Read Central Bicolano 2 Kings 22 Bible Online

2 Kings 22 - Central Bicolano bible

2 Kings 22

¹Walong taon an edad ni Josias kan siya magin hade nin Juda, asin treynta y unong taon siyang naghade sa Jerusalem. An saiyang ina iyo si Jedida na aki ni Adaias na taga Bozkat.

²Ginibo ni Josias an matanos sa atubangan nin Kagurangnan asin sinunod niya an paarog kan saiyang ginikanan na si David; maimbod na kinuyog niya an mga togon nin Dios.

³Kan ikadyes y otsong taon nin paghahade ni Hadeng Josias, sinugo niya sa Templo an sekretaryo na si Safan, na aking lalaki ni Azalias asin makoapo ni Mesullam. Siring kaini an saiyang pagboot ki Safan:

⁴“Dumuman ka ki Hilkias na halangkaw na padi asin aramon mo an halaga kan kwarta na kinolekta sa mga tawo kan mga pading bantay sa agihan pasiring sa Templo.

⁵Sabihan mo siya na itao an kwarta sa mga tawo na namamahala kan paghirahay kan Templo. Sinda an mabayad

⁶sa mga karpintero, mga paratugdok, saka mga kantero, asin an mabakal kan mga kahoy saka mga gapo na kaipuhan sa paghirahay.

⁷Onesto an mga namamahala sa paghirahay, kaya dai na kaipuhan na hagadan pa sinda kan kwenta kan ginastos ninda.”

⁸An pagboot kan hade itinao ni Safan ki Hilkias. Dangan sinabihan ni Hilkias an sekretaryo na si Safan, “Nakua ko sa Templo an libro kan Katogonan.” Itinao niya an libro ki Safan asin binasa ini ni Safan.

⁹Nagbalik si Safan sa hade dangan nagsabi, “An kwarta na nasasaray sa Templo kinua na kan saimong mga sorogoon dangan itinao na sa mga tawong namamahala sa paghirahay kan Templo.”

¹⁰Dangan nagsabi siya, “Tinawan ako ni Hilkias nin sarong libro.” Makosog niya ining binasa sa hade.

¹¹Kan madangog kan hade an nasusurat sa libro, ginisi niya an saiyang gubing.

¹²Dangan pinagbotan niya si Hilkias na padi, si Ahikam na aking lalaki ni Safan, si Akbor na aking lalaki ni Micaias, an sekretaryo na si Safan, asin si Asaias na sorogoon kan hade,

¹³“Magduman kamo dangan hapoton nindo an Kagurangnan para sako para sa banwaan, asin para sa gabos na taga Juda manongod sa mga tataramon na yaon sa librong ini. Anggot sato an Kagurangnan huli ta dai kinuyog kan satong mga ginikanan an dapat na gibohon siring sa sinasabi kan librong ini.”

¹⁴Si Hilkias, Ahikam, Akbor, Safan, asin si Asaias nagduman ki Hulda na sarong babaeng propeta na nag-erok sa bagong kabtang kan Jerusalem. (An agom ni Hulda na si Sallum, na aking lalaki ni Tikva asin makoapo ni Harhas, iyo an namamahala kan mga gubing sa Templo.) Isinaysay ninda ki Hulda an nangyari.

¹⁵Sinabihan sinda ni Hulda na magbalik sa hade dangan itao sa hade

¹⁶an mensaheng ini nin Kagurangnan: “An Jerusalem asin an mga nag-eerok digdi papadusahan ko kan gabos na maldisyon na nasusurat sa libro na binasa kan hade.

¹⁷Tinalikodan ninda ako asin nagtutong sinda nin insenso para sa mga dios-dios kaya pinaanggot ninda ako huli kan saindang mga gibo. Kaya maglalaad an kaanggotan ko laban sa Jerusalem, asin dai iyan masisigbo.

¹⁸Alagad para sa hade nin Juda, ako, na nagsugo saindo tanganing makihumapot sako, an Kagurangnan an Dios nin Israel minataram: Dinangog mo an nasusurat sa libro,

¹⁹asin nagsolsol ka saka nagpakumbaba sa atubangan ko. Pakadangog kan plano kong pagpadusa sa Jerusalem asin sa mga nag-eerok digdi, tanganing magin sinda mapungaw saka magin maldisyon. Ginisi mo an saimong gubing saka naghibi sa atubang ko. Nadangog ko an saimong pamibi,

²⁰kaya an padusa na ipapadara ko sa Jerusalem dai mangyayari mantang buhay ka pa. Tutugotan takang magadan sa katoninongan.” Dangan nagbalik an mga sugo ki Hadeng Josias dara an mensaheng ini.