Read Central Bicolano 2 Kings 25 Bible Online

2 Kings 25 - Central Bicolano bible

2 Kings 25

¹Nagrebelde si Zedekias ki Hadeng Nebukadnezzar nin Babilonia, kaya nag-abot si Nebukadnezzar kaiba an bilog niyang hukbo dangan sinalakay an Jerusalem kan ikasampolong aldaw kan ikasampolong bulan kan ikasiyam na taon kan paghahade ni Zedekias. Nagkampo sinda sa luwas kan syudad, nagtugdok nin panlaom na mga kudal sa palibot kaiyan

²asin padagos na linaom an syudad sagkod kan ikaonseng taon kan paghahade ni Zedekias.

³Kan ikasiyam na aldaw kan ikaapat na bulan kan taon na idto, kan makuri na an gutom sa syudad, mala ta mayo na nin makakakan an mga tawo,

⁴nalagbas an mga kudal kan syudad. Maski napapalibotan kan mga taga Babilonia an syudad, nakadulag pagkabanggi an gabos na soldados ni Zedekias. Nag-agi sinda sa trangkahan na nasa tahaw nin duwang kudal, na harani sa tatamnan kan hade. Nagdulag sinda pasiring sa Araba.

⁵Alagad si Hadeng Zedekias linamag kan hukbo nin Babilonia asin inabotan sa kapantayan nin Jerico. Binayaan si Zedekias kan gabos niyang soldados.

⁶Binihag ninda si Zedekias dangan dinara ki Hadeng Nebukadnezzar, na yaon kaidto sa Ribla, asin duman itinao saiya ni Nebukadnezzar an maninigong padusa.

⁷Ginadan ninda an mga aking lalaki ni Zedekias mantang naghihiling ini, dangan ipinahulwat ni Nebukadnezzar an mga mata ni Zedekias, pinakadenahan saka ipinadara sa Babilon.

⁸Kan ikapitong aldaw kan ikalimang bulan kan ikadyes y nuebeng taon kan paghahade ni Hadeng Nebukadnezzar nin Babilonia, nag-abot sa Jerusalem si Nebuzaradan, an parahatol kan hade asin pamayo kan saiyang hukbo.

⁹Sinulo niya an Templo, an palasyo, asin an mga harong kan gabos na mahalagang tawo sa Jerusalem.

¹⁰An mga kudal sa palibot kan Jerusalem ginaba kan mga soldados ni Nebuzaradan.

¹¹Binihag ni Nebuzaradan an mga tawong nawalat sa syudad, an natatadang ekspertong mga trabahador, asin an mga nag-apil sa hade nin Babilonia.

¹²Alagad iwinalat niya sa Juda an nagkapira sa pinakadukha tanganing magtanom nin ubas saka magtrabaho sa daga.

¹³Rinonot kan mga taga Babilonia an mga bronseng harigi, an mga kariton sa Templo asin an dakulang bronseng tangke, dangan dinara ninda sa Babilon an bronse.

¹⁴Kinua ninda an mga kaldero, mga pala, mga pamalsok nin mitsa, mga mangko para sa insenso, asin an gabos na kagamitan na bronse na ginagamit sa paglingkod sa Templo.

¹⁵Kinua man ninda an lambang kagamitan na gibo sa bulawan saka sa plata, sagkod an saradit na mangko saka an mga bugtakan nin baga.

¹⁶Magabat nin marahay an mga bronseng harigi, mga bronseng kariton saka an dakulang bronseng tangke na ipinagibo ni Hadeng Solomon para sa Templo, kaya dai na tinimbang an mga ini.

¹⁷Magkapareho an duwang harigi: an lambang saro igwa nin langkaw na otso metros asin sa ibabaw kan lambang harigi igwa nin bronseng kapitel na sarong metro, may treynta sentimetros an langkaw. Nakasabod sa lambang kapitel an sarong bronseng sinalapid na kadena na sinamnohan nin bronseng mga granada.

¹⁸Laen pa kaini, binihag ni Nebuzaradan, na pamayong opisyal kan hukbo kan hade, si Seraias na Halangkaw na Padi, si Zofonias na ikaduwang padi, asin an tolong bantay sa Templo.

¹⁹Kinua man niya sa syudad an sarong opisyal na namamahala kan hukbo, an lima sa personal na parahatol kan hade na yaon pa sa syudad, an sekretaryo kan pamayo kan hukbo, na iyo an namamahala kan kasuratan kan hukbo, asin sesenta pang lalaki.

²⁰Dinara sinda ni Nebuzaradan sa hade nin Babilonia, na yaon kaidto sa Ribla

²¹sa teritoryo nin Hamat. Duman sa Ribla, ipinahampak sinda kan hade saka ipinagadan. Kaya dinarang bihag an mga taga Juda sa luwas kan saindang daga.

²²Si Gedalias na aking lalaki ni Ahikam asin makoapo ni Safan, iyo an ibinugtak ni Hadeng Nebukadnezzar nin Babilonia bilang gobernador nin Juda saka parapamahala kan mga tawong dai dinara sa Babilonia.

²³Kan mabaretaan ini kan mga opisyal saka mga soldados nin Juda na dai nagsuruko, nagduman sinda ki Gedalias sa Mizpa. An mga opisyal na ini iyo si Ismael na aking lalaki ni Netanias, si Johanan na aking lalaki ni Kareas, si Seraias na aking lalaki ni Tanhumet na taga Netofa, asin si Jaazanias na taga Maaca.

²⁴Nagsabi sainda si Gedalias “Dai kamo matakot huli sa mga opisyal kan Babilonia. Mag-erok kamo sa dagang ini, paglingkodan nindo an hade nin Babilonia asin mapapakarahay kamo.”

²⁵Kan ikapitong bulan, nag-abot sa Mizpa si Ismael na aking lalaki ni Netanias asin makoapo ni Elisama, sarong kaayon sa pamilya kan hade, na may kaibahan na sampolong lalaki. Sinalakay ninda si Gedalias asin ginadan. Ginadan man niya an mga Israelita asin an mga taga Babilonia na kaibahan ni Gedalias sa Mizpa.

²⁶Dangan an gabos na Israelita, mayaman man o dukha, asin an mga opisyal kan hukbo, nagduruman sa Egipto huli sa takot sa mga taga Babilonia.

²⁷Kan taon na nagin hade si Evilmerodac sa Babilonia, may pagkaherak na pinaluwas niya si Hadeng Jehoiakim nin Juda. Nangyari ini kan ikabeynte y syeteng aldaw kan ikadoseng bulan kan ikatreynta y syeteng taon nin pagkabihag ki Jehoiakin.

²⁸Pinahilingan niya nin karahayan si Jehoiakin saka tinawan nin mas halangkaw na katongdan ki sa katongdan kan mga hadeng kaiba niya na itinapok man sa Babilon.

²⁹Tinugotan si Jehoiakin na maggubing kan bakong sa bilanggo, saka magkakan sa lamesa kan hade mantang siya nabubuhay.

³⁰Aroaldaw, mantang siya nabubuhay, itinao saiya kan hade an saiyang kaipuhan.