Read Central Bicolano 2 Kings 5 Bible Online

2 Kings 5 - Central Bicolano bible

2 Kings 5

¹Si Naaman, an pamayo kan hukbo nin Siria, sarong dakulang lalaki na nawiwilihan kan hade nin Siria, huli ta sa paagi ni Naaman itinao nin Kagurangnan an kapangganahan sa Siria. Saro siyang maisog na soldados, alagad may nakakatakot siyang helang sa kublit.

²Sa sarong pagsalakay kan mga Siro laban sa Israel, nabihag ninda an sarong aking babae na Israelita, na nagin sorogoon kan agom ni Naaman.

³Sarong aldaw nagsabi an aking babae sa kagurangnan niyang babae, “Mawot ko na makaduman an sakong kagurangnan sa propeta na nag-eerok sa Samaria! Papaomayan niya siya kan saiyang helang.”

⁴Kan madangog ini ni Naaman, nagduman siya sa hade asin inosip an mga sinabi kan aking babae.

⁵Nagsabi an hade, “Magduman ka sa hade nin Israel asin darahon mo saiya an surat na ini.” Kaya nagduman si Naaman; igwa siya nin darang treynta mil na pedaso nin plata, seis mil na pedaso nin bulawan, asin sampolong magayon na gubing.

⁶Dinara niya an surat na may laog na siring kaini: “An surat na ini magpapamidbid saimo kan sakong opisyal na si Naaman. Boot kong bolongon mo an saiyang helang.”

⁷Kan mabasa kan hade nin Israel an surat, ginisi niya an saiyang gubing huli sa dakulang takot dangan nagsabi, “Tano ta pinaglalaoman ako kan hade nin Siria na bolongon an lalaking ini? Ano Dios ako na igwa nin kapangyarihan sa buhay asin sa kagadanan? Malinaw na naghahanap siya nin dahelan tanganing iwalon ako!”

⁸Kan maaraman ini ni propeta Eliseo, nagpasabi siya sa hade, “Tano ta ginisi mo an saimong gubing? Padigdiha siya sako ngunyan tanganing maaraman niya na igwa nin propeta sa Israel!”

⁹Kaya nagduman si Naaman kaiba an saiyang mga kabayo asin mga karwahe; nag-ontok siya sa may pintoan kan harong ni Eliseo.

¹⁰Pinaluwas ni Eliseo an sarong sorogoon tanganing magsabi, “Lakaw, maghugas ka nin pitong beses sa Salog nin Jordan asin an saimong kublit maoomayan saka magigin malinig.”

¹¹Alagad anggot na naghale si Naaman. Nagsabi siya, “Naghohona ako na maluwas man lamang siya, mamimibi sa Kagurangnan na saiyang Dios, iiitaas an saiyang kamot sa sakong mga lugad, asin bobolongon an sakong helang!

¹²Bakong an mga Salog nin Damasco, an Abana saka an Farpar, orog na marahay ki sa gabos na katubigan nin Israel? Dai daw ako pwedeng maghugas duman asin magin malinig?”

¹³Alagad nagrani saiya an mga sorogoon niya asin nagsabi, “Kagurangnan, kun pagbotan ka kan propeta na gumibo nin sarong dakulang bagay, dai mo daw gigibohon iyan? Kaya tadaw ta dai ka maghugas siring kan saiyang sinabi tanganing maomayan?”

¹⁴Kaya naglugsot siya sa Jordan, luminadop nin pitong beses, sosog sa tataramon ni Eliseo asin an saiyang kublit nagin siring sa kublit nin sadit na aki; nagin malinig siya.

¹⁵Nagbalik siya ki Eliseo kaiba an gabos niyang tawohan dangan nagsabi, “Ngunyan naaaraman ko na mayo nin Dios sa bilog na daga kundi sa Israel sana. Kaya nakikimaherak ako na akoon mo an regalong hale sako.”

¹⁶Nagsimbag si Eliseo, “Huli sa ngaran kan buhay na Kagurangnan na sakong pinaglilingkodan, ako minasumpa na dai ako maako nin regalo.” Pinirit si Eliseo ni Naaman alagad nagsayuma siya.

¹⁷Kaya nagsabi si Naaman, “Kun habo mong akoon an sakong regalo, nakikimaherak ako saimo na tawan mo ako nin daga na kayang darahon nin duwang mula, daga na dadarahon ko pagpuli ko sa harong. Huli ta magpoon ngunyan dai na ako madolot nin mga sakripisyo o mga tinutong na atang sa ibang dios, kundi sa Kagurangnan.

¹⁸Patawadon logod ako nin Kagurangnan kun ibahan ko an hade sa templo ni Rimmon, an dios nin Siria, asin sambahon siya. Patawadon logod ako nin Kagurangnan sa bagay na ini.”

¹⁹“Lakaw sa katoninongan,” an sabi ni Eliseo. Dangan naghale si Naaman. Dai pa siya nakakaharayo,

²⁰nagsaboot si Gehazi na sorogoon ni Eliseo, “Pinahale kan sakong kagurangnan si Naaman na dai nagbayad. Inako niya kutana an dinara saiya kan Siro. Huli sa ngaran kan buhay na Kagurangnan lalamagon ko siya asin makua ako sa saiya nin maski ano.”

²¹Kaya linamag ni Gehazi si Naaman. Kan mahiling ni Naaman na may naglalamag saiya, naghilig siya sa saiyang karwahe sa pagsabat saiya. Naghapot siya, “Ano an nangyari?”

²²“Mayo man,” an simbag ni Gehazi. “Alagad sinugo ako kan sakong kagurangnan tanganing taraman ka na nag-abot pa sana an duwang kaayon sa grupo nin mga propeta hale sa mabulod na daga nin Efraim. Boot niya na tawan mo sinda nin tolong ribong pedaso nin plata asin duwang magayon na gubing.”

²³“Nakikimaherak ako na akoon mo ining seis mil na pedaso nin plata,” an simbag ni Naaman. Pinirit ni Naaman si Gehazi na kuahon idto, dangan binugkos niya sa duwang supot an mga plata. Itinao niya ini asin an duwang magayon na gubing sa duwa niyang sorogoon, dangan pinalakaw sindang enot ki Gehazi.

²⁴Pag-abot ninda sa bulod saen nag-eerok si Eliseo, kinua ni Gehazi an duwang supot saka ilinaog sa harong. Dangan pinahale niya an mga sorogoon ni Naaman.

²⁵Naglaog giraray siya sa harong asin nagtindog sa atubangan ni Eliseo. Hinapot ni Eliseo si Gehazi, “Saen ka hale, Gehazi?” “Dai man ako naghale,” an simbag niya.

²⁶Alagad nagsabi si Eliseo, “Bakong idtoon ako sa espiritu kan maghilig sa saiyang karwahe an lalaki sa pagsabat saimo? Bako ini an panahon tanganing mag-ako nin kwarta asin mga gubing, nin kaolibahan saka mga ubasan, nin mga karnero saka mga baka, o mga sorogoon!

²⁷Kaya an helang ni Naaman mapapasaimo asin sa saimong mga kapagarakian sagkod pa man!” Kan maghale si Gehazi, igwa na siya kan helang ni Naaman—an saiyang kublit nagin maputi siring sa ambon.