Read Central Bicolano 1 Chronicles 14 Bible Online

1 Chronicles 14 - Central Bicolano bible

1 Chronicles 14

¹Nagpadara nin mga sugo ki David si Hiram na hade nin Tiro; nagpadara siya nin mga kahoy na sedro, siring man mga kantero asin mga karpintero tanganing igibo si David nin sarong palasyo.

²Kaya nasabotan ni David na ibinugtak na siya nin Kagurangnan bilang hade nin Israel, asin na pinapauswag nin Kagurangnan an saiyang kahadean para sa banwaan nin Israel.

³Nagkaigwa pa nin dakul na agom si David sa Jerusalem; dakul an nagin aki niyang lalaki saka babae.

⁴Iyo ini an ngaran kan mga aki niyang nagkamurundag sa Jerusalem: Sammua, Sobab, Natan, Solomon,

⁵Ibar, Elisua, Elpelet,

⁶Noga, Nefeg, Jafia,

⁷Elisama, Beeliada, asin Elifelet.

⁸Kan maaraman kan mga Filisteo na si David iyo an linahidan bilang hade kan bilog na Israel, nagluwas an gabos na Filisteo tanganing dakopon si David. Naaraman ini ni David kaya nagluwas siya sa pagsabat sainda.

⁹Nag-abot an mga Filisteo asin bigla nindang sinalakay an Kapantayan nin Refaim.

¹⁰Hinapot ni David an Dios, “Boot mong salakayon ko an mga Filisteo? Papangganahon mo daw ako?” Nagsimbag an Kagurangnan, “Salakayon mo; papangganahon taka.”

¹¹Kaya nagduman si David sa Baal-perazim asin dinaog niya duman an mga Filisteo. Nagsabi si David, “Ginamit ako nin Dios tanganing maglusot sa hukbo kan kaiwal arog sa sarong baha.” Kaya an lugar na idto nginaranan Baal-perazim.

¹²Kan magdurulag an mga Filisteo, nagkawaralat an saindang mga dios-dios, kaya nagboot si David na suloon an mga ini.

¹³Dai nahaloy, sinalakay giraray kan mga Filisteo an kapantayan.

¹⁴Naghapot giraray si David sa Dios, na nagsabi saiya, “Dai mo sinda pagsalakayon hale digdi; maglibot ka asin salakayon mo sinda sa likodan ninda, harani sa mga kahoy na balsamo.

¹⁵Kun madangog mo na an pagmartsa sa alitoktok kan mga kahoy na balsamo, magsalakay ka, huli ta ako an mangengenot saindo sa pagdaog kan hukbo kan mga Filisteo.”

¹⁶Ginibo ni David an ipinagboot saiya nin Dios, kaya napadulag niya an mga Filisteo magpoon sa Gibeon sagkod sa Gezer.

¹⁷Nakalakop an kabantogan ni David sa bilog na daga, asin ginibo nin Kagurangnan na matakot saiya an gabos na nasyon.