Read Central Bicolano 2 Chronicles 24 Bible Online

2 Chronicles 24 - Central Bicolano bible

2 Chronicles 24

¹Pitong taon an edad ni Joas kan siya magin hade asin kwarentang taon siyang naghade sa Jerusalem. An saiyang ina iyo si Zibia na taga Beer-sheba.

²Ginibo niya an matanos sa atubangan nin Kagurangnan mantang buhay pa an padi na si Jehoiada.

³Nagpili si Jehoiada nin duwang agom para ki Joas asin nagkaigwa ini nin dakul na aking lalaki saka babae.

⁴Dai nahaloy, pinagmarahay ni Joas na hirahayon an Templo nin Kagurangnan.

⁵Tinipon niya an mga padi saka mga Levita dangan sinabihan, “Magduman kamo sa mga syudad nin Juda asin kolektahon nindo sa mga Israelita an kwarta na gagamiton sa taon-taon na paghirahay kan Templo. Gibohon nindo ini tolos.” Alagad dai tolos naghiro an mga Levita,

⁶kaya ipinaapod ni Joas si Jehoiada na saindang pamayo asin sinabihan, “Tano ta dai mo pinagbotan an mga Levita na kolektahon sa mga taga Juda asin Jerusalem an buhis para sa Tabernakulo, buhis na ipinagboot ni Moises, na sorogoon nin Kagurangnan?” (

⁷An Templo linaog kan mga parasunod ni Atalia, an tampalasan na babae, asin dakul sa mga kagamitan sa Templo an ginamit ninda sa pagsamba ki Baal.)

⁸Kaya pinagbotan kan hade an mga Levita na maggibo nin sarong kahon para sa mga limos asin ibinugtak ini sa trangkahan kan Templo.

⁹Ibinalangibog ninda sa bilog na Juda saka Jerusalem an pagboot na an lambang saro magdara sa Kagurangnan kan buhis na ipinagboot ni Moises na sorogoon nin Dios sa mga Israelita kan yaon sinda duman sa kalangtadan.

¹⁰Naogma an banwaan asin an saindang mga lider. Dinara ninda an saindang buhis dangan ihinulog sa kahon sagkod na napano idto.

¹¹Aroaldaw, an kahon dinadara kan mga Levita sa opisyal kan hade na namamahala kaini. Kun nahihiling ninda na pano na an kahon, minadolok an sekretaryo kan hade saka an opisyal kan Halangkaw na Padi asin hinahale ninda an kwarta sa kahon. Dangan ibinabalik ninda an kahon sa dating namumugtakan kaini. Kaya dakulang halaga nin kwarta an saindang natipon.

¹²An kwarta itinatao kan hade asin ni Jehoiada sa mga namamahala kan paghirahay kan Templo, dangan nagtandan sinda nin mga kantero, mga karpintero saka mga eksperto sa trabaho sa lansang asin bronse, tanganing hirahayon an Templo.

¹³Nagtrabaho nin maigot an gabos, asin an Templo pinapusog ninda siring sa dating kamugtakan kaini.

¹⁴Kan tapos na an trabaho, dinara ninda sa hade asin ki Jehoiada an natadang bulawan saka plata dangan an mga ini ginibo nindang mga mangko asin iba pang mga kagamitan para sa Templo. Mantang buhay pa si Jehoiada, padagos an pagdolot nin mga tinutong na atang sa Templo nin Kagurangnan.

¹⁵Guminurang siya nin marahay, asin nagadan siya sa edad na syento treynta.

¹⁶Ilinubong siya sa Syudad ni David, sa lulubngan kan mga hade, huli ta naggibo siya nin karahayan sa Israel, sa Dios asin sa Templo.

¹⁷Alagad pakagadan ni Jehoiada, dinagka si Hadeng Joas kan mga lider nin Juda na sinda na an pagdangogon.

¹⁸Kaya an mga tawo nag-ontok sa pagsamba sa Templo nin Kagurangnan, an Dios kan saindang mga ginikanan, dangan nagpoon sa pagsamba sa mga dios-dios asin sa mga ladawan kan diosang si Asera. An kagabatan kan saindang kasalan an nagin dahelan kan pagdatong kan kaanggotan nin Dios sa Juda saka sa Jerusalem.

¹⁹Nagpadara siya sainda nin mga propeta tanganing patanidan sinda na magbalik saiya, alagad habo sindang maghinanyog.

²⁰Dangan an espiritu nin Dios nag-abot ki Zacarias na aking lalaki kan padi na si Jehoiada. Nagtindog si Zacarias sa lugar na mahihiling kan mga tawo dangan nagsabi, “Ini an tataramon nin Kagurangnan: ‘Tadaw ta tinalikodan nindo an sakuyang mga togon, pagtalikod na dai magdadara saindo nin kauswagan? Huli ta binayaan nindo ako, babayaan ko man kamo.’”

²¹Alagad nagkasararo sinda laban ki Zacarias asin sa pagboot kan hade, ginapo siya ninda duman sa patyo kan Templo.

²²Nalingawan kan hade an karahayan na ipinahiling saiya ni Jehoiada na ama ni Zacarias, asin ipinagadan niya ini. Kan naghihingagdan na si Zacarias, nagkurahaw siya, “Mahiling logod nin Kagurangnan an saimong ginigibo asin padusahan ka!”

²³Kan matatapos na an taon, nag-abot an hukbo kan mga Siro dangan sinalakay si Joas. Naglaog sinda sa Juda saka sa Jerusalem, ginadan an gabos na lider kan banwaan dangan dinara sa hade kan Damasco an gabos na nasamsam ninda.

²⁴Sadit sana an hukbo kan mga taga Siria, alagad ipinadaog nin Kagurangnan an dakulang hukbo nin Juda huli ta binayaan kaini an Kagurangnan, an Dios kan saindang mga ginikanan. Sa paaging ini pinadusahan si Joas.

²⁵Nalugadan nin makuri si Hadeng Joas asin kan magharale na an mga kaiwal, duwa sa saiyang mga opisyal an nagpasaluib saiya. Ginadan ninda si Joas sa saiyang higdaan bilang pagbalos sa pagkagadan kan aki kan padi na si Jehoiada. Ilinubong si Joas sa Syudad ni David, alagad dai siya ilinubong sa lulubngan kan mga hade. (

²⁶An mga nagpasaluib saiya iyo si Zabad na aking lalaki nin sarong babaeng Ammonita na an ngaran Simeat, asin si Jozabad na aking lalaki nin sarong babaeng Moabita na an ngaran Simrit.)

²⁷Nasusurat sa An Komentaryo manongod sa Kasaysayan nin mga Hade an mga istorya kan mga aki ni Joas, an mga propesiya laban saiya asin kun paano niya hinirahay an Templo. Si Amazias na saiyang aki iyo an nagsalihid saiya bilang hade.