Read Central Bicolano 1 Chronicles 19 Bible Online

1 Chronicles 19 - Central Bicolano bible

1 Chronicles 19

¹Dai nahaloy, nagadan si Nahas na hade nin Ammon. Si Hanun na aki niyang lalaki iyo an nagsalihid saiya bilang hade.

²Nagsabi si David, “Makikipagkatood ako ki Hanun, siring kan ginibo sako kan saiyang ama.” Kaya nagpadara si David nin mga sugo ki Hanun sa pagpahiling nin pakidumamay. Pag-abot ninda sa Ammon nag-atubang sinda ki Hanun.

³Alagad nagsabi ki Hanun an mga lider na Ammonita, “Sa paghona mo, sinugo ni David an mga lalaking iyan sa pakidumamay saimo, huli sa pag-omaw sa saimong ama? Bako daw na sinugo niya sinda sa pagsiyasat asin pagmanman kan daga tanganing saiyang sakopon?”

⁴Kaya dinakop ni Hanun an mga sinugo ni David, inahit an saindang barabas, pinutol sa may piad an saindang mga gubing, dangan pinahale sinda.

⁵Soropog nang magpuli an mga sugo ni David. Kan naaraman ni David an nangyari, pinasabihan niya sinda na mag-erok ngona sa Jerico asin dai magpuli sagkod na dai pa nagtalubo an saindang mga barabas.

⁶Kan nahiling kan mga Ammonita na nagin kaiwal ninda si David, nagbayad sinda nin mga treynta y kwatro mil na kilo nin plata sa pag-arkila nin mga karwahe saka sa pagtandan nin mga nakakabayong soldados hale sa Mesopotamia, sa Maaca, asin Zoba.

⁷Nag-abot an inarkila nindang treynta y dos mil na mga karwahe; nag-abot man an hade nin Maaca, kaiba an saiyang hukbo, dangan nagkampo harani sa Medeba. Nagluwas man an mga Ammonita hale sa gabos nindang syudad asin nag-andam sa pakilaban.

⁸Naaraman ini ni David, kaya ipinadara niya si Joab saka an bilog na hukbo.

⁹Nagruluwas an mga Ammonita asin nagtirindog sa pakilaban duman sa palaog sa Raba, an saindang pangenot na syudad, mantang yaon sa kahiwasan an mga hade na uminabot sa pagtabang sainda.

¹⁰Nahiling ni Joab na sasalakayon siya kan mga kaiwal sa atubangan saka sa likodan, kaya pinili niya an pinakamarahay na mga soldados nin Israel dangan iyo an pinaatubang niya sa mga taga Siria.

¹¹An natada sa saiyang hukbo ibinugtak niya sa pamamahala kan tugang niyang si Abisai, asin iyo an pinaatubang niya sa mga Ammonita.

¹²Sinabihan ni Joab si Abisai, “Kun nahihiling mong nadadaog ako kan mga taga Siria, tabangan mo ako, asin kun nadadaog ka kan mga Ammonita, tatabangan taka.

¹³Magmaisog ka! Maigot kitang makilaban para sa satong banwaan asin para sa mga syudad nin satong Dios. Gibohon logod nin Kagurangnan an pinaghohona niyang marahay.”

¹⁴Nagrani si Joab asin an saiyang mga tawohan tanganing makilaban sa mga taga Siria; nagdurulag an mga Siro.

¹⁵Kan nahiling kan mga Ammonita na nagdurulag an mga Siro, nagdurulag man sinda ki Abisai asin naglaog sa saindang syudad. Kaya, nagbalik si Joab sa Jerusalem.

¹⁶Alagad kan nahiling kan mga Siro na nadaog sinda kan mga Israelita, pinasugoan ninda an hukbo kan mga Siro na nasa ibong kan Salog nin Eufrates. An hukbong ini nasa pamamahala ni Sobac, na pamayo kan hukbo ni Hadeng Hadadezer nin Zoba.

¹⁷Kan maaraman ini ni David, tinipon niya an bilog na hukbo nin Israel, binalyo niya an Jordan asin inatubang an mga Siro. Nagpoon an ralaban,

¹⁸asin napasibog kan mga Israelita an mga Siro. Si David asin an saiyang mga tawohan nakagadan nin syete mil na mga Siro na nakakarwahe, saka kwarenta mil pang mga soldados. Nagadan man ninda si Sobac na pamayo kan hukbo kan mga Siro.

¹⁹Kan nahiling kan mga hadeng sakop ni Hadadezer na nadaog sinda kan mga Israelita, nakipagtoninong sinda ki David; kaya nasakop sinda kaini. Poon kaidto habo na nanggad tabangan kan mga Siro an mga Ammonita.