Read Central Bicolano 2 Kings 6 Bible Online

2 Kings 6 - Central Bicolano bible

2 Kings 6

¹Sarong aldaw, nagsabi ki Eliseo an sarong grupo nin mga propeta, “Sadit nang marahay an lugar na pinag-eerokan nyato!

²Padumana kami sa Jordan asin an lambang saro samo makua duman nin kahoy tanganing magtugdok nin maeerokan.” “Lakaw kamo,” an simbag ni Eliseo.

³Saro sa sainda an nagsabi, “Nakikimaherak ako na umiba ka samo.” “Maiba ako,” an simbag niya,

⁴asin naglakaw siya kaiba ninda. Pag-abot ninda sa Jordan, nagpoon sindang magpalod nin kahoy.

⁵Nangyari na mantang nagpapalod nin kahoy an sarong lalaki na nahulog sa tubig an tarom kan saiyang patok. Nagkurahaw siya, “Ano an gigibohon ko, kagurangnan? Sinublian sana an patok na idto!”

⁶“Saen nahulog?” an hapot ni Eliseo. Itinukdo saiya kan lalaki an lugar; puminutol si Eliseo nin sarong sanga, itinapok ini sa tubig, asin pinalataw an tarom kan patok.

⁷“Kuaha na,” an pagboot niya. Kaya kinua kan lalaki an tarom kan patok.

⁸Kan an hade nin Siria nakikigera laban sa Israel, kinaolay niya an saiyang mga opisyal asin nagpili siya nin lugar na papatindogan kan saiyang kampo.

⁹Alagad pinasabihan ni Eliseo an hade nin Israel, “Likayan mo nanggad an lugar na idto, huli ta naghihipa duman an mga taga Siro.”

¹⁰Kaya pinatanidan kan hade nin Israel an mga lalaki na nag-eerok sa lugar na idto, asin nagbantay sinda. Nangyari ini nin nagkapirang beses.

¹¹Huli kaini napurisaw an hade nin Siria; ipinaapod niya an saiyang mga opisyal asin hinapot, “Siisay saindo an kampi sa hade nin Israel?”

¹²Nagsimbag an saro sa sainda, “Mahal na hade, mayo samo nin kampi sa saiya. Si Eliseo na propeta sa Israel an nagsasabi sa saindang hade kan mga itinataram mo sa hilom.”

¹³Nagsabi an hade, “Aramon nindo kun haen siya asin bibihagon ko siya.” Kan maosipan siya na si Eliseo yaon sa Dotan,

¹⁴nagpadara siya duman nin dakul na soldados, mga kabayo saka mga karwahe. Banggi na kan mag-abot sinda duman asin pinalibotan ninda an syudad.

¹⁵Pagkaaga, nagbangon an sorogoon ni Eliseo, nagluwas sa harong asin nahiling an mga soldados, an mga kabayo saka an mga karwahe na nakapalibot sa syudad. Nagsabi an sorogoon, “Kagurangnan, ano an satong gigibohon?”

¹⁶Nagsimbag si Eliseo, “Dai ka matakot huli ta mas dakul kita ki sa sainda.”

¹⁷Dangan namibi siya, “O, Kagurangnan, buklata an mga mata niya tanganing makahiling siya!” Kaya binuklat nin Kagurangnan an mga mata kan sorogoon, asin nahiling kaini na an bulod pano nin mga kabayo saka karwaheng kalayo na nakapalibot ki Eliseo.

¹⁸Kan magsalakay an mga Siro, namibi si Eliseo, “O Kagurangnan, butaha an mga lalaking ini!” Kaya binuta sinda nin Kagurangnan sosog sa pamibi ni Eliseo.

¹⁹Dangan sinabihan sinda ni Eliseo, “Sala an dalan na saindong inaagihan; bako ini an syudad na tuyo nindo. Sumunod kamo sako asin dadarahon ko kamo sa lalaking hinahanap nindo.” Dangan dinara niya sinda sa Samaria.

²⁰Paglaog ninda sa Samaria, namibi si Eliseo, “Kagurangnan, buklata an saindang mga mata tanganing makahiling sinda.” Kaya binuklat nin Kagurangnan an mga mata kan mga lalaki asin nahiling ninda na nasa laog sinda kan Samaria.

²¹Kan mahiling sinda kan hade nin Israel, naghapot siya ki Eliseo, “Boot mong gadanon ko sinda? Boot mong gadanon ko sinda?”

²²Nagsimbag si Eliseo, “Dai mo sinda paggadanon. Gagadanon mo daw an mga nabihag mo sa ralaban? Tawe sinda nin pagkakan saka inomon, dangan pabalika sinda sa saindang hade.”

²³Kaya nag-andam an hade nin Israel nin dakulang bangkete; nagkakan an mga taga Siria saka nag-inom, dangan nagbalik sinda sa saindang hade. Magpoon kaidto, dai na sinalakay kan mga taga Siria an daga nin Israel.

²⁴Dai nahaloy, tinipon ni Hadeng Ben-hadad nin Siria an bilog niyang hukbo asin pinalibotan an Samaria.

²⁵Huli kaini nagkaigwa nin gutom sa Samaria, na maski an payo nin asno ipinagpapabakal sa halagang otsentang pedaso nin plata, asin an ipot nin salampati sa halagang limang pedaso nin plata.

²⁶Sarong aldaw, kan naglalakaw an hade nin Israel sa gilid kan kudal, may nagkurahaw na sarong babae, “Mahal na hade, tabangi man ako!”

²⁷Nagsimbag siya, “Kun habo kang tabangan nin Kagurangnan anong tabang an ikakatao ko saimo? Igwa daw ako nin trigo o arak?

²⁸Ano an problema mo?” Nagsimbag an babae, “Kan sarong aldaw nagsabi an babaeng ini na kakanon mi an sakong aki, dangan sa sunod na aldaw an saiya naman na aki.

²⁹Kaya linuto mi saka kinakan an sakong aking lalaki. Sunod na aldaw, sinabihan ko siya na an saiyang aking lalaki naman an samong kakakanon, alagad itinago niya siya!”

³⁰Kan madangog ini kan hade, ginisi niya an saiyang gubing. Naglalakaw siya kaidto sa gilid kan kudal, asin kan maghiling an mga tawo, nahiling ninda na nakasulot siya nin sako sa irarom kan saiyang gubing.

³¹Nagsabi an hade, “Gadanon logod ako nin Dios kun dai ko papugotan si Eliseo ngunyan na aldaw!”

³²Kaya nagsugo siya tanganing kuahon si Eliseo. Kan panahon na iyan, yaon si Eliseo sa saiyang harong asin kaolay an kamagurangan. Bago nag-abot an sugo kan hade, sinabihan ni Eliseo an kamagurangan, “An paragadan igwa nin sinugo tanganing pugotan ako! Pag-abot niya digdi, isera nindo an pintoan asin dai nindo siya pagpalaogon. Kasunod sana niya an hade.”

³³Dai pa haros natatapos an sinasabi ni Eliseo, nag-abot na an sugo saka nagsabi, “An kasakitan na ini dinara samo nin Kagurangnan! Tano ta mahalat pa ako sa Kagurangnan?”