Read Central Bicolano 1 Chronicles 25 Bible Online

1 Chronicles 25 - Central Bicolano bible

1 Chronicles 25

¹Pinili ni David asin kan mga lider kan mga Levita an mga Levitang kamaganakan ni Asaf, ni Heman, saka ni Jedutun, tanganing mangenot sa mga gawe nin pagsamba. Sinda an mapahayag kan mga mensahe nin Dios, na sinasabayan kan musika nin mga arpa asin mga gimbal. Iyo ini an lista kan mga tawong pinili na mangenot sa pagsamba, asin an trabaho na gigibohon kan saindang grupo:

²An apat na aking lalaki ni Asaf: si Zaccur, Jose, Netanias, asin Asarela. An saindang pamayo iyo si Asaf, na nagbalangibog kan mensahe nin Dios sosog sa pagboot kan hade.

³An anom na aking lalaki ni Jedutun: si Gedalias, Zeri, Jesaias, Simei, Hasabias, asin Matitias. Sa pamamayo kan saindang ama, ibinalangibog ninda an mensahe nin Dios, na sinasabayan kan musika nin mga arpa sa pagpasalamat asin pag-omaw sa Kagurangnan.

⁴An katorseng aking lalaki ni Heman: si Bukkias, Matanias, Uzziel, Sebuel, Jerimot, Hananias, Hanani, Eliata, Gidalti, Romanti-ezer, Josbekasa, Malloti, Hotir, asin Mahaziot.

⁵Si Heman, na propeta kan hade, tinawan nin Dios nin katorseng aking lalaki saka tolong aking babae, siring kan saiyang ipinanuga, tanganing magin bantog si Heman.

⁶Sinda gabos nasa irarom kan pamamahala kan saindang ama sa pagtugtog nin mga gimbal, asin mga arpa, tanganing sabayan nin musika an pagsamba sa Templo. Si Asaf, si Jedutun, saka si Heman nasa irarom kan pagboot kan hade.

⁷An beynte y kwatrong lalaking ini asin an kapwa ninda mga Levita gabos eksperto sa musika. An kabilogan na bilang ninda uminabot sa dos syentos otsenta y otso.

⁸Tanganing maaraman an saindang mga katongdan, nagripa sinda gabos, sadit man o dakula, paratukdo man o pinagtutukdoan.

⁹Sosog sa mga pamilya an dos syentos otsenta y otsong kalalakihan na ini binaranga sa beynte y kwatrong grupo na tigdodose katawo. An lambang grupo igwa nin sarong lider. Iyo ini an pasurunod-sunod kan saindang paglingkod: 1 si Jose kan pamilya ni Asaf; 2 si Gedalias; 3 si Zaccur; 4 si Zeri; 5 si Netanias; 6 si Bukkias; 7 si Jesarela; 8 si Jesaias; 9 si Matanias; 10 si Simei; 11 si Uzziel; 12 si Hasabias; 13 si Sebuel; 14 si Mattitias; 15 si Jerimot; 16 si Hananias; 17 si Josbekasa; 18 si Hanani; 19 si Malloti; 20 si Eliata; 21 si Hotir; 22 si Gidalti; 23 si Mahaziot; 24 si Romanti-ezer.