Read Central Bicolano 2 Kings 20 Bible Online

2 Kings 20 - Central Bicolano bible

2 Kings 20

¹Kan panahon na idto, naghelang si Hadeng Ezekias asin haros magadan siya. Dinalaw siya kan propetang si Isaias na aking lalaki ni Amoz asin sinabihan, “Tinataraman ka nin Kagurangnan na husayon mo an gabos na bagay, huli ta magagadan ka. Dai ka na mararahay.”

²Nag-atubang si Ezekias sa lanob dangan namibi:

³“Giromdoma, O Kagurangnan, na maimbod asin bilog na puso takang pinaglingkodan; ginibo ko an matanos sa saimong atubang.” Dangan nagtangis siya nin makuri.

⁴Binayaan ni Isaias an hade, alagad bago niya nalampasan an patyo na nasa tahaw, nagtaram saiya an Kagurangnan:

⁵“Magbalik ka ki Ezekias, na kagsakop kan sakong banwaan asin sabihan mo siya, ‘Ako, an Kagurangnan, an Dios kan saimong ginikanan na si David. Nadangog ko an saimong pamibi asin nahiling an saimong mga luha. Bobolongon taka, dangan sa ikatolong aldaw maduman ka sa Templo.

⁶Tutugotan takang mabuhay pa sa laog nin kinseng taon. Ililigtas taka asin an syudad nin Jerusalem sa emperador nin Asiria. Susurogon ko an syudad na ini huli na sana kan sakong onra asin huli ki David na sakong sorogoon.’”

⁷Dangan sinabihan ni Isaias an mga sorogoon kan hade na dapogon an pigsa kan hade nin linabok na higera asin mararahay siya. Ginibo ninda ini, asin narahay siya.

⁸Naghapot si Hadeng Ezekias, “Ano an tanda na bobolongon ako nin Kagurangnan dangan makakalaog pa ako sa Templo sa ikatolong aldaw?”

⁹Nagsimbag si Isaias, “Iyo ini an tanda nin Kagurangnan na mapatotoo saimo na ootobon niya an saiyang panuga: boot mong lumangkaw nin sampolong tangga sa hagdan an anino o boot mong bumaba ini nin sampolong tangga?”

¹⁰Nagsimbag si Ezekias, “Pasil sanang palangkawon nin sampolong tangga an anino. Paibabaon mo ini nin sampolong tangga.”

¹¹Namibi si Isaias sa Kagurangnan asin an anino ibinaba kan Kagurangnan nin sampolong tangga sa hagdan na ibinugtak ni Ahaz.

¹²Kan panahon na iyan, nabaretaan ni Merodak-baladan, na hade nin Babilonia asin aking lalaki ni Baladan, na naghelang si Ezekias, kaya pinadarahan niya ini nin surat saka regalo.

¹³Inako ni Ezekias an mga sugo dangan ipinahiling niya sainda an saiyang kayamanan—an saiyang plata saka bulawan, an saiyang mga pahamot saka mamahalon na lana, asin an gabos niyang kagamitan sa hukbo. Ipinahiling niya sainda an gabos na nasa mga kwartong sarayan asin an nasa gabos na lugar na sakop kan saiyang kahadean.

¹⁴Dangan nagduman an propetang si Isaias ki Hadeng Ezekias asin naghapot, “Saen hale an mga lalaking ini? Ano an sinabi ninda saimo?” Nagsimbag si Ezekias, “Hale sinda sa harayong nasyon, sa Babilonia.”

¹⁵“Ano an nahiling ninda sa palasyo?” an hapot ni Isaias. “Nahiling ninda an gabos. Ipinahiling ko sainda an gabos na nasa mga kwartong sarayan,” an simbag kan hade.

¹⁶Dangan sinabihan ni Isaias an hade, “Hinanyoga an tataramon kan Kagurangnan:

¹⁷Maabot an panahon na an gabos na bagay sa saimong palasyo, an gabos na bagay na tinipon kan saimong mga ginikanan sagkod sa aldaw na ini, dadarahon sa Babilonia. Mayo kaiyan nin matatada.

¹⁸Dadarahon man duman “An nagkapira sa saimong aking lalaki asin gigibohon na mga eunuko na maglilingkod sa palasyo kan hade nin Babilonia.”

¹⁹Dangan nagsimbag si Ezekias, “Marahay an tataramon nin Kagurangnan na sinabi mo sako.” Huli ta nagsaboot si Ezekias, “Magkakaigwa nin katoninongan saka katiwasayan sa sakuyang panahon.”

²⁰An iba pang ginibo ni Hadeng Ezekias, an saiyang kaisogan, dangan an paggibo niya nin sarong tangke nin tubig asin an pagkalot niya nin sarong agihan nin tubig pasiring sa syudad, gabos nasusurat sa An Kasaysayan kan mga Hade nin Juda.

²¹Nagadan si Ezekias, asin si Manases na saiyang aking lalaki iyo an nagsalihid saiya bilang hade.