Read Central Bicolano 2 Chronicles 22 Bible Online

2 Chronicles 22 - Central Bicolano bible

2 Chronicles 22

¹An matuang mga aking lalaki ni Hadeng Jehoram ginaradan kan nagkapirang mga Arab na nagsalakay sa kampo; kaya si Ahazias, na ngohod niyang aki, iyo an ginibong hade kan mga taga Jerusalem bilang kasalihid kan saiyang ama.

²Beynte y dos an edad ni Ahazias kan siya magin hade, asin sarong taon siyang naghade sa Jerusalem. An saiyang ina iyo si Atalia, na makoapo ni Omri.

³Inarog man niya an ginibo kan pamilya ni Hadeng Ahab, huli ta an saiyang ina iyo an nagtukdo saiya sa paggibo nin maraot.

⁴Nagkasala siya sa Kagurangnan, huli ta pagkagadan kan saiyang ama, an ibang kaayon kan pamilya ni Ahab iyo an ginibo niyang parahatol, na nagin dahelan kan pagkaraot niya.

⁵Sa pagsunod sa saindang hatol, inibahan niya si Joram nin Israel sa pakigera ki Hazael na hade nin Siria. Duman sa Ramot-gilead nagralaban an mga hukbo. Nalugadan si Joram,

⁶asin nagbalik siya sa syudad nin Jezreel tanganing magparahay kan saiyang mga lugad. Dinalaw siya duman ni Ahazias.

⁷An pagdalaw na ini ni Ahazias ki Joram iyo an ginamit nin Dios na paagi tanganing mangyari an pagbagsak ni Ahazias. Huli ta kan yaon duman ki Joram si Ahazias, sinabat sinda kan aking lalaki ni Nimsi, na an ngaran Jehu, an lalaki na pinili nin Kagurangnan na magtunaw kan pamilya ni Ahab.

⁸Mantang kinukuyog ni Jehu an sentensya nin Dios sa pamilya ni Ahab, nanumpongan niya an mga lider nin Juda asin an mga sobrino ni Ahazias na nag-iriba digdi sa pagdalaw ki Joram. Ginadan sinda gabos ni Jehu.

⁹Hinanap si Ahazias asin nakua siyang nagtatago duman sa Samaria. Dinara siya ki Jehu asin ginadan. Bilang paggalang ki Jehosafat na saiyang lolo, na tudok sa pusong naglingkod sa Kagurangnan, ilinubong ninda an bangkay ni Ahazias. Mayo nin siisay man sa pamilya ni Ahazias na pwedeng mamayo kan kahadean.

¹⁰Kan maaraman ni Atalia, na ina ni Hadeng Ahazias, na gadan na an saiyang aki, nagboot siya na gadanon an gabos na kaayon kan pamilya kan hade nin Juda.

¹¹Igwa si Ahazias nin tugang na babae na an ngaran Jehosheba, na agom nin sarong padi na an ngaran Jehoiada. Hilom na ilinigtas ni Jehosheba si Joas, saro sa mga aking lalaki ni Ahazias. Isiniblag niya si Joas sa iba pang mga aki kan hade na gagaradanon na kan oras na idto dangan itinago kaiba an sarong paraaling duman sa sarong kwartong torogan sa Templo. Huli kan pagtatago ni Jehosheba ki Joas nakaligtas ini sa kagadanan sa kamot ni Atalia.

¹²Nagtago an aki sa laog nin anom na taon, mantang si Atalia an namayo bilang reyna.