Read Central Bicolano 1 Chronicles 9 Bible Online

1 Chronicles 9 - Central Bicolano bible

1 Chronicles 9

¹Nakalista an gabos na mga taga Israel sosog sa saindang mga pamilya, asin ini nakatala sa An Libro kan mga Hade nin Israel. Itinapok sa Babilon an mga taga Juda bilang padusa kan saindang kasalan.

²An enot na nagbaralik sa saindang pagsadiri duman sa mga syudad iyo an mga ordinaryong Israelita, an mga padi, an mga Levita asin an mga sorogoon sa Templo.

³Duman na sa Jerusalem nag-erok an ibang kaayon sa mga tribu ni Juda, Benjamin, Efraim, asin Manases.

⁴Seis syentos nubentang mga pamilya kan tribu ni Juda an nag-erok sa Jerusalem. Si Utai na aki ni Amihud asin makoapo ni Omri iyo an nagin pamayo kan kapagarakian ni Perez na aki ni Juda. An ibang ginikanan niya iyo si Imri asin Bani. Si Asaias na pamayo kan saiyang pamilya iyo an nagin pamayo kan kapagarakian ni Sela na aking lalaki ni Juda. Si Jeuel iyo an pamayo kan kapagarakian ni Zera na aking lalaki ni Juda.

⁷Iyo ini an mga kaayon sa tribu ni Benjamin na nag-erok sa Jerusalem: si Sallu na aking lalaki ni Mesullam, na aking lalaki ni Odavias, na aking lalaki ni Hassenua si Ibneias na aking lalaki ni Jeroham si Ela na aking lalaki ni Uzzi asin makoapo ni Mikri si Mesullam na aking lalaki ni Sefatias, na aking lalaki ni Reuel, na aking lalaki ni Ibneias

⁹An bilang kan mga pamilya kan tribung ini na nag-erok sa Jerusalem uminabot sa nuebe syentos singkwenta y seis. An mga lalaking ini gabos pamayo kan saindang mga pamilya.

¹⁰Iyo ini an mga padi na nag-erok sa Jerusalem: si Jedaias, si Jehoiarib asin si Jakin si Azarias na aking lalaki ni Hilkias (na iyo an pamayong opisyal sa Templo). Kabilang sa mga ginikanan ni Azarias si Mesullam, Zadok, Meraiot, asin Ahitub si Adaias na aking lalaki ni Jeroham; kabilang sa saiyang mga ginikanan si Pasur asin si Malkia si Maasai na aking lalaki ni Adiel; kabilang sa saiyang mga ginikanan ni Jasera, Mesullam, Mesillemit, asin Immer

¹³An bilang kan mga padi na pamayo kan saindang mga pamilya uminabot sa mil syete syentos sesenta. Mga eksperto sinda gabos sa trabahong paglingkod sa Templo.

¹⁴Iyo ini an mga Levita na nag-erok sa Jerusalem: si Semaias na aking lalaki ni Hassub; kabilang sa saiyang mga ginikanan si Azrikam asin Hasabias kan kamaganakan ni Merari si Bakbakar, si Heres, asin si Galal si Matanias na aking lalaki ni Mica; kabilang sa saiyang mga ginikanan iyo si Zikri asin si Asaf si Obadias na aking lalaki ni Semaias; kabilang sa saiyang mga ginikanan iyo si Galal asin si Jedutun si Berekias na aking lalaki ni Asa asin makoapo ni Elkana, na nag-erok sa lugar na sakop kan banwa nin Netofa.

¹⁷An mga bantay kan Templo na nag-erok sa Jerusalem iyo si Sallum, Akkub, Talmon, asin Ahiman. Si Sallum iyo an saindang pamayo.

¹⁸Sinda an nagbantay kan Trangkahan kan Hade na nasa sirangan. An pinagbantayan ninda kaidto iyo an mga trangkahan kan kampo kan mga Levita.

¹⁹Si Sallum na aking lalaki ni Kore asin makoapo ni Ebiasaf, kairiba an saiyang mga kadugo na kabilang sa kamaganakan ni Kora, iyo an namamahala sa pagbantay kan pintoan kan Tabernakulo, arog kan ginibo kan saindang mga ginikanan kan an mga ini iyo an nagbantay kan kampo nin Kagurangnan.

²⁰Minsan, nagin pamayo ninda si Finehas na aking lalaki ni Eleazar, na inibahan nin Kagurangnan.

²¹Si Zacarias, na aking lalaki ni Meselemias, iyo an bantay kan trangkahan na laogan pasiring sa Tabernakulo.

²²An kabilogan na bilang kan mga lalaking napili na magbantay sa mga trangkahan asin mga pintoan uminabot sa dos syentos dose. Nakatala an saindang mga ngaran sosog sa mga lugar na saindang pinag-erokan. Si Hadeng David asin an propetang si Samuel iyo an nagbugtak kan saindang mga ginikanan sa mahalagang katongdan na ini.

²³Sinda asin an saindang kapagarakian iyo an namahala sa pagbantay kan mga trangkahan kan harong nin Kagurangnan na iyo an Templo.

²⁴Igwa nin mga nagbabantay sa mga trangkahan na nasa apat na direksyon: sa sirangan, sa solnopan, sa amihan, asin sa habagat.

²⁵An mga bantay na ini tinabangan kan saindang mga kadugo, na nag-erok sa mga baryo asin minaiba sainda sa turno-turnong pagbantay lambang ikapitong aldaw.

²⁶Gabos mga Levita an apat na pamayong mga bantay, asin sinda an namahala kan mga kwarto kan Templo asin kan mga kayamanan duman.

²⁷Nag-erok sinda harani sa Templo, huli ta katongdan ninda an magbantay kaini asin sa pagbukas kan mga trangkahan aga-aga.

²⁸Nagkapirang mga Levita an namahala kan mga kasangkapan na ginagamit sa pagsamba. Binibilang ninda an mga kagamitan kun ilinuluwas dangan kun ibinabalik.

²⁹An iba sainda iyo an pinamahala kan banal na mga kagamitan, asin man kan arina, arak, lana nin oliba, insenso, saka mga pahamot.

³⁰Alagad an mga padi iyo an namahala kan paghalo kan mga pahamot.

³¹Sarong Levita na an ngaran Matitias, an matuang aking lalaki ni Sallum kan kamaganakan ni Kora, iyo an namahala kan paggibo kan mga maninipis na tinapay na idodolot.

³²An nagkapirang kaayon sa kamaganakan ni Kohat iyo an namahala kan paggibo kan banal na tinapay sa lambang Sabbath.

³³An ibang mga pamilya kan mga Levita iyo an parakanta sa Templo. An mga pamayo kan mga pamilyang ini nag-erok sa mga kwarto kan Templo, asin libre sinda sa ibang trabaho tanganing pwedeng apodon sa aldaw asin sa banggi.

³⁴Ini gabos iyo an mga pamayo kan mga pamilya kan mga Levita sosog sa mga henerasyon kan saindang ginikanan. Sinda an mga lider na nag-erok sa Jerusalem.

³⁵Si Jeiel iyo an nagpatindog kan syudad nin Gibeon asin duman siya nag-erok. An saiyang agom iyo si Maaca.

³⁶An matua niyang aking lalaki iyo si Abdon, asin an iba pa niyang aking lalaki iyo si Zur, Kis, Baal, Ner, Nadab,

³⁷Gedor, Ahio, Zacarias, asin Miklot,

³⁸na iyo an ama ni Simea. Sa Jerusalem nag-erok an saindang kapagarakian, harani sa iba pang mga pamilya kan saindang kamaganakan.

³⁹Si Ner iyo an ama ni Kis, na ama ni Saul. An mga aking lalaki ni Saul iyo si Jonatan, Malkisua, Abinadab, asin Esbaal.

⁴⁰Si Jonatan iyo an ama ni Meribaal, na ama ni Mica.

⁴¹An mga aking lalaki ni Mica iyo si Piton, Melec, Tarea, asin Ahaz.

⁴²Si Ahaz iyo an ama ni Jara na iyo an ama ni Alemet, Azmavet, asin Zimri. Si Zimri iyo an ama ni Moza,

⁴³na ama ni Binea, na ama ni Refaias, na ama ni Eleasa, na iyo an ama ni Azel.

⁴⁴An anom na aking lalaki ni Azel iyo si Azrikam, Bokeru, Ismael, Searias, Obadias, asin Hanan.