Read Central Bicolano 2 Kings 18 Bible Online

2 Kings 18 - Central Bicolano bible

2 Kings 18

¹Kan ikatolong taon nin paghahade sa Israel ni Hosea na aking lalaki ni Ela, nagin hade nin Juda si Ezekias na aking lalaki ni Ahaz.

²Beynte y singkong taon an edad ni Ezekias kan siya magin hade, asin beynte y nuebeng taon siyang naghade sa Jerusalem. An saiyang ina iyo si Abias na aki ni Zacarias.

³Ginibo niya an matanos sa atubangan nin Kagurangnan, arog kan ginibo ni David na saiyang ginikanan.

⁴Ginaba niya an paganong mga lugar na pagsasambahan, rinonot an mga gapong harigi asin pinalod an mga ladawan kan diosang si Asera. Rinonot man niya an bronseng halas na ginibo ni Moises, huli ta sagkod kan panahon na idto nagtututong pa nin insenso an mga Israelita sa pag-omaw sa bronseng halas; ini inapod na Nehustan.

⁵Si Ezekias nanarig sa Kagurangnan, an Dios nin Israel; sa gabos na hade sa Juda mayo nin makakaarog saiya, maski an mga nagkaerenot o an mga nagsurunod saiya.

⁶Nagin maimbod siya sa Kagurangnan asin dai nagsuhay saiya. Kinuyog niya an mga pagboot na itinao nin Kagurangnan ki Moises.

⁷Kaya inibahan siya nin Kagurangnan asin nag-uswag siya sa gabos niyang gibo. Nagrebelde si Ezekias laban sa hade nin Asiria asin habo na siyang maglingkod saiya.

⁸Nadaog niya an mga Filisteo dangan sinalakay niya an mga erokan ninda, magpoon sa pinakasadit na baryo sagkod sa pinakadakulang syudad, kaiba an Gaza saka an teritoryo sa palibot kaini.

⁹Kan ikaapat na taon nin paghahade ni Ezekias sa Juda asin ikapitong taon nin paghahade ni Hadeng Oseas sa Israel, sinalakay ni emperador Salmaneser nin Asiria an Israel asin pinalibotan an Samaria.

¹⁰Pakalihis nin tolong taon, nasakop niya an Samaria. Ikaanom na taon na kaidto kan paghahade ni Ezekias asin ikasiyam na taon na ni Oseas.

¹¹An mga Israelita dinara sa Asiria kan emperador nin Asiria bilang mga bihag dangan pinaerok sa syudad nin Hala, asin sa harani kan Salog nin Habor sa distrito nin Gozan, saka sa mga syudad nin Media.

¹²Nangyari ini sa Samaria huli ta dai dinangog kan mga Israelita an Kagurangnan na saindang Dios; linapas ninda an saiyang tipan asin an gabos na pagboot ni Moises na sorogoon nin Kagurangnan. Habo sindang maghinanyog asin magkuyog.

¹³Kan ikakatorseng taon kan paghahade ni Hadeng Ezekias, sinalakay ni Senakerib na emperador nin Asiria an pusog na mga syudad nin Juda dangan sinakop an mga ini.

¹⁴Nagpadara si Ezekias nin mensahe ki Senakerib, na yaon sa Lakis: “Nagkasala ako; ontokon mo an pagsalakay, asin itatao ko an anoman na hagadon mo.” Kaya hinagadan siya kan emperador nin Asiria nin dyes mil na kilo nin plata asin sangribong kilong bulawan.

¹⁵Itinao ni Ezekias sa hade nin Asiria an gabos na plata sa Templo asin sa kaban nin yaman sa palasyo;

¹⁶binakbak niya an bulawan sa mga pinto kan Templo asin an bulawan na ipinatos niya sa mga harigi kan pintoan, dangan ipinadara idto gabos ki Senakerib.

¹⁷Huli kaini an Tartan, an Rabsaris asin an Rabsake kaiba an dakulang hukbo, sinugo kan emperador nin Asiria ki Ezekias duman sa Jerusalem. Pag-abot ninda sa Jerusalem, nagtindog sinda sa may kali na pinagbubulosan kan tubig hale sa itaas na sapa, sa dalan saen nagtatrabaho an mga paragibo nin tela.

¹⁸Kan ipaapod ninda an hade, nagluwas sa pagsabat sainda si Eliakim na aking lalaki ni Hilkias, na namamahala kan palasyo, si Sebna na sekretaryo kan hade, asin si Joa na aking lalaki ni Asaf, na kansilyer.

¹⁹Sinabihan sinda kan opisyal, “Sabihan nindo si Hadeng Ezekias na boot maaraman kan dakulang emperador nin Asiria kun ano an nagpapakosog kan saiyang boot.

²⁰Naghohona siya na an mga tataramon makakasalihid sa kakayahan asin kapangyarihan nin hukbo? Siisay an sinasarigan niya kaya nagrebelde siya sa emperador nin Asiria?

²¹Nagsasarig siya ngunyan sa Egipto, an baring sugkod na bariw na matusok nin kamot kan siisay man na minasarig saiya? Arog kaiyan an hade nin Egipto sa gabos na minasarig saiya.”

²²Nagpadagos sa pagtaram an opisyal, “Tibaad sabihon nindo na minasarig kamo sa Kagurangnan na saindong Dios? Mga lugar na pagsasambahan saka mga altar nin Kagurangnan an rinumpag ni Ezekias kan sabihan niya an Juda asin Jerusalem na magsamba sana sa altar sa Jerusalem.

²³Inaagyat ko siya sa ngaran kan emperador: tatawan ko siya nin duwang ribong kabayo kun makakakua siya nin siring kadakul na lalaki na malunad diyan!

²⁴Tadaw ta malabna siya sa sarong hababang opisyal nin Asiria, mantang naglalaom siya sa Egipto na papadarahan siya nin mga karwahe saka parakabayo?

²⁵Naghohona siya na nagsasalakay ako tanganing gabaon an saiyang banwaan na mayo nin tabang hale sa Kagurangnan? An Kagurangnan mismo an nagtaram sako na salakayon an Jerusalem asin rumpagon.”

²⁶Dangan nagsabi si Eliakim, si Sebna saka si Joa, “Nakikimaherak kami na magtaram ka samo sa lengwaheng Arameo. Nasasabotan mi iyan. Dai ka magtaram sa lengwaheng Hebreyo huli ta naghihinanyog an gabos na tawo na yaon sa kudal.”

²⁷Nagsimbag an opisyal, “Pinadigdi daw ako kan sakong emperador tanganing magsabi kan mga tataramon na ini sa saindong hade saka sa saindo sana, asin bakong sa mga tawong iyan na nagtuturukaw sa kudal, na siring saindo, makakan kan saindang odo dangan mainom kan saindang ihi?”

²⁸Dangan nagtindog an opisyal asin nagkurahaw sa lengwaheng Hebreyo, “Hinanyoga nindo an tataramon kan dakulang emperador, an emperador nin Asiria.

²⁹Pinapatanidan niya kamong dai magpadaya ki Ezekias. Dai niya kamo ikakaligtas sa sakong kamot.

³⁰Dai nindo siya pagtugotan na mapatubod kamo na ililigtas kamo nin Kagurangnan, asin na an syudad na ini dai itatao sa kamot kan emperador nin Asiria.

³¹Dai kamo magdangog ki Ezekias. Nagboboot saindo an emperador nin Asiria na magluwas kamo sa syudad asin sumuko saiya. Dangan tutugotan niya kamong magkakan nin mga ubas hale sa sadiri nindong mga ubasan, asin nin mga higera hale sa sadiri nindong mga kahoy, patin mag-inom nin tubig hale sa sadiri nindong bubon

³²sagkod na mag-abot an emperador asin darahon niya kamo sa sarong daga na arog kan sadiri nindong daga, sarong daga nin trigo saka arak, sarong daga nin tinapay saka mga ubasan, sarong daga nin mga kahoy nin oliba saka dugos tanganing mabuhay kamo asin dai magadan. Dai kamo maghinanyog ki Ezekias kun papag-isipon niya kamo na ililigtas kamo nin Kagurangnan.

³³Ikinaligtas daw kan mga dios kan arin man na nasyon an saindang daga sa kamot kan emperador nin Asiria?

³⁴Haen na ngunyan an mga dios nin Hamat asin Arpad? Haen an mga dios nin Sefarvaim, Hena asin Ivva? Ikinaligtas daw ninda an Samaria?

³⁵Kasuarin ilinigtas kan arin man na mga dios na ini an saindang daga sa kamot kan emperador? Ano kun siring ta nag-iisip kamong pwedeng iligtas nin Kagurangnan an Jerusalem?”

³⁶Alagad nag-alo sana an mga tawo, siring sa pagboot sainda ni Hadeng Ezekias; ni sarong tataramon dai sinda nagsimbag.

³⁷Dangan ginisi ni Eliakim, ni Sebna, asin ni Joa an saindang mga gubing sa kamondoan; asin nagduman sa hade. Ibinareta niya saiya an itinaram kan opisyal nin Asiria.