Read Central Bicolano 2 Chronicles 12 Bible Online

2 Chronicles 12 - Central Bicolano bible

2 Chronicles 12

¹Kan mapatindog asin mapapusog na ni Rehoboam an saiyang kapangyarihan bilang hade, tinalikodan niya asin kan bilog na Israel an katogonan nin Kagurangnan.

²Huli ta dai sinda nagin maimbod, pinadusahan sinda nin Kagurangnan kan ikalimang taon nin paghahade ni Rehoboam. An Jerusalem sinalakay ni Sisak na hade nin Egipto,

³kaiba an mil dos syentos na mga karwahe, sesenta mil na nakakabayong mga soldados asin dai mabilang na mga soldados kaiba an mga taga Libya, Sukkim saka Etiopia.

⁴Nasakop niya an makokosog na mga syudad nin Juda asin nakaabot siya sa Jerusalem.

⁵An propetang si Semaias nagduman ki Hadeng Rehoboam asin sa mga lider nin Juda na nagtiripon sa Jerusalem sa pagdulag ki Sisak. Sinabihan niya sinda, “Nagtaram an Kagurangnan, ‘Tinalikodan nindo ako, kaya papabayaan ko kamo sa kapangyarihan ni Sisak.’”

⁶Dangan nagpakumbaba an hade saka an mga lider nin Israel asin nagsarabi, “Matanos an Kagurangnan.”

⁷Kan mahiling nin Kagurangnan na nagpakumbaba sinda, nagsabi siya ki Semaias, “Nagpakumbaba na sinda; dai ko na sinda gagadanon. Masalakay si Sisak alagad makakaligtas sinda, asin an Jerusalem dai makakamate kan tunay na gabat kan sakong kaanggotan.

⁸Alagad mabibihag sinda ni Sisak tanganing maaraman ninda an kalaenan kan paglingkod sako ki sa paglingkod sa daganon na mga hade.”

⁹Nag-abot si Hadeng Sisak sa Jerusalem asin kinua niya an mga kayamanan sa Templo saka sa palasyo. Kinua niya an gabos sagkod an mga kalasag na bulawan na ipinagibo ni Solomon.

¹⁰Bilang karibay kan mga ini, nagpagibo si Hadeng Rehoboam nin mga kalasag na bronse asin pinaingatan sa mga opisyal na nagbabantay kan mga trangkahan kan palasyo.

¹¹Sa lambang paglaog kan hade sa Templo, dinadara kan mga bantay an mga kalasag dangan ibinabalik ninda giraray sa saindang kwarto.

¹²Huli ta nagpakumbaba si Rehoboam, nahale an kaanggotan saiya nin Kagurangnan. Dai na ipinadagos an pagtunaw saiya asin nagin marahay an kamugtakan kan gabos na bagay sa Juda.

¹³Naghade si Rehoboam sa Jerusalem asin nagdakula an saiyang kapangyarihan bilang hade. Kwarenta y uno na an edad ni Rehoboam kan siya magin hade, asin dyes y syeteng taon siyang naghade sa Jerusalem, an syudad na pinili nin Kagurangnan sa gabos na tribu nin Israel bilang lugar na pagsasambahan saiya. An ina ni Rehoboam iyo si Naama na sarong Ammonita.

¹⁴Naggibo si Rehoboam nin maraot huli ta dai niya kinuyog an kabotan nin Kagurangnan.

¹⁵An mga gibo ni Rehoboam, magpoon sa kapinonan, nasusurat sa An Kasaysayan ni Semaias na Propeta asin sa An Kasaysayan ni Iddo na Propeta. Danay na naglalaban si Rehoboam saka si Jeroboam.

¹⁶Nagadan si Rehoboam asin ilinubong sa lugar na pinaglubongan kan saiyang mga ginikanan, duman sa Syudad ni David. An aki niyang lalaki na si Abias iyo an nagsalihid saiya bilang hade.