Read Central Bicolano 2 Chronicles 25 Bible Online

2 Chronicles 25 - Central Bicolano bible

2 Chronicles 25

¹Beynte y singko an edad ni Amazias kan siya nagin hade, asin beynte y nuebeng taon siyang naghade sa Jerusalem. An saiyang ina iyo si Jehoaddin na taga Jerusalem.

²Ginibo niya an matanos sa atubangan nin Kagurangnan, alagad bako iyan tudok sa puso niya.

³Kan pusog na an saiyang kapangyarihan bilang hade, ipinagadan niya an mga opisyal na guminadan sa saiyang ama.

⁴Alagad dai niya ipinagadan an mga aki ninda, kundi sinunod niya an pagboot nin Kagurangnan sa Katogonan ni Moises, “An mga magurang dai gagadanon para sa kasalan na ginibo kan saindang mga aki; ni an mga aki para sa kasalan na ginibo kan saindang mga magurang. An sarong tawo gagadanon sana para sa kasalan na siya nanggad an nakaginibo.”

⁵Tinipon ni Amazias an mga lalaki sa Juda asin sa Benjamin sosog sa saindang mga kamaganakan. Nagbugtak siya nin mga opisyal na mga mamamayo nin rinibo saka mga ginatos na soldados. Kabilang digdi an mga lalaki na an edad beynteng taon paitaas, na an bilang uminabot sa tres syentos mil. Andam sinda gabos sa pakilaban, eksperto sa paggamit nin mga garod saka mga kalasag.

⁶Laen pa kaini, nagkua pa siya nin syen mil na soldados sa Israel na tinandanan niya nin tres mil kwatro syentos kilos nin plata.

⁷Alagad sarong propeta an nagdolok sa hade asin nagsabi, “Mahal na hade, dai mo ipag-iba an hukbo nin Israel, huli ta an Kagurangnan dai maiba sa mga lalaking ini na hale sa Kahadean sa Amihan.

⁸Alagad kun sa paghona mo magigin makosog ka sa gera sa paaging ini, itatao ka nin Dios sa kamot kan saimong mga kaiwal, huli ta an Dios igwa nin kapangyarihan sa pagtao nin kadaogan o kapangganahan.”

⁹Hinapot ni Amazias an propeta, “Alagad ano an gigibohon nyamo sa mga plata na itinandan mi sa hukbo nin Israel? Nagsimbag an propeta, “Mas dakul pa kaiyan an itatao saimo nin Kagurangnan.”

¹⁰Kaya pinahale ni Amazias an tinandanan na hukbo asin pinapuli sa saindang harong. Nagpuruli sindang makuri an kaanggotan sa mga taga Juda.

¹¹Nagmaisog si Amazias dangan pinamayohan an saiyang hukbo pasiring sa Kapantayan nin Asin. Nakagadan sinda duman nin mga dyes mil na soldados na Edomita,

¹²asin nakabihag pa siya nin dyes mil. Dinara ninda an mga ini sa alitoktok nin sarong ampas sa syudad nin Sela dangan ihinulog ninda gabos. Nagadan an mga ini sa kagapoan sa ibaba.

¹³Alagad an mga soldados na Israelita, na dai tinugotan ni Amazias na mag-iba saiya, nagsalakay sa mga syudad nin Juda magpoon sa Samaria sagkod sa Bet-horon. Nakagadan sinda nin tres mil na lalaki asin dakul an saindang nasamsam.

¹⁴Pagbalik ni Amazias hale sa saiyang panggana sa mga Edomita, dinara niya an mga dios-dios kan mga ini, minidbid bilang mga dios niya, sinamba asin dinolotan nin tinutong na atang.

¹⁵Kaya naanggot an Kagurangnan ki Amazias asin nagsugo nin sarong propeta tanganing sabihan si Amazias, “Tadaw ta nagsamba ka sa mga dios-dios na dai ngani kayang magligtas kan sadiri nindang banwaan sa saimong kapangyarihan?”

¹⁶Alagad sinabihan siya ni Amazias, “Kasuarin ka nagin parahatol kan hade? Mag-ontok ta, kun dai, ipapagadan taka!” Nag-ontok an propeta alagad ikinataram pa niya an siring, “Ngunyan aram ko nang nagdesisyon an Dios na gadanon ka, huli ta ginibo mo ini asin habo kang magdangog sa hatol ko.”

¹⁷Dangan nagplano si Hadeng Amazias nin Juda laban sa Israel. Nagpadara siya nin mensahe sa hade nin Israel na si Jehoas na aking lalaki ni Jehoahaz asin makoapo ni Jehu, “Madya asin maghampangan kita sa gera.”

¹⁸Ipinadara ni Jehoas ki Amazias an simbag na ini, “Sarong binit sa Lebanon an nagsabi sa sarong sedro nin Lebanon, ‘Ipakasal mo an aki mong babae sa aki kong lalaki.’ Alagad sarong lalaw na hayop an nag-agi dangan tinimaktimakan an binit.

¹⁹Naghahambog ka ngunyan, Amazias, huli ta nadaog mo an mga Edomita. Alagad sinasabihan taka na magpuli ka na sa saimong harong. Tano ta naghahanap ka nin ribok na marumpag saimo kaiba an bilog na Juda?”

²⁰Alagad habong magdangog si Amazias. Kabotan nin Dios na madaog si Amazias huli ta nagsamba ini sa mga dios-dios nin Edom.

²¹Kaya naghampangan sa gera si Hadeng Jehoas nin Israel asin si Hadeng Amazias nin Juda. Duman sinda nagsabatan sa Bet-semes sa Juda.

²²Nadaog an hukbo nin Juda asin nagdurulag an mga soldados pasiring sa saindang harong.

²³Nabihag ni Jehoas si Amazias dangan dinara ini sa Jerusalem. Rinumpag ni Jehoas an kudal nin Jerusalem magpoon sa Trangkahan nin Efraim sagkod sa Trangkahan nin Kanto, na minaabot sa dos syentos metros an distansya.

²⁴Sinamsam niya an gabos na bulawan saka plata sa Templo, an mga kagamitan duman na binabantayan kan kapagarakian ni Obed-edom, asin an kayamanan sa palasyo. An gabos na ini dinara niya pagbalik niya sa Samaria kaiba an dakul na bihag.

²⁵Enot na nagadan si Jehoas na hade nin Israel; mantang si Amazias na hade nin Juda nabuhay pa sa laog nin kinseng taon pakagadan ni Jehoas.

²⁶An iba pang ginibo ni Amazias poon sa kapinonan sagkod sa kataposan gabos nasusurat sa An Kasaysayan nin mga Hade nin Juda asin nin Israel.

²⁷Magpoon kan magtalikod si Amazias sa Kagurangnan, padagos na nagkaigwa nin plano laban saiya duman sa Jerusalem. Nagdulag siya pasiring sa Lakis, alagad linamag siya kan saiyang mga kaiwal dangan ginadan.

²⁸An saiyang bangkay dinara sa Jerusalem na nakakarga sa sarong kabayo, dangan ilinubong sa Syudad ni David, sa lulubngan kan mga hade.