Read Central Bicolano 1 Kings 8 Bible Online

1 Kings 8 - Central Bicolano bible

1 Kings 8

¹Dangan tinipon ni Solomon sa Jerusalem an kamagurangan nin Israel, an mga pamayo kan mga tribu asin mga lider kan mga kamaganakan kan banwaan nin Israel tanganing kuahon sa Sion, an syudad ni David, an Kaban nin Tipan nin Kagurangnan, dangan darahon sa Templo.

²Nagtiripon sinda sa atubangan ni Hadeng Solomon kan Pyesta nin mga Harong-harong, kan bulan nin Etanim na iyo an ikapitong bulan.

³Kan tiripon na an gabos na kamagurangan, binuhat kan mga padi an Kaban nin Tipan

⁴saka dinara sa Templo. Dinara man kan mga Levita asin kan mga padi an Tabernakulo saka an gabos na banal na kagamitan sa Tabernakulo.

⁵Nagtiripon sa atubang kan Kaban nin Tipab si Solomon pati an bilog na banwaan nin Israel, dangan nagdolot nin karnero saka baka, na dai mabilang sa kadakulan.

⁶An Kaban nin Tipan ilinaog kan mga padi sa pinakalaog na santwaryo kan Templo, sa Kabanal-banaleng Lugar, sa irarom kan mga pakpak kan mga kerubin.

⁷Natahoban kan nakaunat nindang mga pakpak an Kaban asin an mga pasanan kaini.

⁸Haralaba an mga pasanan, kaya an mga poro kaini nahihiling sa Banal na Lugar, sa atubangan kan Kabanal-banaleng Lugar; alagad an mga ini dai pwedeng mahiling sa luwas. (Yaon pa ini duman sagkod ngunyan).

⁹Mayo nin ibang laog an Kaban kundi an duwang tablang gapo na ibinugtak duman ni Moises kan yaon siya sa Bukid nin Sinai, saen nakipagtipan an Kagurangnan sa banwaan nin Israel pakahale ninda sa Egipto.

¹⁰Mantang nagluluwas an mga padi sa banal na lugar, napano nin panganoron an Templo, an harong nin Kagurangnan,

¹¹kaya an mga padi dai nakatagal sa paglingkod sa laog kan Templo. Napano an Templo kan kamurawayan nin Kagurangnan.

¹²Dangan namibi si Solomon, “Kagurangnan, ika an nagbugtak kan aldaw sa kalangitan, alagad pinili mong mag-erok sa mahibog na kadikloman.

¹³Itinugdok taka nin sarong magayon na Templo, sarong lugar na saimong erokan sagkod lamang.”

¹⁴Mantang nagtitirindog duman an mga tawo, nag-atubang sainda si Hadeng Solomon asin benendisyonan sinda.

¹⁵Nagsabi siya, “Pag-omawon an Kagurangnan Dios nin Israel! Inotob niya an saiyang panuga sa sakong ama kan siya magtaram,

¹⁶‘Magpoon kan aldaw na iluwas ko sa Egipto an sakong banwaan, dai ako nagpili nin syudad sa gabos na tribu nin Israel tanganing tugdokan nin Templo na pagsasambahan sako. Alagad pinili taka David, na mamayo sa sakong banwaan.’”

¹⁷Nagsabi pa si Solomon, “Nagmawot an sakong ama na si David na matugdok nin sarong Templo para sa Kagurangnan, an Dios nin Israel.

¹⁸Alagad tinaraman siya nin Kagurangnan, ‘Marahay an saimong kamawotan na magtugdok nin Templo para sa sakong ngaran,

¹⁹alagad bako ika an matugdok kan templo. An saimong aking lalaki iyo an matugdok kan sakong Templo.’

²⁰“Inotob ngunyan nin Kagurangnan an saiyang panuga. Nagin kasalihid ako kan sakong ama bilang hade nin Israel, asin itinugdok ko an Templo para sa Kagurangnan, an Dios nin Israel.

²¹Nag-andam man ako nin sarong lugar sa Templo para sa Kaban na namumugtakan kan duwang tablang gapo kan tipan na ginibo nin Kagurangnan sa satong mga ginikanan kan iluwas niya sinda sa Egipto.”

²²Dangan sa panhiling kan bilog na banwaan, nagtindog si Solomon sa atubangan kan altar; initaas niya an saiyang mga kamot

²³asin namibi, “O Kagurangnan, Dios nin Israel, mayo nin Dios na arog saimo sa langit asin sa daga! Inootob mo an saimong tipan sa saimong banwaan asin ipinapahiling mo an danay mong pagkamoot sa mga sorogoon mong bilog na pusong nagkukuyog saimo.

²⁴Inotob mo an panuga na ginibo mo sa sakong ama na si David; naotob ngunyan an lambang tataramon.

²⁵Kaya ngunyan, O Kagurangnan, Dios nin Israel, otobon mo an ibang panuga na ginibo mo sa sakong ama kan taraman mo siya na danay na magkakaigwa siya nin kapagarakian na maghahade sa Israel, kun magkuyog sinda saimo siring kan ginibo niya.

²⁶Kaya ngunyan, O Dios nin Israel, patotoohan mo an saimong itinaram sa sakong ama na si David, na saimong sorogoon.

²⁷“Alagad pwede daw na mag-erok sa daga an Dios? Kun an pinakahalangkaw na kalangitan dai ngani nagkakanigo saimo, gurano pa daw an Templong ini na sakuyang ipinatugdok?

²⁸Alagad hinanyoga an pamibi asin an pakimaherak kan saimong sorogoon, O Kagurangnan na sakong Dios; hinanyoga an sakong pamibi asin simbaga an kahagadan na ipinapahayag ko saimo ngunyan na aldaw.

²⁹Bantayan mo logod an Templong ini aldaw-banggi, an lugar na ini na saimong pinili na pagsasambahan saimo. Hinanyoga ako kun mag-atubang ako sa Templong ini asin mamibi.

³⁰Hinanyoga an saimong sorogoon asin an saimong banwaan sa Israel sa panahon na mamibi kamong arubang sa lugar na ini. Hinanyoga kami hale sa saimong erokan sa langit asin patawada kami.

³¹“Kun magkasala sa saiyang kapwa an sarong tawo asin pasumpaon siya sa atubangan kan saimong altar digdi sa Templo,

³²hinanyoga, Kagurangnan, dangan hukoman mo an saimong mga sorogoon. Padusahan mo an nagkasala asin ligtasan an matanos.

³³“Kun madaog kan kaiwal an saimong banwaan nin Israel huli ta nagkasala sinda saimo; kun magbalik sinda saimo asin mamibi digdi sa Templo, mapakumbabang maghagad nin kapatawadan,

³⁴hinanyoga sinda hale sa langit saka patawada an kasalan kan saimong banwaan; ibalik mo sinda sa daga na itinao mo sa saindang mga ginikanan.

³⁵“Kun serahan mo an langit asin dai mag-uran huli ta nagkasala sinda saimo; kun magsolsol sinda saka mag-atubang sa Templong ini, mapakumbaba na mamibi saimo,

³⁶hinanyoga sinda hale sa langit, saka patawada an mga kasalan kan hade asin kan banwaan nin Israel; tukdoan mo sinda sa paggibo nin matanos. Dangan, O Kagurangnan, tawe nin uran an saimong daga, an daga na itinao mo sa saimong banwaan bilang pamana.

³⁷“Kun magkaigwa sa daga nin gutom o peste, o maraot an mga tanom huli sa doros, sa sobrang uran, sa mga doron, o kun salakayon kan mga kaiwal an saimong banwaan, o kun may mga helang na mag-abot sainda,

³⁸hinanyoga an saindang mga pamibi. Kun an siisay man sa saimong banwaan, mag-itaas kan saindang mga kamot pasiring sa Templong ini huli sa kamondoan tanganing makimaherak saimo,

³⁹hale sa langit na saimong erokan hinanyoga sinda saka patawada; itao mo an tamang balos sa saindang mga gibo, huli ta ika an nakakaaram kan nasa saindang puso,

⁴⁰tanganing mamuhay sinda na igwa nin takot saimo sa daga na itinao mo sa samong mga ginikanan.

⁴¹“Kun an sarong dayuhan na nag-eerok sa harayong lugar makadangog kan saimong dakulang ngaran asin kan saimong makangangalas na mga gibo para sa saimong banwaan, dangan magdigdi tanganing magsamba saka mamibi sa Templong ini,

⁴²

⁴³hinanyoga an saiyang pamibi. Hale sa langit na saimong erokan, hinanyoga siya asin giboha an hinahagad niya saimo, tanganing mamidbidan ka kan mga tawo sa kinaban dangan kuyogon ka ninda siring kan pagkuyog saimo kan banwaan nin Israel. Dangan maaaraman ninda na an Templong ini na ipinatugdok ko iyo an lugar na pagsasambahan saimo.

⁴⁴“Kun makigera an saimong banwaan laban sa saindang kaiwal, saen man na lugar mo sinda isubol, dangan mamibi sinda saimo na nakaatubang sa syudad na pinili mo asin sa Templong ini na sakong itinugdok para saimo,

⁴⁵hale sa langit hinanyoga an saindang mga pamibi asin tawe sinda nin kapangganahan.

⁴⁶“Kun magkasala sinda saimo, huli ta mayo nin tawo na dai nagkakasala, asin sa kaanggotan pabayaan mo sindang madaog saka mabihag kan saindang mga kaiwal sa harayo o haraning lugar,

⁴⁷hinanyoga an mga pamibi nin saimong banwaan. Kun sa dagang pinagdarahan sainda magsolsol saka mamibi sinda saimo, mag-ako kan saindang kasombikalan, hinanyoga an saindang mga pamibi, O Kagurangnan.

⁴⁸Kun magsolsol sinda sa bilog na puso asin isip duman sa daga kan saindang mga kaiwal na nagbihag sainda, asin mamibi saimo mantang nakaatubang sa dagang ini na itinao mo sa saindang mga ginikanan, sa syudad na ini na saimong pinili, asin sa Templong ini na itinugdok ko para saimo,

⁴⁹hale sa langit na saimong erokan, hinanyoga an saindang mga pamibi dangan maherak ka sainda.

⁵⁰Patawada sinda kan gabos nindang kasalan asin kasombikalan; ibugtak mo an pagkaherak sa puso kan mga nagbihag sainda tanganing maherakan sinda.

⁵¹Sadiri mo an banwaan na ini na ilinuwas mo sa Egipto, idtong nagbabagang horno.

⁵²“Kagurangnan Dios, danay logod na mawilihan mo an banwaan nin Israel asin an saindang hade; hinanyoga an saindang pamibi kun minaapod sinda saimo tanganing magpatabang.

⁵³Isiniblag mo sinda hale sa gabos na banwaan sa daga, tanganing magin pamana mo, siring kan ipinahayag mo huli ki Moises na saimong sorogoon kan iluwas mo sa Egipto an samong mga ginikanan.”

⁵⁴Nakaluhod si Solomon sa atubangan kan altar asin nakaitaas an saiyang mga kamot mantang namimibi. Kan matapos an saiyang pamibi,

⁵⁵nagtindog siya asin sa makosog na tingog benendisyonan niya an gabos na tawong nagtiripon duman. Nagsabi siya,

⁵⁶“Pag-omawon an Kagurangnan na nagtao sa Israel nin kapahingaloan, sosog sa gabos niyang panuga. Inotob niya an gabos na marahay na panuga na ginibo niya huli sa sorogoon niyang si Moises.

⁵⁷Ibahan logod kita nin Kagurangnan na satong Dios siring na inibahan niya kaidto an satong mga ginikanan; dai man logod niya kita pagbayaan o pagpabayaan;

⁵⁸gibohon niya logod na magin maimbod kita saiya, tanganing mamuhay kita sosog sa saiyang kabotan, magkuyog kan gabos na togon asin pagboot na itinao niya sa satong mga ginikanan.

⁵⁹An pamibi asin mga kahagadan kong ini magiromdoman logod nin Kagurangnan na satong Dios aldaw-banggi. Danay logod siyang maherak sa banwaan nin Israel asin sa saindang hade, sosog sa saindang pangangaipo sa aroaldaw,

⁶⁰tanganing maaraman kan gabos na nasyon sa kinaban na an Kagurangnan iyo sana an Dios; mayo na nin iba.

⁶¹Kamo, na saiyang banwaan, magdanay logod na maimbod sa Kagurangnan na satong Dios, magkuyog kan gabos niyang togon asin pagboot arog ngunyan na aldaw.”

⁶²Dangan si Hadeng Solomon asin an bilog na Israel nagdolot nin mga sakripisyo sa Kagurangnan.

⁶³Nagsakripisyo siya nin beynte y dos mil na baka asin syento beynte mil na karnero bilang dolot para sa katoninongan.

⁶⁴Kan aldaw man na iyan, kinonsagra kan hade an tahaw kan patyo na nasa atubangan kan Templo; idinolot niya duman an mga tinutong na atang, an dolot na pagkakan, asin an taba kan mga hayop bilang mga dolot para sa katoninongan. Duman niya ini ginibo huli ta an bronseng altar sadit nin marahay para sa gabos na dolot.

⁶⁵Duman sa Templo, si Solomon asin an bilog na banwaan nin Israel nagselebrar kan Pyesta nin mga Harong-harong sa laog nin pitong aldaw. Dakul nin marahay an tawo na nagtiripon duman na hale pa sa harayong Dalan nin Hamat sa amihan sagkod sa pagdolonan nin Egipto sa habagat.

⁶⁶Kan ikawalong aldaw pinapuli ni Solomon an mga tawo. Benendisyonan kan mga tawo si Solomon asin maogma sindang nagpuli huli kan gabos na bendisyon na itinao nin Kagurangnan sa saiyang sorogoon na si David sagkod sa banwaan nin Israel.