Read Central Bicolano 2 Kings 8 Bible Online

2 Kings 8 - Central Bicolano bible

2 Kings 8

¹Sinabihan ni Eliseo an babaeng taga Shunem, an ina kan aki na binuhay niya giraray, “Maghale ka digdi sagkod an saimong pamilya asin mag-erok kamo sa ibang lugar huli ta an Kagurangnan mapadara digdi nin gutom na matagal nin pitong taon.”

²Kinuyog kan babae an tataramon ni Eliseo; naghale sinda asin nag-erok sa Filistia sa laog nin pitong taon.

³Pakalihis nin pitong taon, nagbalik siya sa Israel asin nagduman sa hade tanganing hagadan nin tabang na makabalik saiya an saiyang harong saka daga.

⁴Inabotan niya an hade na kaolay si Gehazi, an sorogoon ni Eliseo. Boot kan hade na maaraman an mga milagro ni Eliseo.

⁵Mantang sinasabi ni Gehazi sa hade kun paano binuhay ni Eliseo an sarong gadan, ipinahayag kan babae an saiyang kahagadan sa hade. Nagsabi si Gehazi, “Mahal na hade, uya an babae, asin uya an saiyang aking lalaki na binuhay ni Eliseo!”

⁶Kan hapoton kan hade an babae, pinatotoohan kan babae an istorya ni Gehazi. Kaya inapod kan hade an sarong opisyal saka sinabihan na ibalik sa babae an gabos na pagsadiri kaini, sagkod an halaga kan gabos na ibinunga kan daga sa laog nin pitong taon na mayo siya.

⁷May helang si Hadeng Ben-hadad nin Siria kan magduman si Eliseo sa Damasco. Kan maosipan an hade na yaon duman si Eliseo,

⁸sinabihan niya si Hazael, an saro kan saiyang mga opisyal, “Darahan mo nin regalo an propeta asin pakiolayan mo siya na hapoton an Kagurangnan tanganing maaraman ko kun mararahay pa ako o dai na.”

⁹Kaya kinargahan ni Hazael an kwarentang kamelyo nin manlaen-laen na produkto kan Damasco asin nagduman ki Eliseo. Kan nasa atubangan na ni Eliseo si Hazael, nagsabi ini, “Sinugo ako kan saimong sorogoon na si Hadeng Ben-hadad tanganing hapoton ka kun mararahay pa siya sa saiyang helang o dai na.”

¹⁰Nagsimbag si Eliseo, “Ipinahayag sako kan Kagurangnan na magagadan si Ben-hadad; alagad magduman ka asin sabihan mo siya na mararahay siya.”

¹¹Dangan pinagparahiling ni Eliseo si Hazael sagkod na masopog ini. Naghibi si Eliseo.

¹²“Tadaw ta naghihibi ka, kagurangnan?” an hapot ni Hazael. “Huli ta naaaraman ko an karatan na gigibohon mo sa banwaan nin Israel; susuloon mo an saindang mga bantayan, gagadanon an mga hoben na lalaki, roronoton an mga aki asin babaakon an tulak kan mga bados.”

¹³“Siisay ako na magibo kan mangirhat na bagay na iyan?” an hapot ni Hazael. “Ipinahiling sako nin Kagurangnan na magigin hade ka nin Siria,” an simbag ni Eliseo.

¹⁴Nagbalik si Hazael ki Ben-hadad. Naghapot si Ben-hadad, “Ano an sinabi ni Eliseo?” “Sinabihan niya ako na mararahay ka,” an simbag ni Hazael.

¹⁵Alagad sunod na aldaw, kuminua si Hazael nin sarong tamong, ibinalbag ini sa tubig, saka itinahob sa lalawogon kan hade sagkod na magadan ini. Kaya nagsalihid si Hazael ki Ben-hadad bilang hade nin Siria.

¹⁶Kan ikalimang taon nin paghahade sa Israel, ni Joram na aking lalaki ni Ahab nagin hade nin Juda si Jehoram na aking lalaki ni Jehosafat.

¹⁷Treynta y dos na taon an edad niya kan siya magin hade, asin walong taon siyang naghade sa Jerusalem.

¹⁸Inarog niya an maraot na mga ginibo ni Hadeng Ahab asin kan iba pang hade nin Israel, huli ta naagom niya an aking babae ni Ahab. Ginibo niya an maraot sa atubangan kan Kagurangnan.

¹⁹Alagad habong tunawon nin Kagurangnan an Juda huli kan tipan na ginibo niya ki David asin huli kan panuga niya na magdadanay sa paghahade an kapagarakian.

²⁰Sa panahon na ini kan paghahade ni Jehoram, nagrebelde an Edom laban sa Juda asin nagbugtak man nin sadiri nindang hade.

²¹Kaya nagluwas si Jehoram dara an gabos niyang karwahe dangan sinalakay an Zair. Pinalibotan siya duman kan mga Edomita alagad pagkabanggi, nakalusot asin nakadulag siya saka an mga opisyal kan saiyang mga karwahe. An saiyang mga soldados nagdurulag man.

²²Poon kaidto sagkod ngunyan, nagin sarong siblag na nasyon sa Juda an Edom. Kan panahon man na ini, nagrebelde man sa Juda an Libna.

²³An iba pang ginibo ni Jehoram gabos nasusurat sa An Kasaysayan kan mga Hade nin Juda.

²⁴Nagadan si Jehoram asin ilinubong sa lulubngan nin mga hade sa Syudad ni David. Si Ahazias na aki niyang lalaki iyo an nagsalihid saiya bilang hade.

²⁵Kan ikadoseng taon kan paghahade ni Joram na aking lalaki ni Ahab bilang hade sa Israel, nagin hade sa Juda si Ahazias na aking lalaki ni Jehoram.

²⁶Beynte y dos an edad ni Ahazias kan siya magin hade, asin sarong taon siyang naghade sa Jerusalem. An saiyang ina iyo si Atalia na makoapo ni Omri na nagin hade nin Israel.

²⁷Huli ta si Ahazias manugang ni Hadeng Ahab, nagkasala siya sa Kagurangnan arog kan pamilya ni Ahab.

²⁸Inibahan ni Hadeng Ahazias si Hadeng Joram nin Israel sa pakigera ki Hadeng Hazael nin Siria. Duman sa Ramot-gilead nagralaban an mga hukbo asin nalugadan si Joram.

²⁹Kaya nagbalik si Joram sa syudad nin Jezreel tanganing magparahay kan saiyang mga lugad. Dangan dinalaw siya duman ni Ahazias.