Read Central Bicolano 2 Chronicles 16 Bible Online

2 Chronicles 16 - Central Bicolano bible

2 Chronicles 16

¹Kan ikatreynta y seis na taon kan paghahade ni Asa, sinalakay ni Baasa na hade nin Israel an Juda asin pinonan niyang papusogon an Rama tanganing maontok an gabos na paglaog asin pagluwas sa Juda.

²Kaya nagkua si Asa nin plata saka bulawan hale sa kayamanan sa Templo saka sa palasyo dangan ipinadara ki Hadeng Benhadad nin Siria na idtoon duman sa Damasco, kaiba an mensaheng ini:

³“Magin magkaalyansa kita siring na nag-alyansa an satong mga ama. Para saimo an plata saka bulawan na ini. Putola ngunyan an saimong pakipag-alyansa ki Hadeng Baasa nin Israel, tanganing haleon niya an saiyang hukbo sa sakong teritoryo.”

⁴Nag-oyon si Benhadad sa alok ni Asa, asin ipinadara niya an saiyang mga opisyal saka an saindang mga hukbo tanganing salakayon an mga syudad nin Israel. Nasakop ninda an Ijon, an Dan asin an Abel-main sagkod an mga sarayan na syudad nin Neftali.

⁵Kan madangog ini ni Hadeng Baasa, inontok niya an pagpapusog kan Rama asin binayaan an pagpatrabaho.

⁶Dangan tinipon ni Hadeng Asa an mga lalaki sa Juda asin kinua ninda an mga gapo saka mga kahoy na ginamit ni Baasa sa Rama, dangan ginamit an mga ini sa pagpapusog kan mga syudad nin Geba asin Mizpa.

⁷Kan panahon na iyan, nagdalaw an propetang si Hanani ki Asa na hade nin Juda, dangan nagsabi, “Huli ta nagsarig ka sa hade nin Siria asin bakong sa Kagurangnan na saimong Dios, nakadulag saimo an hukbo kan hade nin Siria.

⁸Bakong mas dakula an mga hukbo asin mas dakul an mga karwahe saka mga nakakabayong mga soldados kan mga taga Etiopia patin mga taga Libya? Alagad huli ta nagsarig ka sa Kagurangnan, sinda gabos itinao niya sa saimong kamot.

⁹Binabantayan nin marahay nin Kagurangnan an bilog na daga tanganing pakosogon an mga tawong an puso maimbod saiya. Kalolongan an ginibo mo, kaya poon ngunyan magkakaigwa ka nin mga gera.”

¹⁰Naanggot si Asa sa propeta asin ini saiyang ipinabilanggo. Kan panahon man na ini nagpoon na magin makuri si Asa sa nagkapira niyang mga tawohan.

¹¹An mga gibo ni Asa, poon sa kapinonan sagkod sa kataposan, gabos nasusurat sa An Kasaysayan kan mga Hade nin Juda asin nin Israel.

¹²Kan ikatreynta y nuebeng taon kan paghahade ni Asa, napilay siya huli sa sarong helang sa bitis; maski makuri an saiyang helang, dai man giraray siya nagbalik sa Kagurangnan, kundi naghagad nin tabang sa mga doktor.

¹³Pakalihis nin duwang taon, nagadan siya.

¹⁴Ilinubong siya sa lulubngan na gapo na tinuki niya duman sa Syudad ni David. An saiyang bangkay inandam ninda para sa paglubong sa paagi nin pagbugtak nin manlaen-laen na pahamot; dangan nagtambak sinda nin igatong asin naggibo nin dakulang kalayo sa pagmondo kan saiyang pagkagadan.