Read Central Bicolano 1 Chronicles 17 Bible Online

1 Chronicles 17 - Central Bicolano bible

1 Chronicles 17

¹Kan sa palasyo na nag-eerok si Hadeng David, sinabihan niya an propetang si Natan, “Uya ako nag-eerok sa harong na gibo sa sedro, alagad sa sarong tolda sana namumugtak an Kaban nin Tipan nin Kagurangnan.”

²Nagsimbag si Natan, “Giboha an nasa isip mo, huli ta kaiba mo an Dios.”

³Alagad kan bangging idto nagtaram an Kagurangnan ki Natan,

⁴“Lakaw asin sabihan mo si David na sakong sorogoon, ‘Siring an itinaram nin Kagurangnan: Bakong ika an mapatugdok nin templo na sakuyang eerokan.

⁵Magpoon kan iluwas ko sa Egipto an Israel sagkod ngunyan, dai lamang ako nag-erok sa sarong harong; danay na nag-erok ako sa mga tolda, hale sa sarong lugar pasiring sa iba.

⁶Saen man ako magduman kaiba an banwaan nin Israel, dai lamang ako naghapot sa mga hukom na pinagbotan kong mangenot kan sakong banwaan, kun tadaw ta dai ninda ako ipinatugdok nin templong gibo sa sedro.’

⁷“Kaya sabihan mo si David na sakong sorogoon na ako, an Kagurangnan nin mga hukbo, an nagtataram saiya, ‘Kinua taka hale sa pagpastor nin mga karnero sa kaomahan asin ginibo takang hade kan sakong banwaan nin Israel.

⁸Inibahan taka saen ka man nagduman, asin dinaog ko an gabos mong kaiwal mantang nagdadangadang ka. Gigibohon kong magin bantog an saimong ngaran, arog kan ngaran kan mga darakulang lider sa kinaban.

⁹Nagpili na ako nin sarong lugar para sa sakong banwaan nin Israel asin pinapag-erok ko sinda duman, saen dai na sinda aapihon. Kaidto danay na sinasalakay sinda nin mga mariringis na tawo, alagad dai na iyan mangyayari ngunyan. Nanunuga ako na dadaogon ko an saimong mga kaiwal, asin tatawan taka nin mga kapagarakian.

¹¹Kun ika magadan dangan ilubong sa kaibahan kan saimong mga ginikanan, gigibohon kong hade an saro kan saimong mga aking lalaki asin papakosogon ko an saiyang kahadean.

¹²Siya an matugdok nin templo para sako, asin gigibohon kong magdanay an saiyang trono sagkod pa man.

¹³Ako an saiyang magigin ama; siya an magigin aki kong lalaki. Dai ko hahaleon saiya an sakuyang tabang, bakong arog kan ginibo ko ki Saul na naenot saimo.

¹⁴Siya an mamamahala kan sakuyang banwaan asin kan sakuyang kahadean; an saiyang trono magdadanay sagkod lamang.’”

¹⁵Isinabi ni Natan ki David an gabos na ipinahayag saiya nin Dios.

¹⁶Dangan naglaog si Hadeng David sa Tabernakulo, nagtukaw, asin namibi Kagurangnan, “Siisay man ako, O Kagurangnan Dios, saka ano an sakong pamilya, ta ginibo mo an mga bagay na ini sako?

¹⁷Alagad dakul pa an ginibo mo para sako, O Dios; nagtaram ka man manongod sa sakuyang kapagarakian sa maabot na panahon, O Kagurangnan Dios!

¹⁸Ano pa an masasabi ko saimo huli kan ginibo mong pag-omaw sa saimong sorogoon? Midbid mo ako nin marahay.

¹⁹Kabotan asin katuyohan mo na gibohon ini para sako; ginibo mo an darakulang bagay na ini tanganing tukdoan ako.

²⁰Mayo nin makakaarog saimo, O Kagurangnan; danay ming aram na ika sana an Dios.

²¹Mayo nin ibang nasyon sa kinaban arog kan Israel, na ilinigtas mo sa kaoripnan tanganing gibohon na sadiri mong banwaan. An mga darakula asin makangangalas na mga bagay na ginibo mo para sainda nakapabantog saimo sa bilog na kinaban. Ilinigtas mo sa Egipto an Israel, saka pinalayas mo an ibang mga nasyon mantang nagdadangadang an saimong banwaan.

²²An Israel ginibo mong saimong sadiring banwaan sagkod pa man, asin ika, Kagurangnan, iyo an nagin saindang Dios.

²³“Kaya ngunyan, O Kagurangnan, otoba sa gabos na panahon an panuga na ginibo mo manongod sako asin sa sakong kapagarakian; giboha siring sa saimong itinaram.

²⁴Dangan madakula an saimong ngaran saka masabi an mga tawo sagkod pa man, ‘An Kagurangnan nin mga hukbo iyo an Dios nin Israel,’ asin magdadanay man an sakong kahadean sagkod pa man.

²⁵Nagkaigwa ako nin kosog nin boot na magpamibi saimo, sakuyang Dios, huli ta ipinahayag mo ini gabos sako, na saimong sorogoon, dangan tinaraman na gigibohon mong mga hade an sakong kapagarakian.

²⁶Ika an Dios, O Kagurangnan, asin ginibo mo an marahay na panugang ini sa saimong sorogoon.

²⁷Nakikimaherak ako na bendisyonan mo an sakong kapagarakian tanganing magdanay sinda sagkod pa man sa saimong atubangan; huli ta an saimong bendisyon, O Kagurangnan, bendisyon sagkod lamang.”