Read Central Bicolano 1 Chronicles 29 Bible Online

1 Chronicles 29 - Central Bicolano bible

1 Chronicles 29

¹Sinabihan ni David an bilog na katiriponan, “Hoben pa saka kulang pa nin pakaaram an sakuyang aki na si Solomon, na pinili nin Dios. Dakula an trabaho, huli ta an papatindogon bakong palasyo para sa tawo kundi sarong Templo para sa Kagurangnan Dios.

²Ginibo ko na an gabos kong makakaya sa pag-andam kan mga bagay na kaipuhan para sa Templo: mga bulawan, plata, bronse, lansang, mga kahoy, mga mahalagang bato saka mga gapo, mga gapo na manlaen-laen an kolor asin mga marmol.

³Laen pa kaini, bilang dagdag sa mga inandam ko para sa Templo, hale sa sadiri kong kayamanan nagtao na ako nin bulawan saka plata, huli kan sakuyang pagkamoot sa Templo nin Dios.

⁴Itinatao ko an sobra sa sanggatos na tonelada nin bulawan na hale pa sa Ofir, saka mga dos syentos kwarentang toneladang purong plata, tanganing gamiton sa pagsamno kan mga lanob kan Templo,

⁵asin sa gabos na gigibohon kan mga paradibuho. Siisay pa an makakatao nin boluntad na dolot ngunyan para sa Kagurangnan?”

⁶Dangan nagtarao nin mga boluntad na dolot an mga pamayo nin mga kamaganakan, an mga lider kan mga tribu, an mga opisyal nin mga rinibo saka mga ginatos na soldados, asin an mga administrador kan mga sadiri kan hade.

⁷Ini an mga idinolot ninda para sa Templo: sobra sa syento setentang toneladang bulawan, sobra sa tres syentos kwarentang toneladang plata, mga seis syentos beynte toneladang bronse, asin sobra sa tres mil kwatro syentos toneladang lansang.

⁸An mga igwa nin mahahalagang bato minatao kaiyan para sa kayamanan kan Templo, na nasa pamahala ni Jehiel kan Levitang kamaganakan ni Gerson.

⁹Tudok sa boot na nagtarao nin dolot an banwaan; naogma sinda huli ta dakul an idinolot sa Kagurangnan. Nag-ogma man nin marahay an hade na si David.

¹⁰Sa atubangan kan bilog na katiriponan, nag-omaw si David sa Kagurangnan asin nagsabi, “Pag-omawon ka, Kagurangnan, Dios ni Jacob na samuyang ginikanan, sa panahon na daing kasagkoran.

¹¹Saimo an kadakulaan, an kapangyarihan, an kamurawayan, an kapangganahan asin an kamahalan, huli ta saimo an gabos na nasa langit asin daga. Saimo an kahadean, O Kagurangnan, asin ika an nangongorog na kagsakop kan gabos.

¹²Sa saimo gikan an gabos na kayamanan asin kaomawan; ika an hade kan gabos. Nasa saimo an kapangyarihan asin kosog; ika an nagtatao nin kadakulaan asin kosog sa gabos.

¹³Ngunyan, samuyang Dios, nagpapasalamat kami saimo, asin inoomaw mi an saimong mamurawayon na ngaran.

¹⁴“Alagad siisay man ako asin an sakong banwaan na makakakayang magtao nin boluntad na dolot saimo? Huli ta sa saimo gikan an gabos na bagay, asin samuya man sanang ibinabalik an sadiri mo.

¹⁵Mga dayuhan kami sa atubangan mo; mga nakikihimanwa, arog kan samong mga ginikanan. An samong mga aldaw arog sa sarong anino, asin dai magdadanay.

¹⁶O Kagurangnan, samuyang Dios, an gabos na kayamanan na ini, na samuyang tinipon para sa pagtugdok kan templo sa kaomawan nin saimong ngaran, gikan saimo asin sadiri mo.

¹⁷O Dios ko, aram kong binabalo mo an puso asin nawiwilihan mo an matanos. Sa malinig na puso, boluntad na idinodolot ko ini gabos, asin nahiling ko an saimong banwaan na maogma saka bulahos na nagdodolot saimo.

¹⁸O Kagurangnan, Dios nin samong mga ginikanan na si Abraham, si Isaac asin si Jacob, papagdanaya an siring na mga katuyohan asin mga kaisipan sa puso nin saimong banwaan, dangan giboha sindang maimbod saimo.

¹⁹Itao mo ki Solomon na sakuyang aki an tudok sa puso na pagmawot na maotob an saimong mga togon saka mga pagboot, asin na ikapatugdok niya an Templo, na inandaman ko kan mga bagay na ini.”

²⁰Dangan sinabihan ni David an katiriponan, “Omawon nindo an Kagurangnan na saindong Dios!” an bilog na katiriponan nag-omaw sa Kagurangnan, an Dios nin saindang mga ginikanan, nagduko kan saindang payo asin nagsamba sa Kagurangnan saka nagtaong galang sa hade.

²¹Sunod na aldaw, nagsakripisyo sinda sa Kagurangnan; nagdolot sinda nin mga tinutong na atang—sangribo na torong baka, sangribong lalaking karnero asin sangribong kordero. Nagdolot man sinda nin inomon na arak.

²²Kan aldaw na idto, nagkakan sinda saka nag-inom sa atubang nin Kagurangnan sa dakulang kaogmahan. Sa ikaduwang beses, ipinagrukyaw ninda si Solomon bilang hade. Sa ngaran nin Kagurangnan, linahidan ninda siya bilang saindang kagsakop, asin si Zadok bilang padi.

²³Kaya nagtukaw si Solomon sa trono nin Kagurangnan bilang hade na kasalihid kan saiyang ama. Nagin mauswag siya asin nagkuyog saiya an bilog na Israel.

²⁴An gabos na lider asin mga soldados patin an iba pang mga aking lalaki ni David nanuga na magigin maimbod ki Hadeng Solomon.

²⁵Pinangagin bantog nin Kagurangnan si Solomon sa atubang kan bilog na Israel, asin orog na pinadakula ki sa mga naenot na naghade sa Israel.

²⁶Naghade sa Israel si David na aking lalaki ni Jesse

²⁷sa laog nin kwarentang taon. Naghade siya sa Hebron sa laog nin pitong taon, asin sa Jerusalem sa laog nin treynta y tres na taon.

²⁸Gurang na siya kan magadan, mayaman saka ginagalangan; asin si Solomon na aki niyang lalaki iyo an nagin kasalihid niya bilang hade.

²⁹An mga ginibo ni Hadeng David, poon sa kapinonan sagkod sa kataposan, nasusurat sa mga Cronica kan mga propeta na si Samuel, si Natan, asin si Gad.

³⁰Nasusurat digdi an saiyang paghahade, an saiyang kapangyarihan, asin an gabos na nangyari saiya saka sa Israel, sagkod sa mga kataraed na kahadean.