Read Central Bicolano 1 Chronicles 4 Bible Online

1 Chronicles 4 - Central Bicolano bible

1 Chronicles 4

¹An mga aking lalaki ni Juda iyo si Perez, Hezron, Carmi, Hur, asin Sobal.

²Si Sobal iyo an ama ni Reaias, na ama ni Jahat, na ama ni Ahumai, asin ni Lahad, na iyo an mga ginikanan kan mga tawong nag-eerok sa Zora.

³Si Hur iyo an matuang aking lalaki ni Caleb sa saiyang agom na si Efrat asin an kapagarakian ni Hur iyo an nagpatindog kan syudad nin Betlehem. Tolo an aking lalaki ni Hur: si Etam, Penuel, asin Ezer. An mga aking lalaki ni Etam iyo si Jezreel, Isma, asin Idbas. Nagkaigwa siya nin sarong aking babae na iyo si Hazzelelponi. Si Penuel iyo an ama ni Gedor, asin si Ezer iyo an ama ni Husa.

⁵Si Asur, na ama ni Tekoa, nagkaigwa nin duwang agom na iyo si Hela asin Naara.

⁶Ki Naara nagkaigwa siya nin apat na aking lalaki: si Ahuzzam, Hefer, Temeni, asin Haahastari.

⁷Ki Hela nagkaigwa siya nin tolong aki: si Zeret, Izar, asin Etnan.

⁸Si Koz iyo an ama ni Anub saka ni Zobeba, asin an ginikanan kan mga kamaganakan na gikan ki Aharhel na aking lalaki ni Harum.

⁹Igwa nin sarong lalaki na an ngaran Jabez, na iyo an orog na ginagalangan sa saiyang pamilya. Nginaranan siyang Jabez kan saiyang ina, huli ta nakulogan ini nin marahay kan siya mamundag.

¹⁰Namibi si Jabez sa Dios nin Israel, “Bendisyonan mo man logod ako, O Dios, asin tawan mo ako nin dakul na daga. Ibahan mo man logod ako asin ilikay sa anoman na maraot na makakakulog sako.” Itinao nin Dios ki Jabez an saiyang hinagad.

¹¹Si Caleb, na tugang na lalaki ni Suha, iyo an ama ni Mehir, na ama ni Eston.

¹²An mga aking lalaki ni Eston iyo si Betrafa, Pasea, asin Tehina. Si Tehina iyo an ama ni Nahas. An saindang kapagarakian nag-erok sa Reca.

¹³An mga aking lalaki ni Kenaz iyo si Otniel asin si Seraias. Si Otniel iyo an ama ni Hatat asin ni Meonotai,

¹⁴na ama ni Ofra. Si Seraias iyo an ama ni Joab, na nagmukna kan Kapantayan nin Trabahador, saen an gabos na tawo mga ekspertong trabahador.

¹⁵Si Caleb, na aking lalaki ni Jefunne, nagkaigwa nin tolong aking lalaki: si Iru, Ela, asin Naam. Si Ela iyo an ama ni Kenaz.

¹⁶An mga aking lalaki ni Jehallelel iyo si Zif, Zifa, Tiria, asin Asarel.

¹⁷An mga aking lalaki ni Ezra iyo si Jeter, Mered, Efer, asin Jalon. Inagom ni Mered si Bitias, na aking babae kan hade nin Egipto, asin nagkaigwa sinda nin sarong aking babae, si Miriam, dangan duwang aking lalaki, si Samai asin si Isba na ama ni Estemoa.

¹⁸Inagom man ni Mered an sarong babae sa tribu ni Juda, asin nagkaigwa sinda nin tolong aking lalaki: si Jered na ama ni Gedor, si Heber na ama ni Soco, asin si Jekutiel na ama ni Zanoa.

¹⁹Inagom ni Odias an tugang na babae ni Naham. An mga kapagarakian ninda iyo an ginikanan kan kamaganakan ni Garm, na nag-erok sa banwa nin Keila asin kan kamaganakan nin Maacat, na nag-erok sa banwa nin Estemoa.

²⁰An mga aking lalaki ni Simon iyo si Amnon, Rina, Benhanan, asin Tilon. An duwang aking lalaki ni Isi iyo si Zohet asin si Bensohet.

²¹Si Sela saro sa mga aking lalaki ni Juda. Kabilang sa kapagarakian niya iyo si Er na ama ni Leca; si Laada na ama ni Maresa; an kamaganakan kan mga parahabol nin lino duman sa Bet-asbea;

²²si Jokim asin an mga nag-eerok sa banwa nin Coseba; si Joas, asin si Saraf, na nakaagom nin mga babaeng Moabita dangan nag-erok sa Betlehem. (Daan nang marahay an mga tradisyon na ini.)

²³Naglilingkod sinda sa hade bilang mga paragibo nin koron asin nag-erok sinda sa mga banwa nin Netaim asin Gedera.

²⁴An mga aking lalaki ni Simeon iyo si Nemuel, Jamin, Jarib, Zera, asin Shaul.

²⁵Aki ni Shaul si Sallum na ama ni Mibsam, na ama ni Misma.

²⁶Aki ni Misma si Hammuel na ama ni Zaccur, na ama ni Simei.

²⁷Nagkaigwa si Simei nin dyes y seis na aking lalaki asin anom na aking babae, alagad an saiyang mga tugang dai nagkaigwa nin dakol na mga aki; kaya dai nagdakul an tribu ni Simeon siring kan pagdakul kan tribu ni Juda.

²⁸An mga kapagarakian ni Simeon nag-erok sa mga banwa nin Beer-sheba, Molada, Hazar-sual.

²⁹Bilha, Ezem, Tolad,

³⁰Betuel, Horma, Ziklag,

³¹Bet-marcabot, Hazar-susim, Bet-biri, asin Saaraim. Digdi sinda nag-erok sagkod kan paghade ni Hadeng David.

³²Nag-erok man sinda sa lima pang lugar: sa Etam, Ain, Rimon, Tocen, saka Asan,

³³pati sa mga baryo sa palibot kan mga banwa na ini, sagkod sa harayong banwa nin Baalat. Nagkaigwa sinda nin talaan kan gabos nindang pamilya asin kan mga lugar na pinag-erokan ninda.

³⁴An mga lalaking ini iyo an mga pamayo kan saindang kamaganakan: Mesobab, Jamlec, Josa na aki ni Amazias, Joel, Jehu (na aki ni Josibias, na aki ni Seraias, na aki ni Asiel), Elioenai, Jaakoba, Jesohaias, Asaias, Adiel, Jesimiel, Benaias, Ziza, (na aki ni Sifi, na aki ni Allon na aki ni Jedaias, na aki ni Simri, na aki ni Semaias.) Huli ta padagos an pagdakul kan saindang mga pamilya,

³⁹nakalakop sinda sagkod sa Gedor, tanganing pasabsabon an saindang mga hayop duman sa sirangan na parte kan kapantayan,

⁴⁰saen nakakua sinda nin marahay, mahiwas matoninong asin matiwasay na daga para sa saindang mga hayop. Kaidto an nag-erok sa dagang ini iyo an mga Hamita.

⁴¹Kan panahon ni Hadeng Ezekias nin Juda, nagduman sa Gedor an mga lalaking ini, asin ginaba an mga tolda kan mga nag-eerok duman. Pinahale ninda an mga tawo asin nag-erok sa lugar kan mga ini, huli ta igwa duman nin marahay na dagang pasabsaban kan saindang mga hayop.

⁴²Kinyentos na mga kaayon sa tribu ni Simeon an nagduman sa sirangan kan Bukid nin Seir. An mga lider ninda iyo si Pelatias, Nearias, Refaias, asin Uziel na mga aking lalaki ni Isi.

⁴³Ginaradan ninda an mga natadang Amalekita, asin duman na sinda nag-erok poon kaidto.