Read Central Bicolano 1 Kings 7 Bible Online

1 Kings 7 - Central Bicolano bible

1 Kings 7

¹Ipinatugdok man ni Solomon an saiyang palasyo asin natapos ini sa laog nin treseng taon.

²An Sala kan Kadlagan nin Lebanon igwa nin sukol na kwarenta y kwatro metros an laba, beynte y dos metros an lakbang, asin trese metros may singkwenta sentimetros an langkaw. An salang ini igwa nin tolong raya nin mga hariging sedro asin sa lambang raya igwa nin kinseng harigi, na natutumbawan kan mga kahabaan na kahoy na sedro. Sedro man an kisame na nakakaabot sa mga sarayan na kwarto, na pinapakosog kan mga harigi.

⁴Sa lambang lanob kan magkahampang na lanob igwa nin tolong raya nin mga bintana.

⁵Kwadrado an mga pintoan saka mga bintana, asin an tolong raya nin mga bintana sa sarong lanob kahampang nanggad kan tolong raya nin mga bintana sa ibong na lanob.

⁶Ipinagibo niya an Sala nin mga Harigi. Igwa ini nin sukol na beynte y dos metros an laba asin trese metros may singkwenta sentimetros an lakbang. Igwa ini nin balkon na may atop asin natutukod nin mga harigi.

⁷Ipinagibo man niya an Sala kan Trono na inapod man Sala nin Paghukom; digdi naghuhukom si Solomon. An Sala nalalanoban nin saradit na tablang sedro, magpoon sa salog sagkod sa mga gunting.

⁸An sadiring erokan ni Solomon, sa saro pang patyo sa likod kan Sala nin Paghukom ginibo siring kan Salang ini. Siring man an ipinagibo niyang harong para sa saiyang agom, an aking babae kan hade nin Egipto.

⁹An mga edipisyong ini, sagkod an dakulang patyo, gabos gibo sa mahalagang mga gapo magpoon sa pundasyon sagkod sa ibabang poro kan atop. An mga gapo inandam sa lugar na pinagtabasan kaini, tinarabas sosog sa sukol asin linagade sa likod saka sa atubangan.

¹⁰An mga pundasyon gibo sa darakulang gapo na inandam sa lugar na pinagtabasan na an iba tolong metros may kabanga an laba asin an iba apat na metros.

¹¹Sa ibabaw kaini, igwa nin iba pang gapo na tinarabas sosog sa sukol, asin igwa man nin mga kahabaan na sedro.

¹²Siring kan balkon asin kan panlaog na patyo kan Templo, an patyo kan palasyo igwa man nin mga kudal na ginibo sa paagi kan pagbabaw nin kahoy na sedro sa lambang tolong babaw nin tinarabas na gapo.

¹³Ipinaapod ni Hadeng Solomon an sarong lalaki na an ngaran Huram, na nag-eerok sa Tiro.

¹⁴An saiyang ama, na haloy nang gadan, gikan sa Tiro asin sarong ekspertong panday nin bronse; an saiyang ina gikan sa tribu ni Neftali. Si Huram sarong madonong na panday asin eksperto sa paggibo nin mga kagamitan na bronse. Nagduman si Huram ki Hadeng Solomon asin ginibo an gabos niyang trabaho.

¹⁵Naggibo si Huram nin duwang bronseng harigi. An lambang saro kaini walong metros an langkaw asin limang metros may treynta sentimetros an pabilog na sukol. Ibinugtak niya an mga ini sa laogan kan Templo.

¹⁶Naggibo man siya nin duwang bronseng kapitel na duwang metros may beynte sentimetros an langkaw kan lambang saro, tanganing ibugtak sa poro kan mga harigi.

¹⁷An poro kan lambang harigi sinamnohan niya nin sinalapid na mga kadena

¹⁸asin nin duwang rayang bronseng mga granada.

¹⁹An mga kapitel ginibo siring sa mga burak na liryo na sarong metro otsenta sentimetros an langkaw,

²⁰asin ibinugtak sa sarong pabilog na mitsa na nasa itaas kan kadena. Igwa nin dos syentos na granada sa duwang raya na nakasabod sa lambang kapitel.

²¹Ibinugtak ni Huram an duwang bronseng harigi sa atubangan kan laogan kan Templo: an nasa habagat nginaranan niyang Jakin asin an nasa amihan nginaranan niyang Boaz.

²²An mga bronseng kapitel na pormang liryo nasa ibabaw kan mga harigi. Kaya nahaman an patrabaho sa mga harigi.

²³Naggibo si Huram nin sarong bilog na bronseng tangke na duwang metros may beynte sentimetros an rarom, apat na metros may kwarenta sentimetros an hiwas, asin trese metros may beynte sentimetros an pabilog na sukol.

²⁴Sa palibot sa luwas na parte kan tangke, igwa nin duwang raya nin bronseng mga melon, na hinaman kaiba kan tangke.

²⁵An tangke nakatumbaw sa likod nin doseng bronseng baka na an tolo nakaatubang sa amihan; an tolo sa solnopan, an tolo sa habagat, asin an tolo sa sirangan; nagtataralikodan an gabos na baka.

²⁶Setenta y singko milimetros an hibog kan tangke; an porma kan ngabil kaini arog sa ngabil nin sarong kalis, siring sa bukad na burak nin liryo. An tangke pwedeng malaogan nin kwarenta mil na litrong tubig.

²⁷Naggibo man si Huram nin sampolong bronseng kariton; sarong metro may otsenta sentimetros an laba kan lambang saro, sarong metro may otsenta sentimetros an lakbang, asin sarong metro may treynta sentimetros an langkaw.

²⁸Siring kaini an pagkagibo kan mga kariton: igwa ini nin mga lanob, asin an mga lanob nakakana sa mga kwadro.

²⁹An mga lanob na nakakana sa mga kwadro igwang nakaukit na mga leon, mga torong baka asin mga kerubin; sa mga kwadro sa parteng itaas asin sa ibaba kan mga leon saka mga torong baka, nakaukit an kinadenang mga burak.

³⁰An lambang kariton igwa nin apat na bronseng rweda asin bronseng ehe. Sa apat na kanto kan kariton igwa nin apat na bronseng tukod para sa palanggana; an mga tukod igwa nin nakaukit na kinadenang mga burak.

³¹Sa ibabaw kan mga tukod igwa nin pabilog na tumbawan para sa sarong palanggana. Magpoon sa ibabaw kan kariton, an tumbawan igwa nin sukol na kwarenta y singko sentimetros paitaas asin dyes y otso sentimetros paibaba. May mga dibuhong nakaukit sa tumbawan. Kwadrado an lanob kan mga kariton.

³²Nasa irarom kan mga lanob an apat na rweda; an mga ehe kan mga rweda saro sanang pedaso saka an mga kariton. Sesenta y seis sentimetros an langkaw kan mga rweda

³³asin ginibo an mga ini arog sa mga rweda nin karwahe. An mga ehe, an mga rim, an mga rayo asin an mga pasikadan kan mga rayo gibo sa bronse.

³⁴Igwa nin apat na tukod sa irarom kan mga kanto kan lambang kariton; an mga tukod saro sanang pedaso saka an kariton.

³⁵An ibabaw kan lambang kariton napapalibotan nin pangpakosog na beynte y dos sentimetros an langkaw. An mga tukod asin an mga lanob saro sanang pedaso saka an kariton.

³⁶An mga ini sinamnohan nin mga kerubin, leon, asin mga kahoy na palma; sa mga parteng mayo nin samno, duman inukit an kinadenang mga burak.

³⁷Siring kaiyan an pakagibo kan mga kariton; parareho an pakagibo kaiyan, huli ta saro sana an sukol asin porma.

³⁸Naggibo man si Huram nin sampolong palanggana, saro para sa lambang kariton. An ngabil kan lambang saro may hiwas na sarong metro may otsenta sentimetros, asin nalalaogan nin otso syentos na litro nin tubig.

³⁹Ibinugtak niya an limang kariton sa parteng habagat kan Templo, asin an lima sa parteng amihan; an tangke ibinugtak niya sa kanto sa habagat-sirangan.

⁴⁰Naggibo man si Huram nin mga kaldero, pala asin mga mangko. Tinapos niya an gabos na ipinagibo saiya ni Hadeng Solomon para sa Templo nin Kagurangnan: An duwang harigi An duwang kapitel na pormang mangko sa ibabaw kan mga harigi An sinalapid na mga kadena para sa mga kapitel An kwatro syentos na granadang pansamno, duwang raya nin granada para sa sarong kadenang nasa lambang kapitel An sampolong kariton An sampolong palanggana An tangke An doseng baka na natutumbawan kan tangke An mga kaldero, pala, asin mangko An mga kagamitan na ini para sa Templo, na ipinagibo ni Hadeng Solomon ki Huram gabos gibo sa makintab na bronse.

⁴¹

⁴²

⁴³

⁴⁴

⁴⁵

⁴⁶Ipinagibo niya ini duman sa kapantayan nin Jordan, sa lugar na tunawan nin mga metal sa pagultanan kan Sukkot asin Zaretan.

⁴⁷Dai na ipinatimbang ni Solomon an mga bronseng kagamitan na ini huli ta kadakul nin marahay. Dai nanggad naaraman an timbang kan mga ini.

⁴⁸Nagpagibo man si Solomon nin mga bulawan na kagamitan para sa Templo: an altar, an lamesa para sa tinapay na dolot sa Dios.

⁴⁹An sampolong kandelero na pinatirindog sa atubangan kan Kabanal-banaleng Lugar—lima sa habagat asin lima sa amihan; an mga burak, an mga ilawan asin an mga pansipit;

⁵⁰an mga kalis, an mga pamalsok kan ilaw, an mga mangko, an mga plato para sa insenso, asin an mga bugtakan nin baga; an mga bisagra kan mga pinto kan Kabanal-banaleng Lugar asin kan panluwas na mga pinto kan Templo. An gabos na kagamitan na ini gibo sa purong bulawan.

⁵¹Kan mahaman na an gabos na ipinagibo ni Hadeng Solomon para sa Templo nin Kagurangnan ilinaog niya sa mga sarayan kan Templo an gabos na kinonsagra ni David, na saiyang ama, para sa Kagurangnan—an plata, bulawan, asin iba pang mga kasangkapan.