Read Central Bicolano 2 Chronicles 2 Bible Online

2 Chronicles 2 - Central Bicolano bible

2 Chronicles 2

¹Nagdesisyon si Solomon na magtugdok nin sarong templo para sa ngaran kan Kagurangnan, asin sarong palasyo para saiya.

²Nagbugtak siya nin setenta mil na lalaking parabuhat nin kagamitan, otsenta mil na lalaking paratabas nin gapo, saka tres mil seis syentos na mga kapatas.

³Nagpadara nin mensahe si Solomon ki Hiram na hade nin Tiro, “Pabakalan mo man ako nin mga kahoy na sedro siring na pinabakalan mo kaiyan an sakong ama na si David para sa saiyang palasyo.

⁴Mapatugdok ako nin templo para sa ngaran kan Kagurangnan na sakuyang Dios; kokonsagrahon ko iyan saiya tanganing pagtutongan nin insenso nin mga pahamot sa atubang niya, asin danay na pagdolotan kan mga dolot na tinapay saka mga tinutong na atang aga-aga asin barubanggi, siring man kun mga Sabbath, mga Pyesta kan Bagong Bulan asin mga talaan na pyesta nin Kagurangnan na samuyang Dios. Ipinagboot nin Kagurangnan na gibohon ini nin Israel sagkod lamang.

⁵Dakula an templo na sakong ipapatugdok, huli ta mas dakula an samuyang Dios ki sa ibang mga dios.

⁶Alagad siisay an makakapagtugdok nin sarong templo para saiya, na maski an kahiwasan kan bilog na kalangitan dai magkakanigo para saiya? Kaya anong templo an ikakapatugdok ko para saiya kundi arog sana sa sarong lugar na tinututongan nin insenso sa atubang niya?

⁷Kaya padigdihon mo sako an sarong lalaking eksperto sa mga gibong bulawan, plata, bronse saka lansang, siring man sa pagtrabaho sa mga telang kolor asul, purpura saka pula. Magtatrabaho siya kaiba kan mga ekspertong trabahador sa Juda asin sa Jerusalem, na pinili kan ama kong si David.

⁸Aram kong matitibay an saimong mga parapalod nin kahoy, kaya padarahan mo ako nin mga kahoy na sedro, sipres, asin algum hale sa Lebanon. Andam akong magpadara nin mga matabang sa mga sorogoon mo,

⁹tanganing mag-andam nin dakul na kahoy, huli ta dakula saka magayon an templo na itutugdok ko.

¹⁰An saimong mga parapalod nin kahoy tatawan ko nin dos mil na toneladang trigo, dos mil na toneladang sebada, kwatro syentos mil na litro nin arak saka kwatro syentos mil na litro nin lana.”

¹¹Sa paagi nin sarong surat, sinimbag si Solomon ni Hadeng Hiram, “Huli ta namomotan nin Kagurangnan an saiyang banwaan, ginibo ka niyang hade ninda.

¹²Pag-omawon an Kagurangnan Dios nin Israel, kaggibo kan langit asin daga! Tinawan niya si Hadeng David nin sarong madonong na aki, na igwa nin pakasabot asin pakaaram, na ngunyan mapatugdok nin sarong templo para sa Kagurangnan patin sarong palasyo para saiya.

¹³Isinusubol ko saimo an sarong madonong asin ekspertong trabahador na an ngaran Huram.

¹⁴An saiyang ina kaayon sa tribu ni Dan asin an saiyang ama gikan sa Tiro. Eksperto siyang magtrabaho sa bulawan, plata, bronse, lansang, gapo, asin kahoy. Tatao siya kan trabaho sa mga telang kolor asul, purpura saka pula, asin sa pinong lino. Kaya niyang gibohon an gabos na klase nin pag-ukit asin masusunod niya an arin man na desenyo na ipapagibo saiya. Tugotan mo siyang magtrabaho kaiba kan saimong mga trabahador asin kan mga trabahador nin saimong ama na si Hadeng David.

¹⁵Kaya ngunyan padarahan samo an trigo, sebada, arak saka lana na ipinanuga mo samo.

¹⁶Duman kami sa Lebanon mapalod nin kahoy na kaipuhan mo; bubugkoson mi iyan dangan gigibohon na mga balsa na samong ipapaanod sa dagat pasiring sa Jope. Hale duman, pwede mo nang madara iyan sa Jerusalem.

¹⁷Sinenso ni Solomon an gabos na dayuhan na nag-eerok sa daga nin Israel, arog sa sensong ginibo ni David na saiyang ama. An bilang kan gabos na dayuhan uminabot sa syento singkwenta y tres mil seis syentos.

¹⁸An setenta mil sainda itinalaan niyang parabuhat nin kagamitan, an otsenta mil itinalaan niyang paratabas nin gapo, asin an tres mil seis syentos ginibo niyang mga kapatas.