Read Central Bicolano 1 Chronicles 5 Bible Online

1 Chronicles 5 - Central Bicolano bible

1 Chronicles 5

¹Iyo ini an mga kapagarakian ni Ruben, an matua sa mga aking lalaki ni Jacob. (Huli ta dinorogan niya an saro sa mga kasaroan kan saiyang ama, henale saiya an mga deretsong para sa matuang aking lalaki asin an mga deretsong ini itinao ki Jose.

²Alagad an tribu ni Juda iyo an nagin pinakamakosog, asin saiya naggikan an pamayo kan gabos na tribu, maski ngani an deretso kan matua yaon ki Jose.)

³An mga aking lalaki ni Ruben, na matuang aking lalaki ni Jacob, iyo si Hanoc, Pallu, Hezron, asin Carmi.

⁴Iyo ini an mga kapagarakian ni Joel sa pasurunod-sunod na henerasyon magpoon saiya: Joel, Semaias, Gog, Simei, Mica, Reaias, Baal, asin Beera. Si Beera, na sarong lider kan tribu ni Ruben, dinakop ni Tiglat-pileser na emperador kan Asiria, asin ipinatapok.

⁷Sa listahan kan mga pamilya, an mga ini iyo an nakasurat na mga pamayo kan mga kamaganakan sa tribu ni Ruben: si Jeiel, Zacarias,

⁸asin si Bela na aking lalaki ni Azaz na makoapo ni Sema sa kamaganakan ni Joel. An mga kamaganakan na ini nag-erok sa Aroer sagkod sa Nebo asin Baal-meon.

⁹Nagkaigwa sinda nin dakul na hayop duman sa Gilead, kaya nagduman sinda asin nag-erok sa daga sa sirangan kan desyerto na minasagkod sa Salog nin Eufrates.

¹⁰Kan panahon ni Hadeng Saul, sinalakay kan tribu ni Ruben an mga Agareno, asin ginadan ninda an mga ini sa gera, dangan sinakop an daga kaini sa sirangan na parte kan Gilead.

¹¹Nag-erok an tribu ni Gad sa amihan kan tribu ni Ruben, duman sa daga nin Basan sagkod sa Saleca.

¹²Si Joel iyo an pamayo kan nangengenot na kamaganakan, asin si Safam an lider kan ikaduwa. Si Janai asin si Safat iyo man an mga pamayo kan iba pang kamaganakan sa Basan.

¹³Kaayon man sa tribu ni Gad si Miguel, Mesullam, Sheba, Jorai, Jacan, Zia, asin Eber.

¹⁴Sinda an pitong kapagarakian ni Abihail na aki ni Huri, na aki ni Jaroa, na aki ni Gilead, na aki ni Miguel, na aki ni Jesisai, na aki ni Jado, na aki ni Buz.

¹⁵Si Ahi, na aki ni Abdiel asin makoapo ni Guni, iyo an pamayo kan mga kamaganakan na ini.

¹⁶Nag-erok sinda sa teritoryo nin Basan asin Gilead, sa mga banwa duman patin sa mga dagang pasabsaban nin Sharon. (

¹⁷An mga talaan na ini tinipon kan panahon ni Hadeng Jotam nin Juda asin ni Hadeng Jeroboam nin Israel.)

¹⁸An mga tribu ni Ruben, ni Gad, asin ni Manases sa sirangan igwa nin kwarenta y kwatro mil syete syentos sesentang mga soldados, na gabos eksperto sa paggamit nin kalasag, espada, asin pana.

¹⁹Nakigera sinda sa mga Agarenong tribu ni Jetur, Nafis, asin Nodab.

²⁰Ibinugtak ninda an saindang paglaom sa Dios asin naghagad saiya nin tabang. Dinangog nin Dios an saindang pamibi asin pinapanggana sinda laban sa mga Agareno sagkod sa mga kaapil kaini.

²¹Nasamsam ninda sa mga kaiwal an singkwenta mil na mga kamelyo, dos syentos singkwenta mil na mga karnero, dos mil na mga asno, asin nakabihag sinda nin sanggatos mil na mga kaiwal.

²²Ginadan ninda an kadaklan sa mga kaiwal, huli ta pagboot nin Dios an gera. Padagos sindang nag-erok sa teritoryong idto sagkod kan panahon kan pagtapokan sainda.

²³An kabanga kan tribu ni Manases na nasa sirangan nag-erok sa teritoryo nin Basan sagkod sa Baal-hermon, Senir, asin Bukid nin Hermon. Padagos an saindang pagdakul.

²⁴Iyo ini an mga pamayo kan saindang mga kamaganakan: si Efer, Isi, Eliel, Azriel, Jeremias, Odavias, asin Jadiel. Gabos sinda mga bantog na soldados, mga midbid na pamayo kan saindang kamaganakan.

²⁵Alagad an mga tawo dai nagin maimbod sa Dios nin saindang mga ginikanan. Nagtalikod sinda saiya asin nagsamba sa mga dios-dios kan mga nasyon na pinahale nin Dios sa daga.

²⁶Kaya pinangyari nin Dios na sakopon an saindang daga ni Pul na emperador kan Asiria (inaapod man sa ngaran na Tiglat-pileser). An mga tribu ni Ruben, Gad, asin Manases sa sirangan itinapok asin duman sinda nag-erok sa Hala, Habor, saka Hara, asin sa may Salog nin Gozan. Duman na sinda nag-erok sagkod ngunyan.