Read Central Bicolano 2 Kings 19 Bible Online

2 Kings 19 - Central Bicolano bible

2 Kings 19

¹Kan madangog ini ni Hadeng Ezekias, ginisi niya an saiyang gubing, nagsulot siya nin sako, asin nagduman sa Templo nin Kagurangnan.

²Dangan sinugo niya ki Propeta Isaias na aking lalaki ni Amoz si Eliakim na namamahala kan palasyo, si Sebna na sekretaryo, asin an mga gurang na padi; gabos sinda nakasulot nin sako.

³Iyo ini an ipinapataram niya ki Propeta Isaias, “An aldaw na ini aldaw nin kahaditan, kapadusahan, asin kasosopgan; dapat nang mamundag an aki alagad dai siya ikinakaluwas kan ina huli ta mayo na ini nin kosog.

⁴Tibaad nadangog nin Kagurangnan na saimong Dios an gabos na tataramon kan opisyal na sinugo kan emperador nin Asiria tanganing pag-olog-ologon an Dios na buhay; padusahan niya logod an nagtaram. Kaya ipamibi mo kaming kadikit na natatada.”

⁵Pakadangog ni Isaias kan mensahe ni Hadeng Ezekias,

⁶ipinadara niya an simbag na ini: “An Kagurangnan nagsasabi na dai ka matakot sa tataramon kan mga taga Asiria, na dai ka daa pwedeng iligtas nin Kagurangnan.

⁷Gigibohon nin Kagurangnan na makadangog an hade nin Asiria nin sarong huringhuding tanganing magbalik siya sa saiyang banwaan, asin duman magadan.”

⁸Naaraman kan Rabsake na naghale sa Lakis an emperador asin nakikilaban sa Libna; kaya nagduman siya tanganing makihumapot saiya.

⁹Nakaabot sa emperador nin Asiria an bareta na sasalakayon siya ni Hadeng Tirhaka nin Etiopia. Kaya nagpadara siya nin surat ki Hadeng Ezekias nin Juda

¹⁰tanganing sabihan, “An sinasarigan mong Dios nagtaram saimo na dai ka mahuhulog sa kamot ko. Dai ka magpadaya saiya.

¹¹Nadangog mo kun ano an ginibo kan emperador nin Asiria sa gabos na banwaan; rinumpag niya an mga banwaan na ini. Sa paghona mo makakadulag ka?

¹²Rinaot kan sakong mga ginikanan an mga syudad nin Gozan, Haran asin Rezef, dangan ginadan ninda an mga taga Eden na nag-erok sa Tel-assar; mayo sa saindang mga dios an nakapagligtas sa sainda.

¹³Haen na an mga hade kan syudad nin Hamat, Arpad, Sefarvaim, Hena, asin Ivva?”

¹⁴An surat kinua ni Hadeng Ezekias sa mga sugo saka binasa. Dangan nagduman siya sa Templo. Ibinugtak niya an surat sa atubang nin Kagurangnan,

¹⁵dangan namibi, “O Kagurangnan, Dios nin Israel, na nakatukaw sa trono sa ibabaw kan mga Kerubin. Ika sana an Dios kan gabos na kahadean sa daga. Ika an naglalang kan langit asin daga.

¹⁶Hinanyoga ako, O Kagurangnan. Hilinga an nangyayari samo. Dangoga an mga tataramon ni Senakerib, na nagsugo sa pag-olog-olog saimo, an buhay na Dios.

¹⁷Totoong gayo, O Kagurangnan, na rinaot kan mga emperador nin Asiria an mga nasyon asin an saindang mga daga.

¹⁸Sinulo ninda an mga dios kan mga nasyon na iyan huli ta bako man idto mga dios, kundi mga ladawan na gibo sa kahoy saka gapo na pinorma kan mga kamot nin tawo.

¹⁹O Kagurangnan na samong Dios, nakikimaherak ako, iligtas mo kami sa mga taga Asiria, tanganing maaraman kan mga nasyon sa kinaban na ika sana, O Kagurangnan, an Dios.”

²⁰Dangan nagpadara nin mensahe si Isaias ki Ezekias na bilang kasimbagan sa pamibi kan hade

²¹an Kagurangnan nagsabi, “An syudad nin Jerusalem nagngingisi saimo, Senakerib, asin kinakawatan ka.

²²Siisay sa paghona mo an saimong pinagtutuyatuya asin pinag-oolog-olog? Ako, an banal na Dios nin Israel, dai mo ginalangan.

²³Ipinadara mo an saimong mga sugo tanganing maghambog sako na huli kan kadakul mong karwahe nasakop mo an haralangkaw na kabukidan nin Lebanon. Naghambog ka na pinalod mo duman an pinakahalangkaw na mga sedro dangan an pinakamarahay na mga sipres asin naabot mo an pinakapusod kan kadlagan.

²⁴Naghambog ka pa na nagkalot ka nin mga bubon asin nag-inom nin tubig sa dayuhan na mga daga patin na pinamara kan mga bitis kan saimong mga soldados an Salog nin Nilo kan ini timaktimakan ninda.

²⁵“Dai mo pa nanggad nabaretaan na ako an nagplano kan gabos na ini kaidto? Ngunyan ginibo ko na! Tinawan taka nin kapangyarihan sa pagrumpag nin mga pinapusog na mga syudad.

²⁶An mga tawong nag-erok duman mayo nin naginibohan; nagkatarakot sinda asin nagkamurongnan. Nakaarog sinda sa tinanom sa sarong oma o sa doot na nagtatalubo sa atop kun hinohoyop sinda kan mainit na doros hale sa sirangan.

²⁷“Alagad aram ko an gabos manongod saimo; an ginigibo mo asin an dinudumanan mo. Aram ko an kaanggotan mo sako.

²⁸Huli kan kaanggotan mong iyan tumang sako, asin kan kapaabaw-abawan na nakaabot sa sakong pandangog, ibubugtak ko an sarong kawit sa saimong dungo asin an sarong busal sa saimong ngoso, dangan pababalikon taka sa dalan na saimong hinalean.”

²⁹Dangan sinabihan ni Isaias si Hadeng Ezekias, “Ini an magigin tanda para saimo: Sa taon na ini asin sa masunod, magkakakan kamo kan trigong nagsadiring magtalubo, alagad sa ikatolong taon matanom kamo nin trigo asin maani kaiyan, dangan matanom kamo nin mga ubas asin makakan kan bunga kaiyan.

³⁰An mga matada na nabubuhay sa Juda madakula giraray asin mauswag arog kan mga tinanom na nakagamot nin hararom asin namumunga.

³¹Huli ta sa Jerusalem asin sa Bukid nin Sion may kadikit na matatada. An pagmakulog nin Kagurangnan iyo an magibo kaini.

³²“Ini an tataramon nin Kagurangnan manongod sa emperador nin Asiria: ‘Dai siya makakalaog sa syudad na ini, ni mapana nin sarong bosog laban digdi. Mayo nin mga may kalasag na soldados na marani sa syudad asin dai sinda makakatambak nin daga sa pagsalakay sa palibot kaini.

³³Mabalik siya sa hinalean niya na an aagihan iyo an dalan na inagihan niya pasiring digdi; dai siya makakalaog sa syudad na ini. Ako, an Kagurangnan, iyo an nagtaram.

³⁴Susurogon ko an syudad na ini asin iingatan, huli sa sadiri kong kaomawan asin huli sa panuga na ginibo ko ki David na sakong sorogoon.’”

³⁵Kan bangging idto sarong anghel nin Kagurangnan an nagduman sa kampo kan mga taga Asiria asin ginadan an syento otsenta y singko mil na soldados. Pagkaaga kan sunod na aldaw, mahihiling sindang nahuhutad, gabos gadan!

³⁶Dangan nagsibog si Emperador Senakerib saka nagbalik sa Nineve.

³⁷Sarong aldaw, kan nagsasamba siya sa templo ni Nisroc na saiyang dios, ginadan siya kan saiyang duwang aking lalaki na si Adramelec asin si Sarezer, dangan nagdurulag ini pasiring sa daga nin Ararat. Si Esarhaddon na saro pa niyang aking lalaki iyo an nagsalihid saiya bilang emperador.