Read Central Bicolano 2 Kings 16 Bible Online

2 Kings 16 - Central Bicolano bible

2 Kings 16

¹Kan ikadyes y syeteng taon nin paghahade sa Israel ni Peka na aking lalaki ni Remalias, nagin hade nin Juda si Ahaz na aking lalaki ni Jotam.

²Beynteng taon an edad ni Ahaz kan siya magin hade, asin dyes y seis na taon siyang naghade sa Jerusalem. Dai niya inarog si David na saiyang ginikanan, kundi ginibo niya an bakong matanos sa atubangan nin Kagurangnan na saiyang Dios,

³asin sinunod niya an paarog kan mga hade nin Israel. Maski an sadiri niyang aking lalaki tinutong niya bilang atang, sa pag-arog kan makauuyam na mga gawe kan mga nasyon na pinahale nin Kagurangnan mantang nagdadangadang an banwaan nin Israel.

⁴Nagdolot siya nin atang saka nagtutong nin insenso sa paganong mga lugar na pagsasambahan, sa kabubuldan, asin sa lindong kan lambang marambong na kahoy.

⁵Sinalakay ni Hadeng Rezin nin Siria asin ni Hadeng Peka nin Israel an Jerusalem dangan pinalibotan ini, alagad dai ninda nadaog si Ahaz.

⁶(Kan panahon na iyan, nabawi kan hade nin Edom an syudad nin Elat, asin pinahale niya an mga taga Juda na nag-erok sa Elat. Nag-abot sa Elat an mga Edomita asin sagkod ngunyan nag-eerok sinda digdi.)

⁷Nagsugo si Ahaz nin mga tawohan ki Tiglat-pileser, an emperador nin Asiria; ini an ipinasabi niya: “Ako an maimbod mong sorogoon. Magdigdi ka asin iligtas mo ako sa hade nin Siria asin sa hade nin Israel, na nagsasalakay sako.”

⁸Kinua ni Ahaz an plata saka bulawan sa Templo asin sa kaban nin yaman sa palasyo dangan irinegalo sa emperador nin Asiria.

⁹Dinangog kan emperador an saiyang pakimaherak. Sinalakay ni Tiglat-pileser an Damasco asin nasakop niya ini. Ginadan niya si Hadeng Rezin asin an mga tawo dinara niyang bihag pasiring sa Kir.

¹⁰Kan si Hadeng Ahaz magduman sa Damasco sa pagsabat ki Tiglat-pileser, nahiling niya an altar sa Damasco. Kaya an padi na si Urias pinadarahan niya nin sarong ladawan kan altar, asin an bilog na detalye kaini.

¹¹Naggibo si Urias nin altar na pareho nanggad kan ladawan, asin tinapos niya an altar bago nagbalik si Ahaz.

¹²Pagbalik ni Ahaz hale sa Damasco, nahiling niya na haman na an altar,

¹³kaya nagtutong siya nin mga atang na hayop asin dolot na pagkakan. Inula niya sa altar an dolot na arak sagkod an dugo kan dolot para sa katoninongan.

¹⁴Nasa pagultanan kan bagong altar asin kan Templo an bronseng altar na itinalaga sa Kagurangnan, kaya ibinugtak ini ni Ahaz sa amihan na parte kan saiyang bagong altar.

¹⁵Dangan pinagbotan niya si Urias: “Tututongon mo sa dakula kong altar na ini an pang-agang mga atang asin an pangbangging mga dolot na pagkakan, an mga tinutong na atang sagkod an mga dolot na pagkakan kan hade asin kan banwaan, saka an mga dolot na arak kan banwaan. Iula mo sa altar na ini an dugo kan gabos na isinakripisyong hayop. Alagad ingatan mo an bronseng altar huli ta gagamiton ko iyan sa panghuhula.”

¹⁶Ginibo ni Urias an pagboot kan hade.

¹⁷Rinaot ni Hadeng Ahaz an mga bronseng kariton na ginagamit sa Templo dangan hinale niya an mga palanggana na nakatumbaw duman. Kinua niya an bronseng tangke na nakatumbaw sa likod kan doseng bronseng toro dangan ibinugtak sa sarong gapong pundasyon.

¹⁸Hinale kan hade asin sinerahan an pribadong agihan kan hade pasiring sa Templo tanganing mapawili sana niya an emperador nin Asiria.

¹⁹An iba pang ginibo ni Hadeng Ahaz gabos nasusurat sa An Kasaysayan kan mga Hade nin Juda.

²⁰Nagadan si Ahaz asin ilinubong sa Syudad ni David, sa lulubngan kan mga hade. Si Ezekias na saiyang aking lalaki iyo an nagsalihid saiya bilang hade.