Read Central Bicolano 2 Kings 10 Bible Online

2 Kings 10 - Central Bicolano bible

2 Kings 10

¹Si Ahab igwa nin setentang aking lalaki na nag-eerok sa syudad nin Samaria. Sinuratan ni Jehu an mga pamayo kan syudad, an kamagurangan, asin an mga nag-aataman kan mga aking lalaki ni Ahab. Ini an laog kan surat:

²“Kamo an mga nag-aataman kan mga aking lalaki kan hade, kan mga karwahe asin mga kabayo, kan mga armas, asin kan pinapusog na mga syudad. Pakabasa nindo kan surat na ini,

³pilion nindo an pinakamarahay sa mga aking lalaki kan saindong kagurangnan dangan gibohon nindo siyang hade asin makilaban kamo para saiya.”

⁴Natakot sinda asin nagsabi, “Kun an duwang hade dai nakatindog laban ki Jehu, kita pa daw?”

⁵Kaya an namamahala kan palasyo asin kan syudad, kaiba an kamagurangan saka an mga paraataman kan mga aking lalaki kan hade nagpadara kan mensaheng ini ki Jehu: “Mga sorogoon mo kami. Anoman an sabihon mo gigibohon mi; alagad dai kami mabugtak nin hade. Giboha an pagmarahayon mo.”

⁶Sinuratan giraray sinda ni Jehu. Ini an laog kan surat: “Kun kampi kamo sako asin andam na sumunod sa sakong pagboot, darahon nindo digdi sa Jezreel sa aga, sa siring kaining oras, an mga payo kan mga aking lalaki ni Hadeng Ahab.” An setentang aking lalaki ni Ahab nasa pangataman kan mga ginagalangan na tawo kan Samaria.

⁷Pakabasa ninda kan surat, ginadan ninda an setentang aking lalaki ni Ahab, ibinugtak an mga payo sa mga basket, asin ipinadara ki Jehu sa Jezreel.

⁸Kan paisihon si Jehu na an mga payo kan mga aki ni Ahab yaon na, nagboot siya na pagduwahon na tambak idto sa trangkahan kan syudad asin pabayaan duman sagkod na mag-aga.

⁹Pagkaaga, nagduman siya sa trangkahan asin sinabihan an mga tawo, “Ako an nagplano laban ki Hadeng Joram asin ginadan ko siya; dai kamo maninimbag kaiyan. Alagad siisay an guminadan kan mga ini?

¹⁰Saboton nindo na maootob an lambang tataramon nin Kagurangnan manongod sa kapagarakian ni Ahab, asin pinatotoohan nin Kagurangnan an itinaram niya sa paagi kan propeta niyang si Elias.”

¹¹Dangan ginadan ni Jehu an iba pang kadugo ni Ahab sa Jezreel. Ginadan man niya an mga opisyal ni Ahab, an mga katood saka mga padi; mayo siya nin itinadang buhay.

¹²Naghale si Jehu sa Jezreel asin nagpasiring sa Samaria. Sa dalan, sa sarong lugar na inaapod, “Kampo nin mga Pastor,”

¹³nasabat niya an nagkapirang kadugo ni Hadeng Ahazias nin Juda. Hinapot niya sinda, “Siisay kamo?” Nagsimbag sinda, “Mga kadugo kami ni Ahazias. Pasiring kami sa Jezreel tanganing dalawon an mga prinsipe saka an mga aking lalaki kan inang reyna.”

¹⁴Pinagbotan ni Jehu an saiyang mga tawohan, “Dakopa nindo sindang buhay!” Dinakop ninda an mga kadugo ni Ahazias asin ginadan niya sinda harani sa sarong kalot duman. Kwarenta y dos katawo sinda gabos asin mayo sainda nin natadang buhay.

¹⁵Kan maghale si Jehu sa lugar na idto, nasabat niya si Jonadab na aking lalaki ni Recab na nagluwas sa pagsabat saiya. Kinomusta ni Jehu si Jonadab asin sinabihan, “Pareho an dalagan kan isip nyato. Tatabangan mo daw ako?” “Tatabangan taka,” an simbag ni Jonadab. “Kun siring, iabot mo sako an saimong kamot,” an sabi ni Jehu. Kaya inabot ni Jonadab an saiyang kamot, asin tinabangan siya ni Jehu sa paglunad sa karwahe.

¹⁶Nagsabi si Jehu, “Umiba ka sako tanganing mahiling mo an sakong kaimbodan sa Kagurangnan.” Sabay sinda sa sarong karwahe na nagduman sa Samaria.

¹⁷Pag-abot sa Samaria, ginadan ni Jehu an gabos na natatada pang kadugo ni Ahab; mayo siya nin itinadang buhay, siring sa itinaram nin Kagurangnan ki Elias.

¹⁸Tinipon ni Jehu an mga tawo asin nagsabi, “Si Hadeng Ahab naglingkod nin kadikit ki Baal, alagad orog ko siyang paglilingkodan.

¹⁹Apodon nindo an gabos na propeta ni Baal, an mga nagsasamba saiya asin an mga padi. Kaipuhan yaon an gabos huli ta magibo ako nin dakulang pagdolot ki Baal. An siisay man na mayo sa okasyon na iyan gagadanon.” (Alagad paglansi sana ini ni Jehu huli ta an katuyohan niya iyo na gadanon an gabos na nagsasamba ki Baal.)

²⁰Dangan nagboot si Jehu, “Italaan nindo an sarong aldaw nin pagsamba sa pag-omaw ki Baal!” Nagtalaan sinda,

²¹asin ipinaabot ini ni Jehu sa bilog na daga nin Israel. Nagduman an gabos na nagsasamba ki Baal. Naglaog sinda sa templo ni Baal asin napano nin tawo an templo.

²²Dangan pinagbotan ni Jehu an padi na namamahala kan banal na mga gubing na iluwas idto asin itao sa mga nagsasamba ki Baal.

²³Pakatapos, naglaog si Jehu sa templo, kaiba si Jonadab na aking lalaki ni Recab, dangan sinabihan an mga tawo duman, “Hilingon nanggad nindo na mayo kamo nin kaibahan na sorogoon nin Kagurangnan, kundi mga nagsasamba sana ki Baal.”

²⁴Naglaog siya saka si Jonadab sa templo tanganing idolot an mga sakripisyo asin an mga tinutong na atang. Alagad bago sinda naglaog, nagbugtak ngona si Jehu nin otsentang lalaki sa luwas kan templo. Sinabihan niya an mga ini, “Gadanon nindo an mga nasa laog. An magpadulag sainda magbabayad kan sadiri niyang buhay!”

²⁵Pakadolot ni Jehu kan mga tinutong na atang, sinabihan niya an mga bantay saka mga opisyal, “Lumaog na kamo asin gadanon nindo sinda. Dai nindo pagpabayaan na may makadulag!” Naglaog sindang kapot an mga espada, ginadan an gabos na tawo, asin itinapok ninda sa luwas an mga bangkay. Dangan naglaog sinda sa pinakalaog na kwarto kan templo,

²⁶ilinuwas an banal na harigi na yaon duman, asin sinulo.

²⁷Kaya rinaot ninda an harigi ni Baal saka an templo. An templo ginibo nindang kasilyasan sagkod ngunyan.

²⁸Siring kaini an ginibo ni Jehu tanganing mahale sa Israel an pagsamba ki Baal.

²⁹Alagad inarog niya an kasalan ni Hadeng Jeroboam, na nagpakasala sa Israel sa paagi nin pagsamba sa bulawan na mga toro na ibinugtak niya sa Betel saka sa Dan.

³⁰Sinabihan nin Kagurangnan si Jehu, “Ginibo mo sa kapagarakian ni Ahab an gabos na boot kong gibohon mo. Kaya nanunuga ako na an saimong kapagarakian, sagkod sa ikaapat na henerasyon, magigin mga hade sa Israel.”

³¹Alagad bakong bilog sa puso an pagkuyog ni Jehu sa Kagurangnan, an Dios nin Israel; inarog niya an mga gibong maraot ni Jeroboam na nagpakasala sa Israel.

³²Kan panahon na idto, pinoonan nin Kagurangnan na inaan an teritoryo nin Israel. Sinakop ni Hadeng Hazael nin Siria an bilog na teritoryo

³³sa sirangan kan Jordan. Sa parteng habagat, sinakop niya an banwa nin Aroer sa Salog nin Arnon—kaiba digdi an mga teritoryo nin Gilead asin Basan, saen nag-eerok an mga tribu ni Gad, Ruben, asin an kabanga kan tribu ni Manases.

³⁴An iba pang ginibo ni Jehu, sagkod an saiyang kaisogan, gabos nasusurat sa An Kasaysayan kan mga Hade nin Israel.

³⁵Nagadan siya saka ilinubong sa Samaria. Nagsalihid saiya bilang hade an aki niyang lalaki na si Jehoahaz.

³⁶Pinaghadean ni Jehu an Israel duman sa Samaria sa laog nin beynte y otsong taon.