magpoon sa Salog nin Eufrates sakod sa daga kan mga Filisteo asin sa pagdolonan kan Egipto. Nagbuhis sinda asin naglingkod ki Solomon mantang nabubuhay pa siya.

²²Bilang pagkakan ni Solomon para sa sarong aldaw kaipuhan an singko mil litros nin marahay na arina, dyes mil na litros nin ordinaryong arina,

²³sampolong pinatabang baka, beynteng baka hale sa pasabsaban, asin sanggatos na karnero, laen pa kan mga usang darakula asin saradit, mga kanding, asin mga manok na matataba.

²⁴Sakop ni Solomon an gabos na daga sa solnopan kan Salog nin Eufrates, magpoon sa Tifsa sagkod sa Gaza. Sakop man niya an mga hade sa solnopan kan Salog nin Eufrates; igwa nin katoninongan sa palibot ni Solomon.

²⁵Mantang nabubuhay pa siya, ligtas na namuhay an mga tawo sa Juda asin sa Israel. An lambang pamilya igwa nin sadiring mga poon nin ubas asin higera.

²⁶Igwa si Solomon nin kwarenta mil na kwadra para sa saiyang pangkarwaheng mga kabayo asin dose mil para sa mga nakakabayong mga soldados.

²⁷An doseng gobernador, iyo an nagpapadara kan mga pagkakan ni Hadeng Solomon saka kan mga tawong nagkakarakan sa palasyo. Minapadara an lambang saro sainda sa bulan na talaan sa saiya; danay sindang nagpapadara kan gabos na kaipuhan.

²⁸An mga gobernador na ini nagpapadara man nin sebada asin dagami saen man ini kaipuhan, para sa mga kabayong pangkarwahe asin para sa mga hayop na pantrabaho.

²⁹Tinawan nin Dios si Solomon nin kadonongan saka pakasabot na dai masusukol, asin nin mahiwas na pakaaram.

³⁰Kaya an saiyang kadonongan orog ki sa kadonongan kan gabos na taga sirangan asin kan bilog na Egipto.

³¹Siya an pinakamadonong sa gabos na tawo: mas madonong ki Etan na Ezrahita, asin ki Heman, ki Calcol saka ki Darda, na mga aking lalaki ni Mahol. Nakalakop an saiyang dangog sa gabos na nasyon sa palibot.

³²Nagtaram siya nin tolong ribong talinhaga asin sobra sa sangribo an bilang kan saiyang mga awit.

³³Nagtaram siya manongod sa mga kahoy asin mga tinanom, magpoon sa sedro nin Lebanon sagkod sa isopo na nagtatalubo sa mga kudal; manongod sa mga hayop na naglalakaw o nagkakamang sa daga; manongod sa mga gamgam sagkod mga sira.

³⁴An saiyang kadonongan nabaretaan kan mga hade sa bilog na kinaban asin nagpadara sinda nin mga tawo tanganing maghinanyog saiya.