Read Central Bicolano 1 Chronicles 13 Bible Online

1 Chronicles 13 - Central Bicolano bible

1 Chronicles 13

¹Kinaolay ni David an mga opisyal na nakakasakop nin rinibong mga tawohan asin man an mga nakakasakop nin ginatos na mga tawohan.

²Dangan nagpahayag siya sa bilog na banwaan nin Israel, “Kun pagmarahayon nindo, asin kun kabotan nin Kagurangnan na satuyang Dios, pasugoan ta an satuyang iba pang kahimanwa asin an mga padi saka an mga Levita na nasa saindang mga banwaan, dangan sabihan ta na magtiripon digdi sa kaibahan nyato.

³Dangan magduman kita asin kuahon ta an Kaban nin Tipan nin Dios, na napabayaan ta kan si Saul iyo an hade.”

⁴Nag-oroyon an bilog na katiriponan, huli ta matanos an siring na kaisipan para sainda.

⁵Kaya tinipon ni David an bilog na Israel, magpoon sa pagdolonan kan Egipto sa habagat, sagkod sa Dalan nin Hamat sa amihan, tanganing kuahon an Kaban nin Tipan sa Kiriat-jearim asin darahon sa Jerusalem.

⁶Si David asin an bilog na Israel nagduman sa Baala, o Kiriat-jearim, sa teritoryo nin Juda, tanganing kuahon an Kaban nin Tipan nin Dios, na inaapod sa ngaran nin Kagurangnan na nagtutukaw sa trono sa ibabaw kan mga kerubin.

⁷An Kaban nin Tipan kinua ninda sa harong ni Abinadab, asin ilinunad ninda sa sarong bagong kariton. Si Uzza asin si Ahio iyo an nag-aantabay kan kariton.

⁸Si David asin an gabos na Israelita nagsasayaw saka nag-aawit sa bilog nindang kosog tanganing omawon an Dios. Nagturugtog sinda nin mga lira, mga arpa, mga tamborin, mga gimbal, asin mga trompeta.

⁹Pag-abot ninda sa ginikan ni Kidon, napalupog an mga baka, kaya kinapotan ni Uzza an Kaban nin Tipan.

¹⁰Naanggot an Kagurangnan ki Uzza kaya ginadan niya ini huli ta kinapotan kaini an Kaban. Nagadan duman si Uzza sa atubangan nin Dios.

¹¹Sagkod ngunyan, an lugar na idto inaapod Perez-uzza. Naanggot si David huli ta pinadusahan nin Kagurangnan si Uzza.

¹²Dangan natakot si David sa Dios asin nagsabi, “Paano ko na madadara ngunyan an Kaban nin Tipan nin Dios?”

¹³Kaya dai na dinara ni David sa Jerusalem an Kaban nin Tipan; iwinalat niya ini sa harong ni Obed-edom, na taga Gat.

¹⁴Nagdanay duman an Kaban nin Tipan sa laog nin tolong bulan, asin benendisyonan nin Kagurangnan an pamilya ni Obed-edom saka an gabos na pagsadiri niya.