Read Central Bicolano 2 Chronicles 1 Bible Online

2 Chronicles 1 - Central Bicolano bible

2 Chronicles 1

¹Pusog na pinaghadean ni Solomon na aking lalaki ni David an kahadean nin Israel; benendisyonan siya nin Kagurangnan na saiyang Dios asin ginibo siyang orog na mapangyari.

²Pinagbotan ni Solomon an bilog na Israel, an mga opisyal nin rinibo asin nin ginatos na mga soldados, an mga hukom asin an gabos na pamayo nin mga pamilya

³na mag-iba saiya duman sa lugar na pagsasambahan sa Gibeon. Nagduman sinda huli ta yaon duman an Tabernakulo na ginibo kaidto ni Moises, an sorogoon nin Kagurangnan, sa kalangtadan. (

⁴Alagad nasa Jerusalem an Kaban nin Tipan, sa sarong tolda na itinugdok ni Hadeng David, kan darahon niya an Kaban nin Tipan hale sa Kiriat-jearim.)

⁵Yaon man duman sa Gibeon, sa atubangan kan Tabernakulo, an bronseng altar na ginibo ni Bezalel, na aking lalaki ni Uri saka makoapo ni Hur. An Kagurangnan sinamba duman ni Solomon asin kan bilog na katiriponan.

⁶Nagdolok si Solomon sa bronseng altar, sa atubangan kan Tabernakulo, asin nagdolot nin sangribong tinutong na atang.

⁷Kan bangging idto, nagpahiling an Dios ki Solomon asin naghapot, “Ano an boot mong itao ko saimo?”

⁸Nagsimbag si Solomon sa Dios, “Pinahilingan mo nin dakula asin danay na pagkamoot an sakong ama na si David, asin ngunyan ginibo mo akong hade bilang kasalihid niya.

⁹O Kagurangnan Dios, otoba ngunyan an saimong panuga sa sakuyang ama. Ginibo mo akong hade nin sarong banwaan na arog kadakul kan alpog sa daga.

¹⁰Tawe ako nin kadonongan asin pakaaram na kaipuhan ko sa paghade sainda, huli ta siisay an pwedeng maghade sa banwaan mong ini na orog kadakula?”

¹¹Nagsimbag an Dios ki Solomon, “Tama an pinili mo. Embes na maghagad ka nin pagsadiri, kayamanan, kaomawan, o an buhay kan saimong mga kaiwal, o an halawig na buhay para saimo, hinagad mo an kadonongan asin pakaaram tanganing paghadean mo an sakong banwaan, na binoot kong paghadean mo.

¹²Tatawan taka nin kadonongan asin pakaaram. Laen pa kaiyan, tatawan taka nin kayamanan, pagsadiri saka kabantogan na dai pa nakamtan nin siisay man na hade kaidto, ni makakamtan pa ngapit.”

¹³Kaya naghale si Solomon sa lugar na pagsasambahan sa Gibeon na namumugtakan kan Tabernakulo, asin nagpasiring sa Jerusalem. Duman niya pinaghadean an Israel.

¹⁴Nagtipon siya nin mga karwahe asin mga parakabayo: mil kwatro syentos an saiyang mga karwahe asin dose mil an mga parakabayo. An iba kaini ibinugtak niya sa Jerusalem, asin an iba ibinugtak niya sa manlaen-laen na syudad.

¹⁵Kan panahon nin paghahade ni Solomon, an bulawan asin plata ordinaryo sanang bagay sa Jerusalem arog sa gapo, asin an sedro arog kadakul sa sikomoro duman sa Sefela.

¹⁶An mga kabayo kan hade hale pa sa Egipto asin sa Kue, asin an saiyang mga negosyante iyo an minabakal kaiyan sa Kue sa talaan na presyo.

¹⁷Sa Egipto man ninda binarakal an mga karwahe. An mga kabayo saka mga karwahe ipinabakal ninda sa mga hade kan mga Heteo asin sa mga hade sa Siria sa kantidad na seis syentos na pedaso nin plata an lambang karwahe, asin syento singkwenta an lambang kabayo.