Read Central Bicolano 1 Chronicles 18 Bible Online

1 Chronicles 18 - Central Bicolano bible

1 Chronicles 18

¹Pakatapos kaini, sinalakay giraray ni David an mga Filisteo. Dinaog niya sinda, asin tinapos niya an saindang pagsakop sa syudad nin Gat patin sa mga baryo sa palibot kaiyan.

²Dinaog man niya an mga Moabita na nagin mga sorogoon niya asin nagbayad sinda saiya nin buhis.

³Dangan dinaog ni David si Hadadezer na hade nin Zoba, sa lugar pasiring sa Hamat. Pasiring kaidto si Hadadezer sa teritoryo sa may Salog nin Eufrates huli ta boot niyang magtugdok digdi nin monumento.

⁴Binihag ni David an sangribong karwahe ni Hadadezer, syete mil na mga nakakabayong soldados asin beynte mil kan saiyang mga soldados. Pinirilayan niya an mga kabayo, alagad nagtada siya para sa sanggatos na karwahe.

⁵Kan mag-abot an mga Siro na taga Damasco tanganing tabangan si Hadeng Hadadezer, sinalakay sinda ni David asin ginadan niya an beynte y dos mil na mga Siro.

⁶Dangan nagpatindog si David nin mga kampo nin mga soldados sa Damasco; nagin sorogoon niya an mga Siro asin nagbuhis sinda saiya. Pinapanggana nin Kagurangnan si David saen man siya magduman.

⁷Sinamsam ni David an mga bulawan na kalasag na dara kan mga opisyal ni Hadadezer, dangan dinara niya sa Jerusalem.

⁸Nagkua man siya nin dakul na bronse hale sa Tibhat asin sa Kun, mga syudad na sakop ni Hadadezer. (An mga bronseng ini iyo an ginamit ni Solomon sa paggibo kan tangke, kan mga harigi, asin kan mga kagamitan sa Templo.)

⁹Kan nadangog ni Toi na hade kan Hamat na dinaog ni David an bilog na hukbo ni Hadadezer na hade kan Zoba,

¹⁰sinugo niya si Joram na saiyang aking lalaki, sa pagtaong galang asin sa pag-omaw ki David, huli ta dinaog kaini si Hadadezer, na dakul na beses nang nakalaban ni Toi. Pinadarahan niya si David nin dakul na regalo na gibo sa bulawan, plata, saka bronse.

¹¹An mga regalong ini idinusay ni Hadeng David sa Kagurangnan, kaiba an mga plata asin bulawan na sinamsam niya hale sa mga nasyon na saiyang nadaog—an Edom, Moab, Ammon, Filistia, asin Amalek.

¹²Dinaog ni Abisai, na an ina iyo si Zeruias, an mga Edomita duman sa Kapantayan nin Asin, saka ginadan niya an dyes y otso mil na Edomita.

¹³Nagpatindog siya nin mga kampo nin mga soldados sa Edom; nagin sorogoon ni David an mga tawo duman. Pinapanggana nin Kagurangnan si David saen man siya magduman.

¹⁴Naghade si David sa bilog na Israel; tinawan niya nin hustisya asin katanosan an saiyang banwaan.

¹⁵Si Joab, na aking lalaki ni Zeruias, iyo an pamayo kan hukbo; si Jehosafat, na aking lalaki ni Ahilud, iyo an kansilyer;

¹⁶si Zadok, na aking lalaki ni Ahitub, asin si Ahimelec, na aking lalaki ni Abiatar, iyo an mga padi; si Seraias iyo an sekretaryo;

¹⁷si Benaias, na aking lalaki ni Jehoiada, iyo an namahala kan mga parabantay ni David; an mga aking lalaki ni David iyo an nagkapot kan mga haralangkaw na katongdan sa palasyo.