Read Central Bicolano 2 Kings 15 Bible Online

2 Kings 15 - Central Bicolano bible

2 Kings 15

¹Kan ikabeynte y syeteng taon kan paghahade ni Jeroboam Ika Duwa nin Israel, nagin hade nin Juda si Uzzias na aking lalaki ni Amazias.

²Dyes y seis na taon an edad ni Uzzias kan siya magin hade, asin singkwenta y dos na taon siyang naghade sa Jerusalem. An saiyang ina iyo si Jecolias na taga Jerusalem.

³Ginibo niya an matanos sa atubangan nin Kagurangnan, asin inarog an gabos na ginibo kan saiyang ama na si Amazias.

⁴Alagad dai niya ginaba an paganong mga lugar na pagsasambahan kaya nagpadagos an mga tawo sa pagdolot nin mga sakripisyo asin sa pagtutong nin insenso duman.

⁵Pinadusahan nin Kagurangnan si Uzzias kaya nagkaigwa siya nin nakakatakot na helang sa kublit sagkod na siya magadan. Nag-erok siya sa sarong siblag na harong. Si Jotam na aki niyang lalaki iyo an namahala kan saiyang harong asin nagpadalagan kan banwaan.

⁶An iba pang ginibo ni Uzzias nasusurat sa An Kasaysayan kan mga Hade nin Juda.

⁷Nagadan si Uzzias asin ilinubong sa Syudad ni David, sa lulubngan kan mga hade. Si Jotam na saiyang aking lalaki iyo an nagsalihid saiya bilang hade.

⁸Kan ikatreynta y otsong taon kan paghahade ni Uzzias nin Juda, nagin hade nin Israel si Zacarias na aking lalaki ni Jeroboam Ika Duwa; anom na bulan siyang naghade sa Samaria.

⁹Siring kan mga naenot saiya, ginibo niya an maraot sa atubangan kan Kagurangnan huli ta sinunod niya an maraot na paarog ni Jeroboam na aking lalaki ni Nebat, na nagpakasala sa Israel.

¹⁰Si Sallum na aking lalaki ni Jabes nagplano laban ki Hadeng Zacarias. Ginadan niya ini sa Ibleam asin siya an nagsalihid bilang hade.

¹¹An iba pang ginibo ni Zacarias gabos nasusurat sa An Kasaysayan kan mga Hade nin Israel.

¹²Kaya naotob an panuga nin Kagurangnan ki Jehu: “An saimong mga kapagarakian sagkod sa ikaapat na henerasyon magigin mga hade nin Israel.”

¹³Kan ikatreynta y nuebeng taon nin paghahade ni Uzzias sa Juda, nagin hade nin Israel si Sallum na aking lalaki ni Jabes; sarong bulan siyang naghade sa Samaria.

¹⁴Hale sa Tirza, nag-abot sa Samaria si Menahem na aking lalaki ni Gadi. Ginadan niya si Sallum asin siya an nagsalihid bilang hade.

¹⁵An iba pang ginibo ni Sallum, sagkod an pagplano niya laban ki Hadeng Zacarias, gabos nasusurat sa An Kasaysayan kan mga Hade nin Israel.

¹⁶Kan panahon na iyan, rinaot ni Menahem an syudad nin Tappua, an mga nag-eerok duman, asin an mga teritoryo kaini, magpoon sa Tirza huli ta an syudad dai nagsuko saiya. Ginadan niya an mga nag-eerok digdi. An mga babaeng bados ipinabaak niya an tulak.

¹⁷Kan ikatreynta y nwebeng taon kan paghahade ni Uzzias nin Juda, nagin hade nin Israel si Menahem na aking lalaki ni Gadi, asin sampolong taon siyang naghade sa Samaria.

¹⁸Ginibo niya an maraot sa atubangan kan Kagurangnan huli ta sinunod niya an maraot na paarog ni Hadeng Jeroboam na aking lalaki ni Nebat, na nagpakasala sa Israel sagkod na siya magadan.

¹⁹An Israel sinalakay ni Tiglat-pileser na emperador nin Asiria. Tinawan ni Menahem si Tiglat-pileser nin treynta y otso toneladang plata, tanganing makua sana an tabang niya sa pagpakosog kan saiyang kapangyarihan sa Israel.

²⁰Pirit na pinapagbuhis ni Menahem an gabos na mayaman sa Israel nin halagang singkwentang pedaso nin plata, asin ini an itinao niya ki Tiglat-pileser. Kaya nagbalik si Tiglat-pileser sa sadiri niyang banwaan.

²¹An iba pang ginibo ni Menahem gabos nasusurat sa An Kasaysayan kan mga Hade nin Israel.

²²Nagadan siya asin ilinubong. Si Pekaias na saiyang aking lalaki iyo an nagsalihid saiya bilang hade.

²³Kan ikasingkwentang taon kan paghahade ni Uzzias nin Juda, nagin hade nin Israel si Pekaias na aking lalaki ni Menahem; duwang taon siyang naghade sa Samaria.

²⁴Ginibo niya an maraot sa atubangan kan Kagurangnan huli ta sinunod niya an maraot na paarog ni Hadeng Jeroboam na aking lalaki ni Nebat, na nagpakasala sa Israel.

²⁵Si Peka na aking lalaki ni Remalias, na sarong opisyal kan hukbo ni Pekaias, nagplano laban saiya kaiba an singkwentang lalaki na taga Gilead. Ginadan ninda si Pekaias sa Samaria, sa bantayan kan palasyo, asin si Peka an nagsalihid saiya bilang hade.

²⁶An iba pang ginibo ni Pekaias gabos nasusurat sa An Kasaysayan kan mga Hade nin Israel.

²⁷Kan ikasingkwenta y dos na taon nin paghahade ni Uzzias sa Juda, nagin hade nin Israel si Peka na aking lalaki ni Remalias, asin beynteng taon siyang naghade sa Samaria.

²⁸Ginibo niya an maraot sa atubangan kan Kagurangnan huli ta sinunod niya an maraot na paarog ni Hadeng Jeroboam na aking lalaki ni Nebat, na nagpakasala sa Israel.

²⁹Sa panahon kan paghahade ni Peka, an Israel sinalakay ni Tiglat-pileser, an emperador nin Asiria, asin nasakop niya an Ijon, Abel-bet-maaca, Janoa, Kedes, Hazor, Gilead, saka Galilea asin an bilog na daga nin Neftali; an mga nag-eerok digdi dinara niyang bihag sa Asiria.

³⁰Kan ikabeynteng taon nin paghahade sa Juda ni Jotam na aking lalaki ni Uzzias, nagplano laban ki Hadeng Peka si Hosea na aking lalaki ni Ela. Ginadan ni Hosea si Hadeng Peka asin siya an nagsalihid bilang hade.

³¹An iba pang ginibo ni Peka gabos nasusurat sa An Kasaysayan kan mga Hade nin Israel.

³²Kan ikaduwang taon kan paghahade sa Israel ni Peka na aking lalaki ni Remalias, nagin hade nin Juda si Jotam na aking lalaki ni Uzzias.

³³Beynte y singkong taon an edad ni Jotam kan siya magin hade, asin dyes y seis na taon siyang naghade sa Jerusalem. An saiyang ina iyo si Jerusa na aki ni Zadok.

³⁴Ginibo niya an matanos sa atubangan nin Kagurangnan siring kan ginibo kan saiyang ama na si Uzzias.

³⁵Alagad dai niya ginaba an paganong mga lugar na pagsasambahan, kaya nagpadagos an mga tawo sa pagdolot nin mga sakripisyo asin sa pagtutong nin insenso duman. Ipinatugdok niya an Trangkahan sa Amihan kan Templo.

³⁶An iba pang ginibo ni Jotam, gabos nasusurat sa An Kasaysayan kan mga Hade nin Juda.

³⁷Sa panahon kan paghahade ni Jotam, enot na ipinadara nin Kagurangnan si Hadeng Rezin nin Siria saka si Hadeng Peka nin Israel tanganing salakayon an Juda.

³⁸Nagadan si Jotam asin ilinubong sa Syudad ni David, sa lulubngan nin mga Hade. Si Ahaz na saiyang aking lalaki iyo an nagsalihid saiya bilang hade.