Read Central Bicolano 2 Kings 17 Bible Online

2 Kings 17 - Central Bicolano bible

2 Kings 17

¹Kan ikadoseng taon kan paghahade ni Ahaz nin Juda, nagin hade nin Israel si Hosea na aking lalaki ni Ela, asin naghade siya sa Samaria sa laog nin siyam na taon.

²Nagkasala siya sa Kagurangnan alagad bakong arog kan pagkakasala kan mga hade sa Israel na nagkaerenot saiya.

³Nakigera si Salmaneser na emperador nin Asiria laban ki Hosea; nagsuko si Hosea ki Salmaneser asin nagbuhis saiya taon-taon.

⁴Alagad nagpadara si Hosea nin mga sugo ki So, an hade nin Egipto sa paghagad nin tabang, asin dai na siya nagbayad kan buhis ki Salmaneser arog kan ginigibo niya taon-taon. Kan maaraman ini ni Salmaneser, ipinadakop niya si Hosea saka ipinabilanggo.

⁵Dangan sinalakay ni Salmaneser an Israel asin nakaabot siya sa Samaria, na pinalibotan niya sa laog nin tolong taon.

⁶Kan ikasiyam na taon kan paghahade ni Hosea, nasakop kan emperador nin Asiria an Samaria. An mga Israelita dinara niya sa Asiria bilang mga bihag, dangan pinaerok sa syudad nin Hala, asin sa harani kan salog nin Habor sa distrito nin Gozan, saka sa mga syudad nin Media.

⁷Nangyari ini sa Samaria huli ta an mga Israelita nagkasala sa Kagurangnan na saindang Dios, na nagligtas sainda sa hade nin Egipto asin nagdara sainda sa luwas kan Egipto. Nagsamba sinda sa mga dios-dios,

⁸dangan inarog ninda an mga gawe kan mga nasyon na pinahale nin Kagurangnan kan magdangadang an banwaan nin Israel, asin inako ninda an mga kaugalean kan mga hade nin Israel.

⁹Hilom na ginibo kan mga Israelita an mga bagay na bakong matanos. Nagtugdok sinda nin paganong mga lugar na pagsasambahan sa gabos nindang banwa, magpoon sa pinakasadit na baryo sagkod sa pinakadakulang syudad.

¹⁰Nagbugtak sinda nin mga gapong harigi saka mga ladawan kan diosang si Asera sa kabubuldan asin sa lindong kan lambang marambong na kahoy.

¹¹Nagtutong sinda nin insenso sa gabos na paganong altar, arog kan ginibo kan mga nasyon na pinahale nin Kagurangnan sa daga. Pinaanggot ninda an Kagurangnan huli kan maraot nindang mga gibo

¹²asin kan dai ninda pagkuyog sa pagboot nin Kagurangnan na dai sinda magsamba sa mga ladawan.

¹³An Kagurangnan nagpadara nin mga sugo saka mga propeta tanganing patanidan an Israel asin an Juda: “Talikodan na nindo an saindong mga maraot na gawe. Kuyogon nindo an sakong mga pagboot na nasusurat sa Katogonan na itinao ko sa saindong mga ginikanan, dangan itinao ko man saindo sa paagi kan mga propeta na sakong mga sorogoon.”

¹⁴Alagad habo sindang maghinanyog; nagin matagas an saindang payo arog kan saindang mga ginikanan, na dai nagtubod sa Kagurangnan na saindang Dios.

¹⁵Isinikwal ninda an saiyang mga katukdoan, dai ninda kinuyog an tipan na ginibo niya sa saindang mga ginikanan, asin dai ninda dinangog an saiyang mga patanid. Sinamba ninda an mayong halagang mga ladawan asin sinda mismo nawaraan nin halaga; inarog ninda an mga gawe kan mga nasyon na nakapalibot sainda, mga gawe na ipinangalad sainda nin Kagurangnan.

¹⁶Linapas ninda an gabos na togon kan Kagurangnan na saindang Dios asin naggibo sinda nin duwang metal na baka; naggibo pa sinda nin ladawan kan diosang si Asera, nagsamba sa mga bitoon asin naglingkod ki Baal.

¹⁷Tinutong ninda an saindang mga aking lalaki saka babae bilang mga atang. Naghula saka nangkulam sinda, asin itinalaga ninda an saindang sadiri sa paggibo kan maraot sa atubang nin Kagurangnan; pinaanggot ninda an Kagurangnan.

¹⁸Huli kaini, an Kagurangnan naanggot nin makuri sa mga Israelita, asin hinale niya sinda sa saiyang panhiling; mayo nin natada kundi an tribu sana ni Juda.

¹⁹Alagad maski an Juda dai nagkuyog kan mga togon kan Kagurangnan na saindang Dios; inarog ninda an mga gawe nin Israel.

²⁰Isinikwal nin Kagurangnan an gabos na Israelita; pinadusahan niya sinda asin itinao sa kamot kan mga kaiwal sagkod na napara niya sinda sa saiyang panhiling.

²¹Pakatapos na isiblag nin Kagurangnan an Israel sa Juda, ginibong hade kan mga Israelita si Jeroboam na aking lalaki ni Nebat. Dangan ginibo ni Jeroboam na magharayo sinda sa Kagurangnan. Pinapagkasala niya sinda nin makuri.

²²Nagkuyog ki Jeroboam an mga Israelita asin nagpadagos sinda sa paggibo kan gabos na kasalan na ginibo ni Jeroboam,

²³sagkod na pinara sinda nin Kagurangnan sa saiyang panhiling, siring kan saiyang itinaram sa paagi kan gabos niyang propeta na saiyang mga sorogoon. Kaya itinapok an Israel sa Asiria, saen nag-eerok sinda sagkod ngunyan.

²⁴An emperador nin Asiria nagkua nin mga tawo hale sa mga syudad nin Babilon, Cut, Ivva, Hamat, saka Sefarvaim dangan pinaerok sinda sa mga syudad nin Samaria bilang kasalihid kan itinapok na mga Israelita. Kaya sinadiri ninda an Samaria saka nag-erok sinda sa mga syudad duman.

²⁵Kan mga naenot na taon nin pag-erok ninda duman, dai sinda nagsamba sa Kagurangnan, kaya an Kagurangnan nagpadara nin mga leon, na guminadan sainda.

²⁶Naosipan an emperador nin Asiria, “An mga tawo na pinaerok mo sa mga syudad nin Samaria dai nakakaaram kan pagboot nin dios kan dagang idto, kaya nagpadara an dios nin mga leon na nanggagadan sainda.”

²⁷Nagboot an emperador nin Asiria, “Pabalikon nindo an saro kan mga padi na nabihag nyato; pabalikon siya asin paerokon duman tanganing magtukdo sa mga tawo kan pagboot kan dios kan dagang idto.”

²⁸Kaya sarong padi na nabihag ninda hale sa Samaria an nagbalik saka nag-erok sa Betel, saen nagtukdo sa mga tawo kun paano an pagsamba sa Kagurangnan.

²⁹Alagad an mga tawo na nag-erok sa Samaria nagpadagos sa paggibo kan ladawan kan saindang mga dios. Ibinugtak ninda ini sa mga lugar na pagsasambahan na tinugdok kan mga Israelita. An lambang grupo naggibo nin mga ladawan kan mga dios sa mga syudad na pinag-eerokan ninda:

³⁰naggibo an mga taga Babilon nin mga ladawan ni Sukkot Benot; an mga taga Cuth, mga ladawan ni Nergal; an mga taga Hamat, mga ladawan ni Asima;

³¹an mga taga Ivva, nin mga ladawan ni Nibhaz saka ni Tartak; asin an mga taga Sefarvaim, nagtutong kan saindang mga aki bilang atang sa saindang mga dios na si Adramelec saka si Anammelec.

³²An Kagurangnan sinamba man kan mga tawong ini asin nagpili sinda hale sa sainda man sana nin manlaen-laen na klase nin tawo tanganing maglingkod bilang mga padi sa mga lugar na pagsasambahan asin magdolot nin mga atang para sa sainda.

³³Kaya sinamba ninda an Kagurangnan alagad sinamba man ninda an sadiri nindang mga dios sosog sa mga gawe kan mga nasyon na hinalean ninda.

³⁴Sagkod ngunyan ipinapadagos ninda an daan na mga gawe ninda. Dai ninda sinamba an Kagurangnan, ni kinukuyog an mga katogonan saka pagboot na itinao niya sa mga kapagarakian ni Jacob, na nginaranan niyang Israel.

³⁵An Kagurangnan nakipagtipan sainda asin nagboot, “Dai kamo magsamba sa ibang dios; dai kamo magduko sainda, ni maglingkod o magdolot nin mga atang.

³⁶Kuyogon nindo ako, an Kagurangnan, na nagluwas saindo hale sa Egipto sa dakulang kapangyarihan asin kosog; magduko kamo sako asin magdolot nin atang.

³⁷Danay kamong magkuyog kan sakong mga togon asin pagboot na sinurat ko para saindo. Dai kamo magsamba sa ibang dios,

³⁸asin dai nindo paglingawan an tipan na ginibo ko saindo.

³⁹Kuyogon nindo ako, an Kagurangnan na saindong Dios, asin ililigtas ko kamo sa saindong mga kaiwal.”

⁴⁰Alagad habong maghinanyog an mga tawong idto; naggibo sinda sosog sa dati nindang gawe.

⁴¹Kaya nagsamba sa Kagurangnan an mga tawong idto alagad nagsamba man sinda sa mga ladawan kan mga dios ninda; ini man an ginigibo kan saindang mga kapagarakian sagkod ngunyan.