Read Central Bicolano 1 Chronicles 15 Bible Online

1 Chronicles 15 - Central Bicolano bible

1 Chronicles 15

¹Nagpatugdok si David nin mga harong para saiya duman sa Syudad ni David. Nag-andam man siya nin sarong lugar para sa Kaban nin Tipan nin Dios, asin nagpatugdok nin sarong tolda para digdi.

²Dangan nagsabi si David, “An mga Levita sana iyo an makakapagdara kan Kaban nin Tipan, huli ta sinda an pinili nin Kagurangnan na magdara kaiyan asin maglingkod saiya sagkod pa man.”

³Kaya tinipon ni David sa Jerusalem an bilog na Israel tanganing darahon an Kaban nin Tipan sa lugar na inandam niya para digdi.

⁴Dangan tinipon niya an mga aking lalaki ni Aaron asin an mga Levita.

⁵Gikan sa mga Levitang kamaganakan ni Kohat uminabot si Uriel, kaiba an syento beynte niyang mga kadugo na pinamamayohan niya;

⁶gikan sa kamaganakan ni Merari, uminabot si Asaias, kaiba an dos syentos beynte niyang mga kadugo na pinamamayohan niya;

⁷gikan sa kamaganakan ni Gerson, uminabot si Joel, kaiba an syento treynta niyang mga kadugo na pinamamayohan niya;

⁸gikan sa kamaganakan ni Elisafan, uminabot si Semaias, kaiba an dos syentos niyang mga kadugo na pinamamayohan niya;

⁹gikan sa kamaganakan ni Hebron, uminabot si Eliel, kaiba an otsenta niyang mga kadugo na pinamamayohan niya;

¹⁰asin gikan sa kamaganakan ni Uzziel, uminabot si Aminadab, kaiba an syento dose niyang mga kadugo na pinamamayohan niya.

¹¹Inapod ni David an mga padi na si Zadok asin Abiatar saka an anom na Levita na si Uriel, Asaias, Joel, Semaias, Eliel, asin Aminadab,

¹²dangan sinabihan, “Kamo an mga namamayo kan mga kamaganakan ni Levi. Magpakabanal kamo asin an kapwa nindo mga Levita, tanganing pwede kamong magdara kan Kaban nin Tipan nin Kagurangnan, an Dios nin Israel, pasiring sa lugar na inandam ko para digdi.

¹³Huli ta bako kamo an nagdara kaiyan kan enot, pinadusahan kita nin Kagurangnan na satong Dios dahelan ta dai nyato iyan inataman sa paagi na saiyang ipinagboot.”

¹⁴Kaya naglinig kan saindang sadiri an mga padi asin an mga Levita tanganing darahon an Kaban nin Tipan nin Kagurangnan, an Dios nin Israel.

¹⁵Pinasan kan mga lalaki an Kaban nin Tipan nin Dios sa paagi kan mga olayan, sosog sa ipinagboot nin Kagurangnan ki Moises.

¹⁶Pinagbotan man ni David an mga lider kan mga Levita na ibugtak an iba nindang tugang tanganing mag-awit asin magtugtog nin maogmang musika sa mga arpa, lira saka gimbal.

¹⁷Sa grupo nin mga parakanta, an pinili nindang magtugtog nin mga bronseng gimbal iyo si Heman na aking lalaki ni Joel, an kadugo niyang si Asaf na aking lalaki ni Berekias, asin si Etan na aking lalaki ni Kusaias kan kamaganakan ni Merari. An pinili nindang magtugtog kan mga arpa na halangkaw an tanog iyo si Zacarias, Jaaziel, Semiramot, Jehiel, Uni, Eliab, Maaseias, asin Benaias. An pinili nindang magtugtog kan mga arpa na hababa an tono iyo si Matitias, Elifelehu, Mikneias, Azazias asin an mga bantay sa Templo na iyo si Obed-edom saka si Jeiel.

²²Huli ta may pakaaram si Kenanias sa musika, pinili ninda siya na magin parapamahala kan mga paratugtog na Levita.

²³An piniling mga bantay kan Kaban nin Tipan iyo si Berekias asin Elkana kaiba ni Obed-edom saka ni Jehias. An piniling mga paratugtog kan trompeta sa enotan kan Kaban nin Tipan iyo an mga pading si Sebanias, Josafat, Netanel, Amasai, Zacarias, Benaias, asin Eliezer.

²⁵Kaya nagduman sa harong ni Obed-edom si David, an kamagurangan nin Israel asin an mga opisyal kan hukbo tanganing kuahon an Kaban nin Tipan; nagkaigwa sinda nin dakulang selebrasyon.

²⁶Nag-atang sinda nin pitong torong baka asin pitong karnero tanganing tabangan nin Dios an mga Levita sa pagdara kan Kaban nin Tipan.

²⁷Gubing na purong lino an sulot ni David; siring man an gubing kan mga paratugtog, ni Kenanias na parapamahala kan mga paratugtog asin kan mga Levita na nagdadara kan Kaban nin Tipan. Nakasulot si David nin efod na lino.

²⁸Sa siring na paagi, an Kaban nin Tipan dinara sa Jerusalem kan gabos na Israelita. Nagkurahaw sinda gabos sa kaogmahan, kasabay an tanog kan mga trompeta, asin kan mga gimbal, saka an makosog na musika kan mga arpa asin lira.

²⁹Mantang dinadara palaog sa syudad an Kaban nin Tipan, nagdungaw sa bintana si Mical na aking babae ni Saul, asin nahiling niya si Hadeng David na nagsasayaw saka naglulukso sa kaogmahan; nauyam si Mical ki Hadeng David.