Read Central Bicolano 2 Kings 13 Bible Online

2 Kings 13 - Central Bicolano bible

2 Kings 13

¹Kan ikabeynte y tres na taon kan paghahade ni Joas na aking lalaki ni Ahazias bilang hade nin Juda, nagin hade nin Israel si Jehoahaz na aking lalaki ni Jehu, asin naghade siya sa Samaria sa laog nin dyes y syeteng taon.

²Siring ki Hadeng Jeroboam na naenot saiya, nagkasala siya sa Kagurangnan asin pinapagkasala niya an Israel; dai niya binayaan an saiyang mga maraot na gibo.

³Huli kaini, naanggot an Kagurangnan sa Israel kaya paulit-ulit na ipinadaog niya an Israel ki Hadeng Hazael nin Siria asin sa aki kaining si Ben-hadad.

⁴Dangan namibi si Jehoahaz sa Kagurangnan, asin dinangog nin Kagurangnan an saiyang pamibi huli ta nahiling niya kun paano pinasakitan kan hade nin Siria an Israel.

⁵Pinadarahan niya an Israel nin sarong lider na iyo an nagpatalingkas sainda sa kamot kan Siria. Kaya an Israel namuhay sa katoninongan, siring kan dati.

⁶Alagad dai ninda binayaan an mga kasalan ni Hadeng Jeroboam na nangenot sa Israel sa pagkakasala, kundi nagpadagos sinda sa paggibo nin kasalan; an ladawan kan diosang si Asera nagdanay sa Samaria.

⁷Mayo na nin natadang hukbo si Jehoahaz kundi an singkwentang lalaki na nakakabayo, sampolong karwahe asin dyes mil na soldados, huli ta an iba ginadan kan hade nin Siria, na tinimaktimakan niya siring sa alpog.

⁸An iba pang ginibo ni Jehoahaz asin an saiyang kaisogan, gabos nasusurat sa An Kasaysayan kan mga Hade nin Israel.

⁹Nagadan siya asin ilinubong sa Samaria. Si Jehoas na aki niyang lalaki iyo an nagsalihid saiya bilang hade.

¹⁰Kan ikatreynta y syeteng taon kan paghahade ni Joas nin Juda, nagin hade nin Israel si Jehoas na aking lalaki ni Jehoahaz, asin naghade siya sa Samaria sa laog nin dyes y seis na taon.

¹¹Nagkasala man siya sa Kagurangnan asin sinunod niya an maraot na paarog ni Hadeng Jeroboam na nagpakasala sa Israel.

¹²An iba pang ginibo ni Jehoas, sagkod an saiyang kaisogan sa gera tumang ki Hadeng Amazias nin Juda, gabos nasusurat sa An Kasaysayan kan mga Hade nin Israel.

¹³Nagadan si Jehoas asin ilinubong sa lulubngan kan mga hade sa Samaria. Si Jeroboam Ika Duwa na aki niyang lalaki iyo an nagsalihid saiya bilang hade.

¹⁴Si Eliseo nagkaigwa nin grabeng helang, asin kan siya naghihingagdan na, dinalaw siya ni Hadeng Jehoas nin Israel. Nagsabi si Jehoas mantang naghihibi, “Ama ko, ama ko! Ika an nagin makosog na parasurog nin Israel!”

¹⁵Sinabihan siya ni Eliseo, “Kumua ka nin sarong pana saka nagkapirang bosog.” Nagkua si Jehoas,

¹⁶dangan sinabihan siya ni Eliseo na mag-andam sa pagpana. Nag-andam sa pagpana si Jehoas, asin ibinugtak ni Eliseo an saiyang mga kamot sa mga kamot ni Jehoas.

¹⁷Dangan sa pagsunod kan pagboot kan propeta, binukasan kan hade an bintana na nakaatubang sa Siria. “Pumana ka!” an pagboot ni Eliseo. Pakatapos na magpana an hade, nagsabi an propeta, “Ika an bosog nin Kagurangnan, sarong bosog para sa kapangganahan laban sa Siria. Lalabanan mo sa Afek an Siria sagkod na madaog mo.”

¹⁸Dangan sinabihan ni Eliseo an hade na kuahon an ibang bosog asin ipana sa daga. Tolong beses na nagpana an hade, dangan nag-ontok.

¹⁹Huli kaini, naanggot si Eliseo kaya sinabihan niya an hade, “Nagpana ka kutana nin lima o anom na beses, dangan bilog na panggana kutana an makakamtan mo laban sa mga taga Siria. Alagad ngunyan tolong beses mo sana sindang madadaog.”

²⁰Nagadan si Eliseo saka ilinubong. Igwa kaidto nin mga grupo nin Moabita na taon-taon minasalakay sa daga nin Israel.

²¹Sarong beses, nagkapirang lalaki an malubong nin sarong gadan na lalaki; kan mahiling ninda an sarong grupo nin Moabita, itinapok ninda an bangkay sa lulubngan ni Eliseo, dangan nagdurulag sinda. Pakaduta kan bangkay sa mga tolang ni Eliseo, nabuhay ini asin nagtindog.

²²An Israel pinasakitan ni Hadeng Hazael nin Siria sa bilog na panahon kan paghahade ni Jehoahaz,

²³alagad nagin maboot asin maheherakon sainda an Kagurangnan. Dai nagtugot an Kagurangnan na magadan sinda, kundi tinabangan niya sinda huli kan saiyang tipan ki Abraham, ki Isaac, asin ki Jacob. Dai niya nalingawan an saiyang banwaan.

²⁴Pakagadan ni Hadeng Hazael nin Siria, nagin hade si Ben-hadad na saiyang aki.

²⁵Dangan tolong beses na nadaog si Ben-hadad ni Hadeng Jehoas nin Israel. Nabawi ni Jehoas an mga syudad na nasakop ni Ben-hadad sa panahon kan paghahade ni Jehoahaz, na ama ni Jehoas.